ນະຄອນຫລວງພະບາງ ໄດ້ຮັບລາງວັນເລື່ອງລາວຈຸດໝາຍປາຍທາງການທ່ອງທ່ຽວທີ່ຍືນຍົງຂອງໂລກທີ່ດີເດັ່ນ ປີ 2025
ວັນທີ 4 ມີນາ 2025 ນີ້ ຢູ່ນະຄອນຫລວງແບກແລງ, ປະເທດເຢຍລະມັນ ໄດ້ມີການງານມະຫະກຳ ການທ່ອງທ່ຽວໂລກ ITB Berlin 2025 ໂດຍນະຄອນ ຫລວງພະບາງ ໄດ້ຮັບລາງວັນເລື່ອງລາວຈຸດໝາຍປາຍທາງການທ່ອງ ທ່ຽວທີ່ຍືນຍົງຂອງໂລກທີ່ດີເດັ່ນສໍາລັບປີ 2025 (2025 Green Destinations Top 100 Story Awards) ອັນດັບທີ 3 ໃນໝວດ “ການບໍລິຫານຈັດການ ແລະ ຄຸ້ມຄອງຈຸດໝາຍປາຍທາງການທ່ອງທ່ຽວ” ທີ່ຮັບຮູ້ເຖິງຄວາມສໍາເລັດໃນການພັດທະນາການທ່ອງທ່ຽວທີ່ຍືນຍົງ ຫຼື ການປັບປຸງຄືນໃໝ່ໃຫ້ດີຂຶ້ນ, ການຄຸ້ມຄອງການທ່ອງທ່ຽວ ແລະ ການຟື້ນຟູຫລັງວິກິດການ.
ລາງວັນດັ່ງກ່າວ ແມ່ນໝາກຜົນຂອງຄວາມພະຍາຍາມໃນການປົກປັກຮັກສາມໍລະດົກໂລກ ແລະ ພັດທະນາການທ່ອງທ່ຽວ ຂອງອົງການປົກຄອງແຂວງທີ່ເຫັນຄວາມສໍາຄັນໃນການພັດທະນາແບບຍືນຍົງ ພາຍໃນແຂວງ; ທັງແມ່ນຄວາມພາກ ພູມໃຈຂອງຊາວຫລວງພະບາງ ເວົ້າລວມກໍຄືຂອງປະເທດ ເຊິ່ງເປັນການໄດ້ຮັບລາງ ວັນຄັ້ງທໍາອິດຂອງຊາດ ແລະ ເປັນຊາດທຳອິດທີ່ໄດ້ຮັບລາງວັນໃນບັນດາປະເທດ CLMV (ກຳປູເຈຍ, ລາວ, ມຽນມາ ແລະ ຫວຽດນາມ).
ສໍາລັບແຜນທິດທາງປີ 2025 ຫລວງພະບາງ ຈະສຸມໃສ່ປັບປຸງຕາມເງື່ອນໄຂ ແລະ ຕົວຊີ້ວັດໃນແຕ່ລະດ້ານ ເພື່ອສະ ເໜີຂໍການຢັ້ງຢືນຮັບເອົາຫລວງພະບາງເປັນຈຸດໝາຍປາຍທາງການທ່ອງທ່ຽວທີ່ຍືນຍົງ ຈາກອົງການທ່ອງທ່ຽວສີຂຽວ; ເຊິ່ງແມ່ນອົງການນໍາໜ້າໃນດ້ານການຢັ້ງຢືນຄວາມຍືນຍົງ ໃຫ້ແກ່ ຈຸດໝາຍປາຍທາງການທ່ອງທ່ຽວ ແລະ ຜູ້ປະກອບການທຸລະກິດໃນທົ່ວໂລກ ທີ່ຖືກຮັບຮອງໂດຍ ສະພາ ການທ່ອງທ່ຽວໂລກ ຫຼື GSTC.
ສໍາລັບມາດຖານຂອງຈຸດໝາຍປາຍທາງການທ່ອງທ່ຽວແບບຍືນຍົງ ປະກອບມີ 6 ໝວດ ຄື:
1). ການບໍລິຫານຈັດການ ແລະ ຄຸ້ມຄອງຈຸດໝາຍ ປາຍທາງການທ່ອງທ່ຽວ;
2). ທຳມະຊາດ ແລະ ທັດສະນິຍະພາບ;
3). ສິ່ງແວດລ້ອມ ແລະ ສະພາບອາກາດ;
4). ວັດທະນະທຳ ແລະ ຮີດຄອງປະເພນີ;
5).ຄວາມເປັນຢູ່ທີ່ດີຂອງຄົນໃນສັງຄົມ;
6). ການປະກອບທຸລະກິດ ແລະ ການສື່ສານ.
ທີ່ມາ: ຂ່າວສານຫລວງພະບາງ
