WHO ເຝົ້າຕິດຕາມພະຍາດປິດສະໜາຢູ່ຄອງໂກ ມີຜູ້ເສຍຊີວິດແລ້ວ 53 ຄົນ
ອົງການອະນາໄມໂລກເຝົ້າລະວັງພະຍາດປິດສະໜາທີ່ກໍາລັງເກີດຂຶ້ນຢູ່ພາກພື້ນແຫ່ງໜຶ່ງຂອງຄອງໂກ ເຊິ່ງມີຜູ້ເສຍຊີວິດແລ້ວ 53 ຄົນ ພາຍໃນເວລາບໍ່ເທົ່າໃດອາທິດ ແລະ ເລີ່ມຈາກການທີ່ເດັກ 3 ຄົນ ເສຍຊີວິດຢ່າງວ່ອງໄວ ພາຍຫລັງກິນໂຕເຈຍ.
ສໍານັກງານປະຈໍາພາກພື້ນອາຟຣິກາຂອງອົງການອະນາໄມໂລກ (WHO) ລາຍງານວ່າ: ທຸກຝ່າຍທີ່ກ່ຽວຂ້ອງກໍາລັງຕິດຕາມສະຖານະການຢ່າງໃກ້ຊິດ ພາຍຫລັງມີປະຊາຊົນບໍ່ສະບາຍສະສົມຢ່າງໜ້ອຍ 419 ຄົນ ແລະ ເສຍຊີວິດແລ້ວ 53 ຄົນ ຢູ່ຄອງໂກ ໂດຍສ່ວນຫລາຍຢູ່ທາງເໜືອຂອງປະເທດ ນັບແຕ່ວັນທີ 21 ມັງກອນຜ່ານມາ.
ທັງນີ້, ການແຜ່ລະບາດຂອງພະຍາດເລີ່ມຢູ່ບ້ານໂບໂລໂກ ເມື່ອເດັກນ້ອຍ 3 ຄົນ ເສຍຊີວິດພາຍໃນໄລຍະເວລາພຽງ 48 ຊົ່ວໂມງ ແລະ ເດັກທັງສາມຄົນມີປະຫວັດກິນໂຕເຈຍ.
ອາການປ່ວຍທີ່ເກີດຂຶ້ນ ລວມທັງເປັນໄຂ້, ຮາກ ແລະ ມີເລືອດອອກພາຍໃນ ເຊິ່ງອາການເຫລົ່ານີ້ເປັນລັກສະນະຂອງໄຂ້ເລືອດອອກຈາກໄວຣັສ ສ່ວນຫລາຍພົບໃນຄົນເຈັບພະຍາດອີໂບລາ, ໄຂ້ເລືອດອອກ, ມາບູກ ແລະ ໄຂ້ເຫລືອງ.
ເຖິງຢ່າງໃດກໍຕາມ, ຜູ້ຊ່ຽວຊານຕັດການກ່ຽວຂ້ອງພະຍາດເຫລົ່ານີ້ອອກ ພາຍຫລັງຜົນກວດຕົວຢ່າງຫລາຍກວ່າ 12 ລາຍການ ລະບຸເປັນລົບ, ແຕ່ຕົວຢ່າງບາງລາຍການໃຫ້ຜົນເປັນບວກຕໍ່ເຊື້ອໂປຣໂຕຊົວຂອງພະຍາດມາລາເຣຍ ແລະ ຍັງບໍ່ມີຄວາມຈະແຈ້ງວ່າ: ຄົນເຈັບ ແລະ ຜູ້ເສຍຊີວິດຄົນອື່ນກິນໂຕເຈຍ ຫລື ສັດຊະນິດອື່ນໃດ ຫລື ບໍ່.
WHO ເຄີຍລາຍງານໃນປີ 2022 ວ່າ: ທະວີບອາຟຣິກາມີທ່າອ່ຽງເກີດການແຜ່ລະບາດຂອງພະຍາດຕິດຕໍ່ຈາກຄົນສູ່ສັດໃນພື້ນທີ່ ເຊິ່ງຍັງມີການບໍລິໂພກສັດປ່າເພີ່ມຂຶ້ນຫລາຍກວ່າ 60% ໃນໄລຍະຜ່ານມາ.
