ຈຳນວນຜູ້ເສຍຊີວິດຈາກໄຊໂຄນ ຖະຫລົ່ມອິນໂດເນເຊຍເພີ່ມເປັນ 41 ຄົນ
ສູນໄພພິບັດອິນໂດເນເຊຍລາຍງານວ່າ: ພາຍຸໄຊໂຄນພັດຖະຫລົ່ມເກາະຊາວາ ເຮັດໃຫ້ມີຜູ້ເສຍຊີວິດ 41 ຄົນ ເພີ່ມຂຶ້ນສອງເທົ່າຈາກທີ່ລາຍງານໄວ້ກ່ອນໜ້ານີ້ ແລະ ບໍ່ມີບ່ອນຢູ່ອີກຫລາຍໝື່ນຄົນຈາກນ້ຳຖ້ວມ ແລະ ດິນເຈື່ອນຮຸນແຮງ.
ໃນຈຳນວນຜູ້ເຄາະຮ້າຍຈາກພາຍຸເຈິມປາກາ ລວມທັງ 25 ຄົນທີ່ເສຍຊີວິດຈາກເຫດດິນເຈື່ອນຢູ່ຊາວາຕາເວັນອອກໃນອາທິດຜ່ານມາ, ພາຍຫລັງມີລາຍງານຈຳນວນຜູ້ເສຍຊີວິດໃນເບື້ອງຕົ້ນ 19 ຄົນ ແລະ ມີຜູ້ບໍ່ມີບ່ອນຢູ່ອາໄສ 28.000 ຄົນໃນອາທິດຜ່ານມາ, ທັງຍັງເຮັດໃຫ້ເຮືອນເກືອບ 5.000 ຫລັງພັງເສຍຫາຍ ແລະ ຈົມຢູ່ໃນນ້ຳອີກຫລາຍກວ່າ 3.000 ຫລັງ. ເຫດພາຍຸຖະຫລົ່ມອິນໂດເນເຊຍມີຂຶ້ນໃນໄລຍະທີ່ເກາະບາຫລີຜະເຊີນພູເຂົາໄຟອາກຸງພົ່ນຂີ້ເຖົ່າ ຕ້ອງອົບພະຍົບປະຊາຊົນຫລາຍໝື່ນຄົນອອກຈາກເຮືອນ. ຫລ້າສຸດພາຍຸເຈິມປາກາເຄື່ອນທີ່ອອກຈາກອິນໂດເນເຊຍແລ້ວ, ແຕ່ເຈົ້າໜ້າທີ່ເຕືອນວ່າອາດມີນ້ຳຖ້ວມ ແລະ ດິນເຈື່ອນຕາມມາອີກ.
