ກໍາປູເຈຍເຄດຄະເນເສດຖະກິດຂອງປະເທດປີ 2025 ເຕີບໃຫຍ່ໃນລະດັບ 6.3%
ລັດຖະບານກໍາປູເຈຍຍັງມີຄວາມເຊື່ອໝັ້ນວ່າເສດຖະກິດຂອງປະເທດຈະຂະຫຍາຍຕົວໃນລະດັບ 6.3% ໃນປີນີ້.
ພົນເອກ ຮຸນ ມາເນດ ນາຍົກລັດຖະມົນຕີກໍາປູເຈຍ ກ່າວວ່າ: ກໍາປູເຈຍຍັງຮັກສາຄາດຄະເນການເຕີບໃຫຍ່ທາງເສດຖະກິດໃນລະດັບ 6.3% ໃນປີ 2025 ເພີ່ມຂຶ້ນຈາກ 6% ໃນປີ 2024 ແລະ ຄາດວ່າມີທ່າອ່ຽງເຕີບໃຫຍ່ສະເລ່ຍປະມານ 6.5% ຕໍ່ປີໃນໄລຍະກາງ.
ເສດຖະກິດຂອງກໍາປູເຈຍໄດ້ຮັບແຮງໜຸນຕົ້ນຕໍຈາກການສົ່ງອອກເສື້ອຜ້າ, ເກີບ ແລະ ສິນຄ້າເພື່ອການເດີນທາງ, ອຸດສາຫະກໍາທ່ອງທ່ຽວ, ກະສິກໍາ ແລະ ອະສັງຫາລິມະຊັບ ແລະ ການກໍ່ສ້າງ.
ພົນເອກ ຮຸນ ມາເນດ ກ່າວອີກວ່າ: ເສດຖະກິດຂອງກໍາປູເຈຍຈະໄດ້ຮັບແຮງຂັບເຄື່ອນ ຈາກການສົ່ງອອກສິນຄ້າເສື້ອຜ້າ ແລະ ສິນຄ້າທີ່ບໍ່ແມ່ນເສື້ອຜ້າ (non-garment), ຂະແໜງການທ່ອງທ່ຽວ ແລະ ບໍລິການທີ່ເຕີບໃຫຍ່ ຕະຫລອດຈົນຂະແໜງກະສິກໍາທີ່ຂະຫຍາຍຕົວຕໍ່ເນື່ອງ, ສ່ວນຂະແໜງອະສັງຫາລິມະຊັບ ແລະ ການກໍ່ສ້າງນັ້ນ ຄາດວ່າຈະເຕີບໃຫຍ່ໃນທາງບວກ, ແຕ່ຢູ່ໃນລະດັບຊ້າລົງ.
ທ່ານ ຮົງ ວານັກ ຜູ້ອໍານວຍການຝ່າຍເສດຖະສາດລະຫວ່າງປະເທດ ສັງກັດລັດຊະບັນດິດສະຖານແຫ່ງກໍາປູເຈຍ ກ່າວວ່າ: ຂໍ້ຕົກລົງການຄ້າເສລີລະດັບພາກພື້ນ ແລະ ທະວີພາຄີ ມີບົດບາດສໍາຄັນຕໍ່ການສະໜັບສະໜູນການເຕີບໃຫຍ່ຂອງການຄ້າ ແລະ ເສດຖະກິດແບບຍືນຍົງໃນໄລຍະຍາວ ເຊິ່ງຂໍ້ຕົກລົງການຄ້າເຫລົ່ານີ້ ເປີດໂອກາດໃຫ້ກໍາປູເຈຍເຂົ້າເຖິງຕະຫລາດຂະໜາດໃຫຍ່ທີ່ມີປະຊາກອນປະມານ 2,300 ລ້ານຄົນ.
