ອຸຍນິເຊບເຕືອນເດັກ 17 ລ້ານຄົນ ສ່ຽງໄພຈາກມົນລະພິດໃນອາກາດ
ອົງການທຶນເພື່ອເດັກແຫ່ງສະຫະປະຊາຊາດ (ອຸຍນິເຊບ) ເຕືອນວ່າ: ເດັກນ້ອຍ 17 ລ້ານຄົນທົ່ວໂລກຢູ່ໃນເຂດທີ່ອາກາດນອກເຮືອນມີມົນລະພິດສູງກວ່າມາດຕະຖານຄວາມປອດໄພເຖິງ 6 ເທົ່າ ເຊິ່ງຈະເປັນອັນຕະລາຍຕໍ່ພັດທະນາການທາງສະໝອງຂອງເດັກ.
ອຸຍນິເຊບລະບຸວ່າ: ຜົນການສຶກສາກັບເດັກອາຍຸຕໍ່າກວ່າ 1 ປີ ໂດຍໃຊ້ຮູບຖ່າຍດາວທຽມຫາພື້ນທີ່ສ່ຽງມົນລະພິດທາງອາກາດພົບວ່າເດັກນ້ອຍກວ່າ 12 ລ້ານຄົນອາໄສຢູ່ໃນອາຊີໃຕ້ ມົນລະພິດທາງອາກາດບໍ່ພຽງເປັນອັນຕະລາຍຕໍ່ພັດທະນາການຂອງປອດເດັກ, ແຕ່ຍັງຈະເຮັດໃຫ້ພັດທະນາການທາງສະໝອງເສຍຫາຍຖາວອນ ສົ່ງຜົນຕໍ່ອະນາຄົດຂອງເດັກເຫລົ່ານີ້. ເຖິງວ່າຍັງບໍ່ມີຜົນວິໄຈທາງວິທະຍາສາດຢືນຢັນ ແຕ່ມີຫລັກຖານທີ່ໜ້າເປັນຫ່ວງເພີ່ມຂຶ້ນເລື້ອຍໆ ເພາະພັດທະນາການທາງສະໝອງໃນໄລຍະ 1.000 ວັນທຳອິດຂອງເດັກມີຄວາມສຳຄັນຕໍ່ການຮຽນຮູ້, ການເຕີບໃຫຍ່ ແລະ ຄວາມສາມາດໃນການມີຊີວິດຕາມຄວາມປາຖະໜາ. ອຸຍນິເຊບເຕືອນອີກວ່າ: ມົນລະພິດທາງອາກາດທີ່ສູງກວ່າເກນຂອງອົງການອະນາໄມໂລກສ່ຽງເປັນອັນຕະລາຍຕໍ່ເດັກ, ເປັນບັນຫາທີ່ໜ້າເປັນຫ່ວງເພີ່ມຂຶ້ນ ເພາະມົນລະພິດທາງອາກາດຮຸນແຮງຂຶ້ນ ເປັນສາເຫດເຮັດໃຫ້ເປັນຫອບຫືດ, ປອດອັກເສບ, ຫລອດລົມອັກເສບ ແລະ ການຕິດເຊື້ອໃນລະບົບທາງເດີນຫາຍໃຈອື່ນໆ.
