ຈັບສະຫລາກແບ່ງສາຍບານໂລກ 2018 ສະເປນພົບໂປຕຸເກດ-ອັງກິດພົບເບວຢ້ຽມ
ຈັບສະຫລາກແບ່ງສາຍບານເຕະໂລກ 2018 ອັງກິດ ດີໃຈພົບວຽກເບົາຫລັງຖືກຈັບໄປຢູ່ກຸ່ມ G ຮ່ວມກັບ ເບວຢ້ຽມ, ປານາມາ ແລະ ຕູນີເຊຍ, ສ່ວນ ສະເປນ ເຈັບໜັກຫລັງຈັບຖືກ ໂປຕຸເກດ, ເຢຍລະມັນ ແຊ້ມເກົ່າ ຕ້ອງພົບກັບ ສະວີເດນ.
ພິທີຈັບສະຫລາກແບ່ງສາຍບານເຕະໂລກ 2018 ຢູ່ເຄຣມຣິນ ພາເລດ ຄອນເສີດຮໍ ນະຄອນຫລວງມົດສະກູ ປະເທດຣັດເຊຍ ໃນວັນທີ 1 ທັນວາ ຜົນປາກົດວ່າ: ຣັດເຊຍ ປະເທດເຈົ້າພາບໂອກາດເຂົ້າຮອບສົດໃສ ເມື່ອຖືກຈັບໄປຢູ່ໃນກຸ່ມ A ຮ່ວມກັບ ອາຣັບບີ ຊາອຸດິດ, ອຸຣຸໄກວ ແລະ ເອຢິບ ເຊິ່ງເປັນກຸ່ມທີ່ບໍ່ໜັກຫລາຍ ໂດຍເກມເປີດສະໜາມ ຣັດເຊຍ ຈະພົບກັບ ອາຣັບບີ ຊາອຸດິດ ໃນວັນທີ 14 ມິຖຸນາປີໜ້າ.
ສ່ວນ ເຢຍລະມັນ ແຊ້ມບານໂລກ 2014 ຖືກຈັບໄປຢູ່ໃນກຸ່ມ F ຮ່ວມກັບ ແມັກຊິໂກ, ສະວີເດນ ແລະ ສ.ເກົາຫລີ. ທາງດ້ານ ເບຣຊິນ ອີກໜຶ່ງທີມສຳຄັນຢູ່ໃນກຸ່ມ E ຮ່ວມກັບ ສະວິດເຊີແລນ, ຄອສຕາຣິກາ ແລະ ເຊີເບຍ.
ຂະນະທີ່ ອັງກິດ ໂຊກດີຢູ່ໃນກຸ່ມທີ່ບໍ່ແຂງຫລາຍ ໂດຍຢູ່ໃນກຸ່ມ G ຮ່ວມກັບ ເບວຢ້ຽມ, ປານາມາ ແລະ ຕູນີເຊຍ, ສ່ວນ ສະເປນ ແຊ້ມໂລກ 2010 ພົບງານໜັກເມື່ອຕ້ອງຢູ່ກຸ່ມ B ຮ່ວມກັບ ໂປຕຸເກດ ແຊ້ມຢູໂຣ 2016, ໂມຣັອກໂກ ແລະ ອີຣານ.
ສະຫລຸບຜົນການຈັບສະຫລາກແບ່ງສາຍບານເຕະໂລກ 2018 ທີ່ປະເທດຣັດເຊຍ ກຸ່ມ A ຣັດເຊຍ, ອາຣັບບີ ຊາອຸດິດ, ເອຢິບ,ອຸຣຸໄກວ. ກຸ່ມ B ໂປຕຸເກດ, ສະເປນ, ໂມຣັອກໂກ, ອີຣານ. ກຸ່ມ C ຝຣັ່ງ, ອົດສະຕຣາລີ, ເປຣູ, ເດັນມາກ. ກຸ່ມ D ອາເຈນຕິນາ, ໄອແລນ, ໂຄຣເອເຊຍ, ໄນຈີເຣຍ. ກຸ່ມ E ເບຣຊິນ, ສະວິດ, ຄອສຕາຣິກາ, ເຊີເບຍ. ກຸ່ມ F ເຢຍລະມັນ, ແມັກຊິໂກ, ສະວີເດນ, ສ.ເກົາຫລີ. ກຸ່ມ G ເບວຢ້ຽມ, ປານາມາ, ຕູນີເຊຍ, ອັງກິດ. ກຸ່ມ H ໂປແລນ, ເຊເນກັສ, ໂຄລົມເບຍ, ຍີ່ປຸ່ນ.
ສຳລັບພິທີຈັບສະຫລາກຄັ້ງນີ້ມີ ແກຣີ ລິນິເກີ ອະດີດກອງໜ້າທີມຊາດອັງກິດ ເຮັດໜ້າທີ່ເປັນພິທີກອນຮ່ວມກັບ ມາເຣຍ ໂຄມັນນາຢາ ນັກຂ່າວກິລາສາວຊາວຣັດເຊຍ. ຂະນະທີ່ຕຳນານນັກເຕະ 8 ຄົນທີ່ຈັບສະຫລາກປະກອບມີ ນິກິຕາ ຊິໂມນຽນ ອະດີດກອງໜ້າທີມຊາດສະຫະພາບໂຊວຽດ ທີ່ປັດຈຸບັນອາຍຸ 91 ປີ ແລະ ອີກ 7 ຕົວແທນຈາກປະເທດທີ່ເຄີຍຄວ້າແຊ້ມໂລກຄື ໂລຣອງ ບລອງ (ຝຣັ່ງ), ກໍຣ໌ດອນ ແບງ (ອັງກິດ), ດີເອໂກ ມາຣາໂດນາ (ອາເຈນຕິນາ), ຄາຟູ (ເບຣຊິນ), ຟາບິໂອ ຄັນນາວາໂຣ (ອີຕາລີ), ກາເລສ ປູໂຢລ (ສະເປນ) ແລະ ດີເອໂກ ຟໍຣ໌ລັນ (ອຸຣຸໄກວ).
