ນໍ້າໃຈນັກກິລາ ຢ່າໃຫ້ອາລົມຊົ່ວວູບມາຕັດສິນອະນາຄົດ
ໂດຍ : ຜາຕຸງ
ໃນເວທີການຕໍ່ສູ້ເພື່ອຄວາມເປັນໜຶ່ງນັກກິລາ ບໍ່ວ່າຈະກິລາທາງບົກ ທາງອາກາດ ແລະ ທາງນ້ຳ ແຕ່ລະປະເພດກິລາທີ່ແຂ່ງຂັນ ນັກກິລາແຕ່ລະຄົນ ຈະໃຊ້ຄວາມສາມາດ ປະຕິພານໄຫວພິບທຸກຢ່າງ ເພື່ອຫວັງເອົາຊະນະຄູ່ຕໍ່ສູ້, ແຕ່ເຂົາກໍຈະດຳເນີນໄປ ຕໍ່ສູ້ໄປພາຍໃຕ້ກົດກະຕິກາຂອງກິລາຊະນິດນັ້ນ,ຈະບໍ່ທຳຜິດເປັນເດັດຂາດ ດ້ວຍການເຄົາລົບຄູ່ຕໍ່ສູ້ ແລະ ລະບຽບກະຕິກາຢ່າງເຂັ້ມງວດ ເຖິງຈະເສຍເຂົາກໍພູມໃຈ ຫຼືຈະແພ້ເຂົາກໍ່ຍິ່ງພູມໃຈກັບໄຊຊະນະທີ່ໄດ້ມາ.
ໃນສະໜາມກິລາເຕະບານກໍເຊັ່ນດຽວກັນ ນັກກິລາທຸກຄົນຕ່າງກໍທຸ່ມເທເພື່ອໄຊຊະນະຂອງທິມຕົນ ແຕ່ການເເຂ່ງກິລາບານເຕະ ໃນແຕ່ລະທີມມີນັກກິລາຫຼາຍຄົນ ດັ່ງນັ້ນການຫຼິ້ນການແຂ່ງຂັນຕ້ອງໃຊ້ເຕັກນິກຢຸດທະວິທີຕ່າງໆປະສົມປະສານກັບການຫຼິ້ນແບບເປັນທີມ ຖ້າເຮັດໄດ້ດີກໍນຳໄປສູ່ໄຊຊະນະ ຫຼື ຢ່າງໜ້ອຍກໍສະເໝີ ກົງກັນຂ້າມ ຖ້າເຕັກນິກ ພິບໄຫວ ຫືການຫຼິ້ນເປັນທີມເຮັດບໍ່ໄດ້ດີ ບາງທີກໍປະລາໄຊ ຈະອາໄສເຕັກນິກສະເພາະຕົວຂອງນັກກິລາພຽງຢ່າງດຽວບໍ່ສາມາດນຳໄປສູ່ໄຊຊະນະໄດ້.
ຍ້ອນມີຄົນຫຼາຍ ຫຼາຍເຖິງ 20 ຄົນ ຍາດເອົາບານພຽງໜ່ວຍດຽວກັນແລ້ວນຳໄປສູ່ເປົ້າໝາຍສຸດທ້າຍຄືຍິງປະຕູຄູ່ຕໍ່ສູ້ ຍິ່ງໃນເວລາທີມຂອງຕົນເປັນຝ່າຍເສຍປຽບຍິ່ງເພີ່ມຄວາມລະມັດລະວັງເປັນພິເສດ ເພື່ອບໍ່ໃຫ້ຕົກເປັນຝ່າຍເສຍປຽບຫຼາຍກວ່າເກົ່າ, ດັ່ງນັ້ນນັກກິລາທຸກຄົນຕ້ອງຍອມຮັບຄວາມກົດດັນ ແລະ ຄວບຄຸມອາລົມ ຕັ້ງສະມາທິໃນເກມການແຂ່ງຂັນໃຫ້ໄດ້ ສຳຄັນແມ່ນປະຕິບັດຕາມກົດກະຕິກາໃຫ້ເຂັ້ມງວດ, ມັນເປັນເລື່ອງປົກກະຕິ ທີ່ເກີດມີການກະທົບກະ ແທກກັນ ໃນເກມການແຂ່ງຂັນ ແຕ່ກໍ່ຕ້ອງເບິ່ງວ່າເກີດຈາກເຈດຕະນາຕັ້ງໃຈກະທຳຫຼືເກີດຈາກຄວາມບັງເອີນໃນເກມ.
ຜູ້ຂຽນຂໍຍົກເອົາບາງຕົວຢ່າງທີ່ເກີດຂື້ນໃນເກມການແຂ່ງຂັນ ເຕະບານຊີແຊ້ມ ເປບຊີລາວລີກ1ເມື່ອວັນທີ 8 ກຸມພາ ເຊິ່ງເປັນການແຂ່ງຂັນ ລະຫວ່າງ ສະໂມສອນ EZRA FC ພົບກັບ ສະໂມ ສອນ MASTER 7, ໃນນາທີ 90+2 ຂອງໄລຍະຕໍ່ເວລາ ເກີດເຫດການທີ່ບໍ່ສົມຄວນ ເມື່ອຜູ້ຫຼິ້ນ ຕີສອກໃສ່ຄູ່ແຂ່ງເຮັດໃຫ້ບາດເຈັບລົ້ມລົງໃນສະໜາມ ຈົນກຳມະການຕັດສິນໃຫ້ໃບແດງໃຫ້ອອກຈາກເກມການແຂ່ງຂັນ ເຊິ່ງຜົນການແຂ່ງຂັນ ແມ່ນສະໂມສອນ EZRA FC ໄລ່ຕີສະເໝີ ສະໂມສອນ MASTER 7 1 ປະຕູຕໍ່ 1.
