ໄອຍະການດັດສືບສວນຄະດີ ນາຍພົນຂ້າຕົວຕາຍໃນສານ UN
ໄອຍະການຂອງໂຮນລັງໃຫ້ນ້ຳໜັກກັບຄວາມບົກຜ່ອງຂອງມາດຕະການຮັກສາຄວາມປອດໄພ ໃນການສືບສວນ-ສອບສວນການເສຍຊີວິດຂອງອະດີດນາຍພົນຊາວໂຄແອດ ໜຶ່ງໃນຈຳເລີຍສຳຄັນຂອງອະດີດສົງຄາມບອສນີ ເຊິ່ງດື່ມຢາພິດຕໍ່ໜ້າຜູ້ພິພາກສາສານພິເສດຂອງສະຫະປະຊາຊາດ.
ສຳນັກຂ່າວຕ່າງປະເທດລາຍງານຈາກນະຄອນຫລວງເຮກ ປະເທດໂຮນລັງ ໃນວັນທີ 1 ທັນວາວ່າ: ນາງ ມາຣິລີນ ຟິເຄນເຊີ ໄອຍະການກາງຂອງໂຮນລັງ ກ່າວໃນວັນທີ 30 ພະຈິກ ກ່ຽວກັບຄວາມຄືບໜ້າໃນການສືບສວນ-ສອບສວນເຫດການທີ່ ພົນເອກ ສາໂລໂບດັນ ປຣາລຍັດ ດື່ມຢາພິດຕໍ່ໜ້າຄະນະຜູ້ພິພາກສາອາຍາສາກົນເພື່ອອະດີດຢູໂກສະລາວີ (ICTY) ຢູ່ນະຄອນຫລວງເຮກ ຫລັງຮັບຊາບຄຳພິພາກສາຍື່ນບົດລົງໂທດຈຳຄຸກ 20 ປີ ໃນວັນທີ 29 ພະຈິກ ກ່ອນທີ່ຕໍ່ມາອະດີດຜູ້ບັນຊາການກອງກຳລັງບອສນີ-ໂຄແອດ ເສຍຊີວິດຢູ່ໂຮງໝໍ ດ້ວຍອາຍຸ 72 ປີ ວ່າຜົນການກວດສອບສານທີ່ຢູ່ໃນແກ້ວເບື້ອງຕົ້ນພົບວ່າເປັນ “ສານເຄມີທີ່ມີອັນຕະລາຍເຖິງແກ່ຊີວິດ”.
ຂະນະທີ່ສື່ທ້ອງຖິ່ນຫລາຍແຫ່ງຂອງໂຮນລັງລາຍງານວ່າ: ການທີ່ຜູ້ຕ້ອງຫາສ່ວນຫລາຍຂອງ ICTY ມີອາຍຸຫລາຍແລ້ວຈຶ່ງມີສຸຂະພາບຊຸດໂຊມຕາມໄວ ຖືວ່າບໍ່ແມ່ນເລື່ອງແປກທີ່ ພົນເອກ ປຣາລຍັດ ສາມາດນຳຢາພິດຕິດຕົວເຂົ້າໄປນຳໄດ້ ແລະ ອ້າງກັບເຈົ້າໜ້າທີ່ຮັກສາຄວາມປອດໄພ ວ່າເປັນຢາປິ່ນປົວປະຈຳຕົວ.
