ລ້ຽວຂວາໄດ້ຕະຫຼອດ ແຕ່ຕ້ອງລະວັງ ນຳມາຕິດຕັ້ງໃໝ່ກໍ່ຄົງດີ
ໂດຍ: ຜາຕຸງ
ເມື່ອກ່ອນ ຢູ່ຕາມເສັ້ນທາງຫຼວງ ຈຸດສາມແຍກ, ສີ່ແຍກ ໃນນະຄອນຫຼວງວຽງຈັນ, ແຕ່ລະບ່ອນ ເຄີຍເຫັນປ້າຍ ທີ່ຂຽນວ່າ “ ລ້ຽວຂວາໄດ້ຕະຫຼອດ ແຕ່ຕ້ອງລະວັງ “ ຕິດຢູ່ທາງເບື້ອງຂວາມືຂອງຜູ້ຂັບຂີ່ເພື່ອເຕືອນໃຫ້ຮູ້ວ່າ ເຮົາສາມາດລ້ຽວຂວາໄດ້ແຕ່ຕ້ອງເພີ່ມຄວາມລະມັດລະວັງໃຫ້ຫຼາຍຂື້ນຕື່ມອີກ ເພາະຢ້ານເກີດອຸປະຕິເຫດ ແລະ ຢູ່ແຂວງຕ່າງໆເດເປັນແນວໃດມີຄືກັນບໍ່, ຜູ້ຂຽນຄິດວ່າກໍອາດຈະມີຄືກັນເພາະທົ່ວປະເທດນຳໃຊ້ລະບຽບການສັນຈອນທາງບົກອັນດຽວກັນ, ຈາກຂໍ້ຄວາມຂອງປ້າຍນີ້ຈຶ່ງເຮັດໃຫ້ຜູ້ຂັບຂີ່ສາມາດລ້ຽວຂວາໄດ້ຕະລອດ ບໍ່ເຮັດໃຫ້ລົດຕິດເປັນແຖວຍາວຢຽດຢູ່ຕາມເລນທາງເບື້ອງຂວາມືໃນເມື່ອມີໄຟແດງ,
ການທີ່ເຮົາສາມາດລ້ຽວຂວາໄດ້ຕະຫຼອດ ມັນກໍ່ມີທັງຜົນດີ ແລະ ຜົນເສຍໄປຄຽງຄູ່ກັນປຽບດັ່ງເງົາທຽມຄົນ ຄົນກັບເງົາ ຜົນດີນັ້ນ ເຮັດໃຫ້ຜູ້ທີ່ເດີນທາງສາມາດເດີນທາງທີ່ມີຈຸດປະສົງຢາກລຽ້ວຂວາກໍ່ສາມາດໄປໄດ້ໂດຍທີ່ບໍ່ໄດ້ຢຸດເວລາມີໄຟແດງຢູ່ເບື້ອງໜ້າ, ອີກໜຶ່ງມາ ສາມາດຊ່ວຍລະບາຍລົດທີ່ຢູ່ ເລນທາງເບື້ອງຂວາມືບໍ່ໃຫ້ຕິດເປັນແຖວຍາວຢຽດ ເວລາມີໄຟແດງ. ສ່ວນຜົນເສຍນັ້ນ ການລ້ຽວຂວາໃນຂະນະທີ່ມີລົດຈຳນວນຫຼາຍກຳລັງແລ່ນຕາມລະບົບໄຟອຳນາດທີ່ເຂົາເຈົ້າມີສິດຢ່າງເຕັມປ່ຽມນັ້ນອາດຈະມີຄວາມສ່ຽງພາໃຫ້ເກີດອຸປິຕິເຫດໄດ້,
ແຕ່ແນວໃດກໍ່ຕາມ, ຜູ້ຂຽນສັງເກດເຫັນວ່າ ມາຮອດເວລານີ້ ປ້ານນັ້ນບໍ່ມີອີກແລ້ວ ແລະ ບໍ່ຮູ້ວ່າເພິ່ນຍັງນຳໃຊ້ຢູ່ຫຼືບໍ? ຈະນຳໃຊ້ຫຼືບໍ່ນຳໃຊ້ ກໍຍັງເຫັນວ່າມີລົດຈຳນວນຫຼາຍຍັງລ້ຽວຂວາຕະຫຼອດ ແລະ ເຈົ້າໜ້າທີ່ປະຈຳຢູ່ຈຸດນັ້ນກໍ່ບໍ່ໄດ້ວ່າຫຍັງ, ນັ້ນມັນໝາຍຄວາມວ່າຍັງລ້ຽວໄດ້ຄືເກົ່າ ຖ້າຫາກມີການປ່ຽນ ແປງບໍ່ໃຫ້ລ້ຽວແທ້ ເຈົ້າໜ້າທີ່ເພິ່ນຄົງຮ້ອງເອົາຜູ້ຂັບຂີ່ພາຫະນະທັງຫຼາຍມາຕັກເຕືອນແລ້ວແມ່ນບໍ?