ຈາກເຫດການນັ້ນ ໄດ້ກາຍເປັນກະແສໃຫ້ສັງຄົມວິພາກວິຈານຕໍ່ການກະທຳທີ່ບໍ່ເໝາະສົມຂອງນັກກິລາຄົນນັ້ນຢ່າງກວ້າງຂວາງ ເຊິ່ງເປັນການກະທຳຜິດຕໍ່ກົດກິລາຢ່າງຮ້າຍແຮງ ຕ້ອງໃສ່ໂທດຫ້າມລົງແຂ່ງຂັນລະດັບສະໂມສອອນ, ນິໄສໃຈຄໍ ບໍ່ສົມເປັນນັກກິລາເຕະບານ ເໝາະສົມເປັນນັກມວຍອາດດີກວ່າ, ເປັນນັກກິລາຕ້ອງຮູ້ແພ້ ຮູ້ເສຍບໍ່ແມ່ນໃຊ້ແຕ່ອາລົມ, ຫ້າມລົງແຂ່ງຂັນຕະຫຼອດໄປ ແລະ ອື່ນໆອີກຫຼາຍຢ່າງ, ແນ່ນອນວ່າໃນເກມແຂ່ງຂັນນັກກິລາທຸກຄົນຕ້ອງຍອມຮັບຄວາມກົດດັນ ທັງໃນຕົວ ແລະ ນອກຕົວແລະ ບາງກໍລະນີບໍ່ສາມາດຄວບຄຸມອາລົມໄດ້ ມັນເປັນເລື່ອງປົກກະຕິ ທີ່ມີການກະທົບກະແທກກັນ ໃນເກມການແຂ່ງຂັນ ບາງຄັ້ງກໍ່ເກີດຈາກເຈດຕະນາຕັ້ງໃຈກະທຳ ຫຼື ບາງເທື່ອກໍ່ເກີດຈາກຄວາມບັງ ເອີນໃນເກມກໍມີ ຊຶ່ງທຸກໆປະເພດກິລາທີ່ແຂ່ງຂັນຍ່ອມມີຄືກັນໝົດ ບໍ່ສະເພາະແຕ່ເຕະບານ, ຫາກເມື່ເກີດຂື້ນແລ້ວຈະແກ້ໄຂແນວໃດ.
ແນວໃດກໍຕາມ, ພາຍຫລັງຈົບການແຂ່ງແຂ່ງ ນັກກິລາຄົນດັ່ງກ່າວ ໄດ້ອອກມາໂພສກ່າວຂໍໂທດຜ່ານ ເຟສບຸກສ່ວນຕົວ ເຊິ່ງກໍນັບວ່າເປັນການກະທຳທີ່ຖືກຕ້ອງດີແລ້ວ ທີ່ກະທຳຜິດແລ້ວຮູ້ອອກມາຂໍໂທດຕໍ່ສິ່ງທີ່ເກິດຂຶ້ນ ເພື່ອບໍ່ໃຫ້ເປັນແບບຢ່າງທີ່ບໍ່ດີຕໍ່ເຊົາວະຊົນ ແຕ່ລະບຽບວິໃນກໍຕ້ອງຖືກປະຕິບັດລົງໂທດ.
ເຮົາຕ້ອງເຂົ້າໃຈວ່າ ກິລາບານເຕະໃນບ້ານເຮົາເມືອງເຮົາປັດຈຸບັນນີ້ຍັງເປັນການແຂ່ງຂັນໃນສະດັບລະໂມສອນ ເປັນເຄິ່ງອາຊີບຍັງບໍ່ທັນແມ່ນ ລະດັບອາຊີບຢ່າງແທ້ຈິງ ແລະ ຄິດວ່າຈະກາຍເປັນອາຊີບບໍ່ຊ້າກໍໄວເພື່ອກ້າວໄປສູ່ຈຸດນັ້ນ ນັກກິລາທຸກຄົນທຸກປະເພດ ຕ້ອງຝຶກຝົນຫຼໍ່ຫຼອມຕົນໃຫ້ກາຍເປັນນັກກິລາທີ່ມີລະບຽບວິໄນອັນເຂັ້ມງວດ ຮູ້ແພ້ ຮູ້ເສຍ ຮູ້ຮັບຜິດຊອບໃນການກະທຳຂອງຕົນເອງຕໍ່ສັງຄົມຕໍ່ປະເທດຊາດ ຫຼິ້ນກິລາ ພາຍໃຕ້ຄຳຂວັນ ກິລາ ສຸຂະພາບ, ສາມັກຄີ, ມິດຕະພາບ ສັນຕິພາບ.
