ເປີດສາກບານສົ່ງໃນຮົ່ມຍິງ-ຊາຍ ຊີງຂັນລັດຖະມົນຕີ ສສກ ຄັ້ງທີ V
ການແຂ່ງຂັນບານສົ່ງໃນຮົ່ມ ຍິງ-ຊາຍ ຊີງຂັນທ່ານລັດຖະມົນຕີກະຊວງສຶກສາທິການ ແລະ ກິລາ (ສສກ) ຄັ້ງທີ V ເປີດສາກຂຶ້ນຢ່າງເປັນທາງການແລ້ວ ໃນວັນທີ 5 ທັນວາ ເພື່ອເປັນການສ້າງຂະບວນການສະເຫລີມສະຫລອງວັນສໍາຄັນຂອງຊາດ ໂດຍສະເພາະວັນຊາດທີ 2 ທັນວາ ຄົບຮອບ 42 ປີ, ໂດຍມີທ່ານ ບົວລານ ສິລິປັນຍາ ຮອງລັດຖະມົນຕີກະຊວງສຶກສາທິການ ແລະ ກິລາ, ທ່ານ ຈັນສະໝອນ ຜ່ອງຈັນທາ ປະທານສະຫະພັນບານສົ່ງແຫ່ງຊາດລາວ ແລະ ທ່ານ ຄໍາສອນ ແພງລັດຕະນະວົງ ຜູ້ອໍານວຍການຝ່າຍຂາຍ ບໍລິສັດເບຍລາວ ຈໍາກັດ ພ້ອມດ້ວຍຄູຝຶກນັກກິລາ ແລະ ກອງເຊຍເຂົ້າຮ່ວມຢ່າງພ້ອມພຽງ.
ໂອກາດດັ່ງກ່າວ, ທ່ານ ຈັນສະໝອນ ຜ່ອງຈັນທາ ປະທານສະຫະພັນບານສົ່ງແຫ່ງຊາດລາວ ກ່າວວ່າ: ອີງຕາມທິດຊີ້ນໍາຂອງ ສສກ ໃນແຜນຜັດທະນາຍຸດທະສາດກິລາລາວ ທາງສະຫະພັນບານສົ່ງແຫ່ງຊາດລາວຈຶ່ງໄດ້ຈັດການແຂ່ງຂັນຄັ້ງນີ້ຂຶ້ນມາ ໂດຍໄດ້ຮັບການອຸປະຖໍາຫລັກຈາກບໍລິສັດເບຍລາວ ເພື່ອສ້າງທັກສະ, ເຕັກນິກຄວາມສາມາດໃຫ້ກັບນັກກິລາບານສົ່ງ ແລະ ກໍາມະການໄດ້ຮັບການພັດທະນາໃຫ້ມີຄວາມເຂັ້ມແຂງ. ພິເສດປີນີ້ຈັດຂຶ້ນທີ່ສະໜາມບານສົ່ງແຫ່ງຊາດລາວ (ຫລັກ 16) ເພື່ອໃຫ້ໄດ້ມາດຕະຖານຫລາຍຂຶ້ນກວ່າເກົ່າ ແລະ ໃກ້ຄຽງກັບສາກົນຫລາຍຂຶ້ນ. ທັງນີ້ກໍຍັງຈັດຂຶ້ນເພື່ອເປັນການເຕົ້າໂຮມຄວາມສາມັກຄີ ລະຫວ່າງຄະນະນໍາ, ນັກສຶກສາ, ນັກກິລາ, ຊາວໜຸ່ມ ແລະ ມວນຊົນໄດ້ມີໂອກາດແລກປ່ຽນປະສົບການເຊິ່ງກັນ ແລະ ກັນ, ພ້ອມທັງເປັນການສ້າງຂະບວນການສະເຫລີມສະຫລອງວັນສໍາຄັນຂອງຊາດ ໂດຍສະເພາະວັນຊາດທີ 2 ທັນວາ ຄົບຮອບ 42 ປີ ແລະ ເປັນການທົດສອບຄວາມສາມາດ ແລະ ການພັດທະນາຂອງນັກກິລາກັບກໍາມະການລາວ.
ສໍາລັບການແຂ່ງຂັນບານສົ່ງຄັ້ງນີ້ມີທັງປະເພດທີມຍິງ ແລະ ທີມຊາຍເຂົ້າຮ່ວມ ເຊິ່ງໄດ້ແຂ່ງຂັນມາແຕ່ວັນທີ 4 ທັນວາ ແລະ ຈະແຂ່ງຂັນໄປຈົນເຖິງວັນທີ 10 ທັນວານີ້ ໂດຍທີມຍິງມີ 5 ທີມເຂົ້າຮ່ວມ, ແຂ່ງແບບພົບກັນໝົດ ເພື່ອຄັດເອົາທີ 1 ແລະ 2 ມາຊີງຊະນະເລີດປະກອບມີ: ສະໂມສອນ ກອງທັບ, ປກສ, ມະຫາວິທະຍາໄລແຫ່ງຊາດ, ນະຄອນຫລວງວຽງຈັນ ແລະ ກົມວິທະຍາສາດ-ປະຫວັດສາດການທະຫານ.
ສ່ວນທີມຊາຍປະກອບມີ 10 ທີມເຂົ້າຮ່ວມ, ແບ່ງເປັນ 2 ສາຍ ແຂ່ງແບບພົບກັນໝົດແລ້ວຄັດເອົາທີ 1 ແລະ 2 ຂອງແຕ່ລະສາຍເຂົ້າຮອບ 4 ທີມສຸດທ້າຍ, ຮອບຮອງ ແລະ ຮອບຊີງຕາມລໍາດັບ ໂດຍປະກອບມີ: ສາຍ A ລາວເດີນອາກາດ, ກອງທັບ, A TEN PRINTING, ຄະນະກະເສດສາດ, ຄະນະເສດຖະສາດ ແລະ ບໍລິຫານທຸລະກິດ (ຄສບ), ສ່ວນສາຍ B ປກສ, ນະຄອນຫລວງວຽງຈັນ, FREEMAN, ແຂວງໄຊຍະບູລີ ແລະ ມະຫາວິທະຍາໄລ ສຸພານຸວົງ ແຂວງຫລວງພະບາງ.
