ລາວ-ໄທ ປຶກສາຫາລືກ່ຽວກັບ ຄຸ້ມຄອງ ແລະ ຊ່ວຍເຫລືອຜູ້ຖືກເຄາະຮ້າຍຈາກການຄ້າມະນຸດ ຄັ້ງທີ 4
ວັນທີ 11 ມີນາ 2025 ນີ້ ກອງເລຂາຄະນະກຳມະການຕ້ານການຄ້າມະນຸດລະດັບຊາດ ລາວ-ໄທ ປຶກສາຫາລື ການບໍລິຫານຄຸ້ມຄອງ ແລະ ການຊ່ວຍເຫລືອຜູ້ຖືກເຄາະຮ້າຍຈາກການຄ້າມະນຸດ (CMM) ຄັ້ງທີ 4 ຝ່າຍລາວໂດຍ ພົຈວ ກອງສະຫວັດ ບຸນລ້ຽງ ຮອງຫົວໜ້າກົມໃຫຍ່ຕໍາຫລວດ, ຫົວໜ້າກອງເລຂາຄະນະກໍາມະການຕ້ານການຄ້າມະນຸດລະດັບຊາດ, ຝ່າຍໄທ ນໍາໂດຍ ທ່ານ ນາງ ຈະຕຸພອນ ໂຣດຈະນະພານິດ ຮອງປະຫລັດ ກະຊວງການພັດທະນາສັງຄົມ ແລະ ຄວາມໝັ້ນຄົງຂອງມະນຸດ ພ້ອມດ້ວຍຄະນະຜູ້ແທນທັງສອງຝ່າຍເຂົ້າຮ່ວມ.
ເພື່ອເປັນການແລກປ່ຽນຂໍ້ມູນຂ່າວສານ ວຽກງານຕ້ານການຄ້າມະນຸດ ໃນການປົກປ້ອງ ແລະ ຊ່ວຍເຫຼືອຜູ້ຖືກເຄາະຮ້າຍ, ການຮັບ-ສົ່ງ, ການຕິດຕາມຫຼັງການສົ່ງຜູ້ຖືກເຄາະຮ້າຍກັບຄືນສູ່ຄອບຄົວ ແລະ ສັງຄົມ ລວມທັງການຕິດຕາມການດຳເນີນຄະດີຄ້າມະນຸດ ຂອງທັງສອງປະເທດ, ທັງເປັນການປົກປ້ອງຜູ້ຖືກເຄາະຮ້າຍຈາກການຄ້າມະນຸດ ໂດຍໃຫ້ສອດຄ່ອງກັບນະໂຍບາຍແຫ່ງຊາດຂອງຕົນ ໃນການຮ່ວມມືກັນພາຍໃຕ້ກົດໝາຍ ແລະ ຂະບວນການຍຸຕິທໍາໃຫ້ແກ່ຜູ້ຖືກເຄາະຮ້າຍ ພ້ອມຮັບປະກັນການຮ່ວມມືກັນລະຫວ່າງສອງປະເທດ, ການນໍາໃຊ້ມາດຕະການຊ່ວຍເຫລືອດ້ານກົດໝາຍຢ່າງກວ້າງຂວາງ ເພື່ອສະກັດກັ້ນ, ປາບປາມການຄ້າມະນຸດ, ການສົ່ງຕົວຜູ້ຖືກເຄາະຮ້າຍຈາກການຄ້າມະນຸດກັບຄືນປະເທດ ແລະ ພູມລໍາເນົາ ໃຫ້ທັນເວລາ ແລະ ຕ້ອງຄໍານຶງເຖິງຄວາມປອດໄພ ແລະ ກຽດສັກສີຂອງຜູ້ຖືກເຄາະຮ້າຍ.
ກອງປະຊຸມຄັ້ງນີ້ໄດ້ລາຍງານຜົນ ການຮ່ວມມືກັນປົກປ້ອງ, ຊ່ວຍເຫລືອ ແລະ ສົ່ງຜູ້ຖືກເຄາະຮ້າຍກັບຄືນປະເທດ, ໄດ້ລາຍງານຜົນການຕິດຕາມ ແລະ ການສົ່ງມອບເງິນຄ່າຕອບແທນໃນການດໍາເນີນຄະດີອາຍາຂອງກົມຄຸ້ມຄອງສິດ ແລະ ເສລີພາບຂອງຜູ້ຖືກເຄາະຮ້າຍ.
ນອກນັ້ນ, ຍັງໄດ້ທົບທວນແຜນປະຕິບັດງານ ອີງຕາມບົດບັນທຶກຄວາມເຂົ້າໃຈ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ຣາຊະອານາຈັກໄທ ວ່າດ້ວຍການຮ່ວມມືຕ້ານການຄ້າມະນຸດ ໄລຍະປີ 2023-2025 (POA) ແລະ ປຶກສາຫາລືການພັດທະນາແຜນປະຕິບັດງານ POA ໄລຍະ 2026-2028.
ທີ່ມາ: ໜັງສືພິມຄວາມສະຫງົບ