ເຫດຜົົນທີ່ຢິບຍົກຂື້ນມາແລກປ່ຽນນີ້ ຍ້ອນວ່າມີຫຼາຍຄັ້ງເຫັນຜູ້ຂັບຂີ່ຫຼາຍຄົນທີ່ຈະໄປທາງຊື່ຍັງຈອດລົດຕັນທາງລ້ຽວເບື້ອງຂວາເມື່ອມີໄຟແດງທາງໜ້າ ຕາມລະບຽບການສັນຈອນ ລົດຫຼາຍຄັນທີ່ຕ້ອງ ການລ້ຽວຂວາຕ້ອງໄດ້ຈອດນຳຈົນກວ່າໄຟຂຽວຂື້ນຈຶ່ງໄປໄດ້, ເຮັດໃຫ້ລົດຕິດເປັນແຖວຍາວຢຽດ, ແຕ່ຈະວ່າແນວໃດໄດ້ ເພາະລົດທຸກຄັນ ຕ້ອງປະຕິບັດຕາມລະບຽບການສັນຈອນທາງບົກ ເມື່ອມີສັນຍານໄຟແດງຕ້ອງໄດ້ຢຸດລົດຕາມລະບຽບ ຢ່າງເຂັ້ມງວດ,
ດັ່ງນັ້ນ, ເພື່ອເພີ່ມຄວາມຊັດເຈນຂື້ນຕື່ມອີກວ່າຍັງລ້ຽວຂວາໄດ້ຕະຫຼອດ ແຕ່ຕ້ອງລະວັງ ຫຼືວ່າຍຸດໃຊ້ແລ້ວ ເຈົ້າໜ້າທີ່ພາກສ່ວນກ່ຽວຂ້ອງຄວນລົງກວດກາຄືນໃໝ່ ດ້ວຍການຕິດປ້າຍຄືນໃໝ່ໃຫ້ລະອຽດຊັດເຈນ ວ່າ ຍັງລ້ຽວຂວາໄດ້ຕະຫຼອດ ຫຼື ຫ້າມລ້ຽວຂວາເມື່ອເວລາມີໄຟແດງ ມັນຈະເປັນການດີທີ່ສຸດ ເພາະຍັງມີຫຼາຍຄົນອາດບໍ່ເຂົ້າໃຈແທ້ວ່າ ຈະຢຸດ ຫຼື ຈະລ້ຽວດີ, ຫຼຽວເບິ່ງປ້າຍຊີ້ບອກ ກໍ່ບໍ່ມີ ທັງນີ້ກໍ່ເພື່ອຄວາມສະດວກປອດໄພຂອງຜູ້ໃຊ້ລົດໃຊ້ຖະໜົນ ເຮັດໃຫ້ການສັນຈອນມີຄວາມເປັນລະບຽບຮຽບຮ້ອຍ ຫຼີກເວັ້ນການແລ່ນລົດຕາມທາງຄົນຍ່າງ ເມື່ອຢາກລ້ຽວຂວາໃນເວລາມີສັນຍານໄຟແດງ,
ຢ່າງໃດກໍ່ຕາມ ທຸກຄົນທີ່ໃຊ້ລົດໃຊ້ຖະໜົນ ຍ່ອມຮູ້ດີເລື່ອງລະບຽບກົດໝາຍໂດຍສະເພາະແມ່ນ ກົດໝາຍວ່າດ້ວຍການສັນຈອນທາງບົກ, ຜ່ານມາທຸກຄົນກໍ່ປະຕິບັດໄດ້ດີແລ້ວ ສັງຄົມມີຄວາມເປັນລະບຽບຮຽບຮ້ອຍ ແຕ່ກໍຍັງມີສ່ວນໜ້ອຍໜຶ່ງທີ່ຍັງຂາດຄວາມເອົາໃຈໃສ່ປະຕິບັດລະບຽບກົດໝາຍທຸກສະບັບຢ່າງເຂັ້ມງວດ ເມື່ອເປັນເຊັ່ນນັ້ນແລ້ວ ທຸກຄົນຄວນຫັນແນວຄິດແລະພຶດຕິກຳໃໝ່ໃຫ້ໄປຕາມລະບຽບກົດໝາຍບ້ານເມືອງຢ່າງເຂັ້ມງວດ ເຮັດໃຫ້ສັງຄົມມີຄວາມສະຫງົບປອດໄພ ເຊື່ອວ່າພວກເຮົາທຸກຄົນເຮັດໄດ້ຢ່າງແນ່ນອນ
