ລັດຖະບານຍີ່ປຸ່ນໃຫ້ທຶນຊ່ວຍເຫລືອລ້າ ເພື່ອການສຶກສາຢູ່ລາວ 8.2 ລ້ານໂດລາສະຫະລັດ

ວັນທີ 25 ກຸມພາ 2025 ນີ້, ລັດຖະບານລາວ ແລະ ອົງການຮ່ວມມືສາກົນຍີ່ປຸ່ນ (JICA) ໄດ້ລົງນາມໃນຂໍ້ຕົກລົງການຊ່ວຍເຫລືອລ້າຈາກລັດຖະບານຍີ່ປຸ່ນ 8.2 ລ້ານໂດລາສະຫະລັດ (1.27 ຕື້ເຢນ) ເພື່ອໂຄງການປັບປຸງສູນພັດທະນາຄູໃນ 9 ແຂວງຂອງລາວ ເພື່ອປັບປຸງການອົບຮົມຄູ ແລະ ຄຸນນະພາບການສຶກສາຂັ້ນພື້ນຖານໃນທົ່ວປະເທດ.

ໂຄງການດັ່ງກ່າວມີເປົ້າໝາຍຈະສ້າງລະບົບການຝຶກອົບຮົມໃນການບໍລິການ ໂດຍການສ້າງສູນຝຶກອົບຮົມຄູໃນ 9 ແຂວງທີ່ປັດຈຸບັນບໍ່ມີວິທະຍາໄລສ້າງຄູຄື: ຜົ້ງສາລີ, ອຸດົມໄຊ, ບໍ່ແກ້ວ, ຫົວພັນ, ໄຊຍະບູລີ, ບໍລິຄຳໄຊ, ຄຳມ່ວນ, ເຊກອງ ແລະ ອັດຕະປື. ສູນເຫລົ່ານີ້ຈະເປັນບ່ອນຝຶກອົບຮົມເພື່ອໃຫ້ນັກສຶກສາມີຄວາມສາມາດ ແລະ ຄວາມຮູ້ທີ່ຈຳເປັນເພື່ອເພີ່ມທະວີການສອນ ແລະ ການຮຽນໃນຫ້ອງຮຽນ.

ທີ່ມາ: ໜັງສືພິມ VientianeTimes