ສ້າງໃຫ້ນະຄອນ ຫຼວງພະບາງ ໃຫ້ເປັນນະຄອນ ສະອາດ ສີຂຽວ ແລະ ໜ້າຢູ່ ຄຽງຄູ່ກັບສະຖານະເມືອງມໍລະດົກໂລກ
ໂດຍ: ຜາຕຸງ
ທຸກວັນເຮົາຈະເຫັນຄົນຈຳນວນບໍ່ໜ້ອຍຍັງຖີ້ມຂີ້ເຫຍື້ອຍຈາກຄົວເຮືອນໂດຍສະເພາະ ເຄື່ອງ ປລາສະຕິກຢ່າງຊະຊາຍ ຈົນກາຍເປັນເລື່ອງປົກກະຕິ ສ້າງຜົນກະທົບຕໍ່ສິ່ງແວດລ້ອມ ສັງຄົມກາຍເປັນບັນຫາໃນການເກັບມ້ຽນ ຂີ້້ເຫຍື້ອໃນຕົວເມືອງໃຫຍ່ໆ, ຊຶ່ງອົງກາານປົກຄອງແຕ່ລະຂັ້ນແຕ່ລະທ້ອງຖິ່ນໄດ້ຫຼິງເຫັນຄວາມສຳຄັນຂອງບັນຫາທີ່ຈະຕາມມາຕ່າງກໍມີມາດຕະການແກ້ໄຂທີ່ເໝາະສົມ ເພື່ອເຮັດໃຫ້ຕົວເມືອງມີຄວາມສະອາດງາມຕາແລະໜ້າຢູ່ເຊັ່ນ ຢູ່ນະຄອນຫຼວງວຽງຈັນ, ນະຄອນປາກເຊ, ນະຄອນໄກສອນພົມວິຫານ ແລະ ນະຄອນຫລວງພະບາງເມືອງ ມໍລະດົກໂລກ ແຫ່ງທຳອິດຂອງລາວດັ່ງນີ້ເປັນຕົ້ນ.
ເພື່ອສ້າງສະພາບແວດລ້ອມທີ່ດີ ເປັນເມືອງທີ່ສະອາດ ປາສະຈາກ ສິ່ງເສດເຫລືອຂອງຂີ້ເຫຍື້ອ ໂດຍສະເພາະ ແມ່ນຈຳພວກ ປລາສະຕິກ ສ້າງໃຫ້ເປັນເມືອງທີ່ໜ້າທ່ຽວຊົມຂອງຄົນທັງພາຍໃນ ແລະ ຕ່າງ ປະເທດ ກາງເດືອນກຸມພາ 2025 ຫ້ອງການ ບໍລິການຄຸ້ມຄອງຕົວເມືອງ ຮ່ວມກັບ ກອງທຶນອະນຸລັກທຳມະຊາດໂລກ ປະຈຳ ສປປ ລາວ ໄດ້ລົງນາມກ່ຽວກັບ ແຜນກິດຈະກຳໃນໂຄງການ ພາສຕິກສະມາດ ຊີຕີ ຂຶ້ນ ເພື່ອເປັນການແກ້ໄຂມົນລະພິດ ແລະ ສິ່ງເສດເຫຼືອຈາກປລາສຕິກ.
ທ່ານ ສະເຫວີຍ ສີລາວັນ ຮອງເຈົ້ານະຄອນ ຫຼວງພະບາງ ເວົ້າວ່າ: ປັດຈຸບັນນີ້ການເພີ່ມຂຶ້ນຂອງປະຊາກອນ ແລະ ນັກທ່ອງທ່ຽວ ທີ່ເຂົ້າໄປທ່ຽວຊົມ ນະຄອນຫຼວງພະບາງ ນັບມື້ນັບເພີ່ມຂຶ້ນຢ່າງຫຼວງຫຼາຍ ເຮັດໃຫ້ມີສິ່ງເສດເຫຼືອຈາກປລາສຕິກ ເພີ່ມຂື່ນເປັນຈຳນວນຫຼາຍເຊັ່ນດຽວກັນ ອັນຈະເປັນບັນຫາສົ່ງຜົນກະທົບຕໍ່ສິ່ງແວດລ້ອມ ແລະ ຊີວິດການເປັນຢູ່ຂອງປະຊາຊົນບັນດາເຜົ່າ ທັງກາຍເປັນສິ່ງທ້າທາຍທີ່ທົ່ວສັງຄົມຈະຕ້ອງໄດ້ສຸມໃສ່ແກ້ໄຂໃຫ້ສອດຄ່ອງ ແລະ ເໝາະສົມ ຕາມວິໄສທັດໃນການສ້າງນະຄອນ ຫຼວງພະບາງ ໃຫ້ກາຍເປັນນະຄອນສະອາດ ສີຂຽວ ແລະ ໜ້າຢູ່ ຄຽງຄູ່ກັບການປົກປັກຮັກສາ ເມືອງມໍລະດົກໂລກໃຫ້ຍືນຍົງ.
