ສາທິດການກຽມພ້ອມຕອບໂຕ້ພະຍາດໄຂ້ຫວັດສັດປີກ
ໃນວັນທີ 5-8 ທັນວານີ້, ຂະແໜງສາທາລະນະສຸກ ແລະ ສຸຂະພາບສັດ ໄດ້ຈັດຝຶກອົບຮົມສາທິດເຫດການຈໍາລອງ ໃນການກ້ຽມພ້ອມຕອບໂຕ້ພະຍາດໄຂ້ຫວັດສັດປີກ H5N1 ແລະ H7N9 ຂຶ້ນທີ່ແຂວງຈໍາປາສັກ, ໂດຍການເປັນປະທານຂອງທ່ານ ບຸນຂວາງ ຄໍາບຸນເຮືອງ ຮອງລັດຖະມົນຕີ ກະຊວງກະສິກໍາ ແລະ ປ່າໄມ້ ແລະ ຜູ້ຕາງໜ້າອົງການອາຫານ ແລະ ການກະເສດ FAO, ຊ່ຽວຊານ, ຄູອາຈານ ແລະ ນັກສໍາມະນາກອນ ທີ່ມາຈາກ ສູນກາງ, ແຂວງ ໄຊສົມບູນ, ບໍລິຄໍາໄຊ, ຄໍາມ່ວນ, ສະຫວັນນະເຂດ, ສາລະວັນ, ເຊກອງ ແລະ ອັດຕະປືເຂົ້າຮ່ວມຢ່າງພ້ອມພຽງ.
ເພື່ອໃຫ້ພະນັກງານກ່ຽວຂ້ອງ ມີຄວາມເຂົ້າໃຈ ແລະ ກຽມຄວາມພ້ອມ ໃນການຕອບໂຕ້ພະຍາດໄຂ້ຫວັດສັດປີກ, ພ້ອມທັງກໍານົດຂໍ້ຄົງຄ້າງ ແລະ ສະເໜີຂໍ້ແນະນໍາໃນການປັບປຸງມາດຕະການໂຕ້ຕອບຮ່ວມກັນແບບມີປະສິດທິພາບ ແລະ ທັງເປັນການຮຽນຮູ້ວິທີການເຂົ້າສູ່ບັນຫາ ແລະ ວາງແຜນຕອບໂຕ້ຮ່ວມກັນ ແລະ ແຜນການລົງປະຕິບັດຕົວຈິງ ຢູ່ບ້ານທີ່ມີການລາຍງານສະພາບການລະບາດ.
