ມອບ-ຮັບຫໍພິພິທະພັນແຫ່ງຊາດ.
ພິທີມອບ-ຮັບຫໍພິພິທະພັນແຫ່ງຊາດຫລັງໃໝ່ຊຶ່ງຕັ້ງຢູ່ຫລັກ 6 ຖະໜົນໄກສອນ ພົມວິຫານ, ນະຄອນຫລວງວຽງຈັນ, ໄດ້ມີຈັດຂຶ້ນໃນວັນທີ 1 ທັນວານີ້ລະຫວ່າງທ່ານ ບໍ່ແສງຄໍາ ວົງດາລາ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ທ່ານ ຄຳໄພ ສົມຊະນະ ປະທານກຸ່ມບໍລິສັດຄຳໄພຊະນະກໍ່ສ້າງຈຳກັດຜູ້ດຽວ ແລະ ໂດຍການໃຫ້ກຽດເຂົ້າຮ່ວມຂອງທ່ານຮອງນາຍົກລັດຖະມົນຕີ ສອນໄຊ ສີພັນດອນ.
ທ່ານ ຄຳໄພ ສົມຊະນະ ກ່າວວ່າ: ອາຄານຫໍພິພິທະພັນແຫ່ງນີ້ມີຄວາມຍາວ80 ແມັດ, ກວ້າງ 56 ແມັດ ແລະ ສູງ 29 ແມັດ, ເປັນອາຄານທີ່ອອກແບບ ແລະ ຕົບແຕ່ງດ້ວຍປະຕິມະກຳລວດລາຍເອກະລັກຂອງລາວ ແລະ ມີມູນຄ່າການກໍ່ສ້າງ 10 ລ້ານໂດລາສະຫະລັດ.
ໃນໂອກາດນີ້, ທ່ານລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ມີຄໍາເຫັນວ່າ: ຫໍພິພິທະພັນແຫ່ງຊາດແຫ່ງນີ້, ແມ່ນມີຄວາມໝາຍທາງດ້ານປະຫວັດສາດ ແລະ ເປັນບ່ອນເຕົ້າໂຮມແຫລ່ງວັດຖຸບູຮານຫລາກຫລາຍປະເພດ, ພ້ອມທັງວັດຖຸພັນຕ່າງໆ ອັນເປັນມູນມໍລະດົກອັນລ້ຳຄ່າທາງດ້ານວັດທະນະທຳ ແລະ ປະຫວັດສາດທີ່ບັນພະບູລຸດໄດ້ສ້າງໄວ້ໃນແຕ່ລະຍຸກແຕ່ລະສະໄໝ, ເຊິ່ງສະແດງອອກທາງດ້ານວັດຖຸ ແລະ ຈິດໃຈຂອງປະຊາຊົນລາວບັນດາເຜົ່າທັງຊາດ ແລະ ເປັນບ່ອນສຶກສາຮ່ຳຮຽນ, ປູກຈິດສຳນຶກໃຫ້ອານຸຊົນຄົນຮຸ້ນຫລັງໄດ້ເຂົ້າໃຈເຖິງຮ່ອງຮອຍປະຫວັດສາດ, ຄວາມອຸດົມສົມບູນທາງດ້ານອະລິຍະທຳໄປຄຽງຄູ່ກັບການອະນຸລັກ, ປົກປັກຮັກສາມໍລະດົກອັນລ້ຳຄ່າຂອງຊາດລາວເຮົາໃຫ້ຍືນຍົງ.
ໃນໂອກາດນີ້, ທ່ານຮອງນາຍົກລັດຖະມົນຕີ ສອນໄຊ ສີພັນດອນ ໄດ້ໃຫ້ກຽດປະດັບຫລຽນໄຊແຮງງານຊັ້ນ I ໃຫ້ທ່ານ ຄຳໄພ ສົມຊະນະ ປະທານກຸ່ມບໍລິສັດຄຳໄພຊະນະ ແລະ ທ່ານປະທານບໍລິສັດຈິດຈະເລີນກໍ່ສ້າງຈຳກັດ ທີ່ມີຜົນງານປະກອບສ່ວນເຂົ້າໃນການກໍ່ສ້າງຫໍພິພິທະພັນ ແລະ ຫໍສະໝຸດແຫ່ງຊາດ.