ອີງຕາມຜົນການປະເມີນເບື້ອງຕົ້ນ ທົ່ວນະຄອນ ຫຼວງພະບາງ ມີປະຊາກອນ 97,716 ຄົນ ມີປະລິມານຂີ້ເຫຍື້ອເກີດຂຶ້ນໃນປີ 2022 ສູງເຖິງ 94 ໂຕນຕໍ່ວັນ ສາມາດເກັບມ້ຽນໄດ້ 83 ໂຕ່ນຕໍ່ວັນ, ສາມາດເກັບ ແລະ ຄຸ້ມຄອງຂີ້ເຫຍື້ອ ຢ່າງຖືກຕ້ອງຢູ່ສະໜາມຂີ້ເຫຍື້ອໄດ້ພຽງ 2 ໂຕນຕໍ່ວັນເທົ່ານັ້ນ ສະເລ່ຍແລ້ວ ຄົນໜຶ່ງໄດ້ຜະລິດຂີ້ເຫຍື້ອເກືອບ 1 ກິໂລຕໍ່ມື້; ມາຮອດປີ 2023 ມີປະລິມານຂີ້ເຫຍື້ອສະສົມຢູ່ສະໜາມຂີ້ເຫຍື້ອຫຼາຍກວ່າ 30,800 ໂຕ່ນ ແລະ ຈາກບັນຫາທັງໝົດນີ້ ໂຄງການ ປລາສຕິກ ສະມາດຊີຕີ ຈຶ່ງກາຍເປັນຈຸດລິເລີ່ມ ໃນການແກ້ໄຂ ແລະ ຫລຸດຜ່ອນມົນລະພິດ ພາຍໃນນະຄອນ ຫຼວງພະບາງ ໃຫ້ໄດ້ຮັບຜົນດີ.
ເມືອງຫຼວງພະບາງ ແຂວງ ຫຼວງພະບາງ ໄດ້ຮັບການຈົດເຂົ້າເປັນມໍລະດົກຂອງໂລກໃນວັນທີ 9 ທັນວາ 1995 ຢູ່ກອງປະຊຸມ ຄະນະກໍາມະການ ມໍລະດົກໂລກ ຄັ້ງທີ່ 19 ທີ່ ເມືອງ ແບກແລງປະເທດ ສາທາ ລະນະລັດ ເຢຍລະມັນ, ເກືອບ30ປີແລ້ວ ທີ່ໄດ້ເປັນເມືອງມໍລະດົກໂລກ ນະຄອນຫຼວງພະບາງຍັງຮັກສາໄດ້ວັດທະນະທຳ ຮີດຄອງປະເພນີ ວິຖີການດຳລົງຊີວິດຂອງປະຊາຊົນ ແລະ ຮ່ອງຮອຍປະຕິມະກຳ ຫໍໂຮງ ເຮືອນຊານລານແປ້ນຕາມແບບສະບັບຂອງຄົນຮຸ່ນກ່ອນໄວ້ຕະຫຼອດມາ ຈົນໄດ້ຮັບການຍົກຍ້ອງຈາກວາລະສານຕ່າງໆຂອງໂລກຫຼາຍປີລຽນຕິດເປັນຕົ້ນ ເມືອງຍອດນິຍົມການທ່ອງທ່ຽວຈາກວາລະ ສານວັດເດີລັດ, ເມືອງປອດຄັວນຢາສູບຂອງອາຊຽນ, ເມືອງສີ່ງແວດລ້ອມທີ່ຍືນຍົງຂອງອາຊຽນ ແລະ ຫຼ້າສຸດ ກາງເດືອນຕຸລາປີ 2024ຜ່ານມາ ກໍໄດ້ຮັບລາງວັນ “ໜຶ່ງຮ້ອຍເລື່ອງລາວຈຸດໝາຍປາຍທາງການທ່ອງທ່ຽວແບບຍືນຍົງຂອງໂລກ” ປະຈຳປີ 2024
ທັງໝົດນີ້ ສົມຄວນຕໍ່ການຈັດຕັ້ງປະຕິບັດ ໃນການຮ່ວມມືແກ້ໄຂບັນຫາສິ່ງເສດເຫຼືອ ປລາສຕິກໃຫ້ຖືກກຳຈັດຢ່າງມີປະສິດທິພາບສູງ ສ້າງນະຄອນ ຫຼວງພະບາງ ໃຫ້ກາຍເປັນນະຄອນສະອາດ ສີຂຽວ ແລະ ໜ້າຢູ່ ຄຽງຄູ່ກັບການປົກປັກຮັກສາ ເມືອງມໍລະດົກໂລກໃຫ້ຍືນຍົງ.
