9 ພຶດຕິກໍາທີ່ສ້າງໃຫ້ລູກເສຍນິໄສ
December 1, 2017 - 11:59 AM
- ປ່ອຍໃຫ້ລູກບໍ່ໄດ້ກິນອາຫານເຊົ້າ: ອາຫານເຊົ້າສໍາລັບເດັກນ້ອຍຈໍາເປັນຫຼາຍ ເພາະການກິນອາຫານເຊົ້ານັ້ນຈະມີປະໂຫຍດຕໍ່ສະໝອງຂອງລູກ, ຊ່ວຍໃຫ້ສະໝອງຮຽນຮູ້ໄດ້ດີ ແລະ ຖ້າປ່ອຍໃຫ້ລູກຫິວ ລູກກໍຈະສົນໃຈເຂົ້າໜົມຫວານກິນຫຼາຍກວ່າເຂົ້າ ແລ້ວພຶດຕິກໍາເຫຼົ່ານີ້ຈະເຮັດໃຫ້ລູກຕິດເປັນນິໄສການກິນທີ່ບໍ່ດີ ຕິດກິນແຕ່ເຂົ້າໜົມ ທີ່ຈະເຮັດໃຫ້ຮ່າງກາຍໄດ້ຮັບສານອາຫານໜ້ອຍ ສົ່ງຜົນບໍ່ດີຕໍ່ຮ່າງກາຍ ແລະ ການຮຽນຮູ້ຂອງເດັກນ້ອຍໄດ້.
- ປ່ອຍໃຫ້ລູກກິນເຄື່ອງດື່ມລົດຫວານ ຫຼື ນໍ້າອັດລົມຊະນິດຕ່າງໆ: ເຄື່ອງດື່ມເຫຼົ່ານີ້ບໍ່ມີປະໂຫຍດຕໍ່ເດັກນ້ອຍເລີຍ ເພາະມີນໍ້າຕານຫຼາຍທີ່ໃຫ້ພະລັງງານເກີນຄວາມຕ້ອງການຂອງຮ່າງກາຍ ເມື່ອກິນຫຼາຍກໍຈະສະສົມເປັນໄຂມັນ ແລະ ເກີດພະຍາດຕຸ້ຍໃນເດັກຕາມມາໄດ້ ແລະ ໃນນໍ້າອັດລົມຍັງມີແກັສທີ່ໄປທໍາຮ້າຍກະເພາະ ແລະ ລໍາໄສ້.
- ປ່ອຍໃຫ້ລູກນັ່ງກິນເຂົ້າ ຫຼື ນັ່ງຫຼິ້ນຄົນດຽວ: ນັກວິໄຈພົບວ່າເດັກນ້ອຍທີ່ນັ່ງກິນເຂົ້າພ້ອມໜ້າພ້ອມຕາກັບຄອບຄົວທຸກມື້ ຈະມີພາວະໂພຊະນາການທີ່ດີກວ່າເດັກນ້ອຍທີ່ນັ່ງກິນເຂົ້າຄົນດຽວ ເພາະການກິນອາຫານກັບຄອບຄົວ ຈະຊ່ວຍໃຫ້ພໍ່ແມ່ຄວບຄຸມເລື່ອງປະລິມານອາຫານການກິນຂອງລູກໄດ້ ໂດຍສະເພາະລູກທີ່ເລືອກກິນ ຫຼື ກິນໜ້ອຍ.
- ປ່ອຍໃຫ້ລູກເບິ່ງໂທລະພາບ ຫຼື ຫຼິ້ນໂທລະສັບມືຖືຫຼາຍເກີນໄປ.
- ປ່ອຍໃຫ້ລູກກິນເຂົ້າໜົມກອບ, ຫວານ ຫຼື ອາຫານທີ່ບໍ່ມີປະໂຫຍດຫຼາຍເກີນໄປເຊັ່ນ: ມັນຝຣັ່ງທອດ, ຊ໊ອກໂກແລັດ, ກະແລ້ມ, ເຂົ້າໜົມທີ່ມີລົດຫວານ ໃນປະລິມານຫຼາຍເກີນໄປ ຫຼື ເອົາໃຈໃຫ້ລູກກິນທຸກມື້ ຈະເປັນການທໍາລາຍສຸຂະພາບຮ່າງກາຍຂອງລູກໂດຍບໍ່ຮູ້ຕົວ.
- ບໍ່ປ່ອຍໃຫ້ລູກຫຼິ້ນຫຼັງເລີກໂຮງຮຽນ: ຄວນຫາກິດຈະກໍາທີ່ໄດ້ເຄື່ອນໄຫວໃຫ້ລູກໄດ້ຫຼິ້ນ ເພື່ອຊ່ວຍຜ່ອນຄາຍກ້າມຊີ້ນ, ເຮັດໃຫ້ສະໝອງປອດໂປ່ງ, ດີຕໍ່ສຸຂະພາບລູກນຳອີກ.
- ບໍ່ປ່ອຍໃຫ້ລູກຍ່າງເອງ: ລູກໃຫຍ່ພໍທີ່ຈະຍ່າງໄດ້ເອງແລ້ວ ພໍ່ແມ່ຄວນປ່ອຍໃຫ້ລູກໄດ້ຍ່າງຫຼາຍກວ່າລົງນັ່ງໃນລໍ້ ເພາະການຍ່າງຖືເປັນການອອກກໍາລັງກາຍທີ່ດີຕໍ່ສຸຂະພາບ.
- ບໍ່ປ່ອຍໃຫ້ລູກຫຼິ້ນກິລາ: ການຫຼິ້ນກິລານອກຈາກຈະຊ່ວຍເສີມສ້າງຮ່າງກາຍໃຫ້ລູກແຂງແຮງ ຍັງດີຕໍ່ພັດທະນາການດ້ານເຄື່ອນໄຫວຂອງລູກ ແລະ ກິລາຈະເປັນກິດຈະກໍາທີ່ຊ່ວຍເຝິກໃຫ້ລູກຮູ້ຈັກເຂົ້າສັງຄົມຮ່ວມກັບຄົນອື່ນໄດ້ດີ ແລະ ບໍ່ເຮັດໃຫ້ລູກມີອາການຄຽດ.
- ບໍ່ຄວນພາລູກອອກໄປກິນເຂົ້ານອກບ້ານຕະຫຼອດ: ຖ້າພາໄປຕະຫຼອດອາດຈະກາຍເປັນການສົ່ງເສີມນິໄສທີ່ຟຸມເຟືອຍ ແລະ ການກິນເຂົ້ານອກບ້ານເປັນປະຈໍາ ເຮັດໃຫ້ເດັກຈະເລີນອາຫານຫຼາຍເກີນໄປ ແລະ ການກິນເຄັມ ຫຼື ລົດຊາດທີ່ຈັດເກີນໄປກໍຈະສົ່ງຜົນເສຍຕໍ່ສຸຂະພາບລູກໄດ້.
