ບໍລິສັດຈີນພັດທະນາຢາປິ່ນປົວພະຍາດມະເຮັງປອດຊະນິດໃໝ່ ມີປະສິດທິພາບສູງກວ່າຢາຂອງຕາເວັນຕົກ

     ອະກີໂຊ (Akeso) ເຊິ່ງເປັນບໍລິສັດໄບໂອເທັກສັນຊາດຈີນ ທີ່ສ້າງຕັ້ງມາເກືອບສິບປີ ສັ່ນສະເທືອນວົງການການຢາ ດ້ວຍຢາປິ່ນປົວພະຍາດມະເຮັງປອດຊະນິດໃໝ່.

       ສໍານັກຂ່າວຊິນຮົວລາຍງານວ່າ: ໄອໂວເນສຊິແມບ (Ivonescimab) ເປັນຢາຊະນິດໃໝ່ຂອງອະກີໂຊ ເຊິ່ງຜ່ານການທົດລອງຢູ່ຈີນ ແລະ ມີປະສິດທິພາບສູງກວ່າກີທຣູດາ (Keytruda) ຢາປິ່ນປົວພະຍາດມະເຮັງທີ່ພັດທະນາໂດຍເມີກ (Merck) ແລະ ສ້າງລາຍໄດ້ໃຫ້ບໍລິສັດອາເມລິກາ ເຊິ່ງຄອງຕະຫລາດການປິ່ນປົວພະຍາດມະເຮັງຫລາຍກວ່າ 130,000 ລ້ານໂດລາສະຫະລັດ.

       ຂໍ້ມູນທາງຄລີນິກຈາກກອງປະຊຸມພະຍາດມະເຮັງປອດລະດັບໂລກ (World Conference on Lung Cancer) ລະບຸວ່າ: ຄົນເຈັບທີ່ໄດ້ຮັບຢາຊະນິດໃໝ່ຂອງອະກີໂຊສາມາດຢຸດການເຕີບໃຫຍ່ຂອງຊີ້ນຮ້າຍໄດ້ເຖິງ 11.1 ເດືອນ ເຊິ່ງດົນກວ່າຢາກີທຣູດາ ທີ່ມີໄລຍະການຢຸດການເຕີບໃຫຍ່ຂອງຊີ້ນຮ້າຍປະມານ 5.8 ເດືອນ.

       ຕົວແທນຂອງອະກີໂຊກ່າວວ່າ: ການສ້າງສັນນະວັດຕະກໍາໃໝ່ຂອງອະຄີໂຊ ເກີດຈາກຄວາມເຂົ້າໃຈທາງເລິກກ່ຽວກັບຊີວະວິທະຍາຂອງພະຍາດ ແລະ ວິສະວະກໍາໂປຣຕີນ ລວມທັງໄດ້ຮັບຜົນປະໂຫຍດຈາກໄລຍະເວລາການພັດທະນາທີ່ວ່ອງໄວ ແລະ ຊັບພະຍາກອນຜູ້ມີຄວາມຮູ້ຄວາມສາມາດຊັ້ນນໍາຢູ່ຈີນ.

       ໄລຍະ 10 ປີຜ່ານມາ, ກຸ່ມບໍລິສັດເຕັກໂນໂລຊີຊີວະພາບ ຫລື ໄບໂອເທັກຂອງຈີນ ເລີ່ມຕົ້ນຄິດຄົ້ນ ແລະ ພັດທະນາຢາຂັ້ນສູງ ທີ່ສາມາດແຂ່ງຂັນໂດຍກົງກັບຜະລິດຕະພັນຢາຈາກຕາເວັນຕົກເພີ່ມຂຶ້ນ. ພ້ອມທັງລົງນາມຂໍ້ຕົກລົງໃບອະນຸຍາດຫລາຍສະບັບມູນຄ່າຫລາຍພັນລ້ານໂດລາສະຫະລັດກັບບັນດາຫຸ້ນສ່ວນປະເທດຕາເວັນຕົກ ເພື່ອຈັດຈໍາໜ່າຍສູ່ທົ່ວໂລກນໍາອີກ.