ຫລຸດຄວາມສ່ຽງໄດ້ຫລາຍພະຍາດໂດຍການກິນຖົ່ວ

ນັກວິໄຈພົບວ່າການກິນຖົ່ວ ສາມາດຫລຸດຄວາມສ່ຽງເສຍຊີວິດຈາກຫລາຍພະຍາດໄດ້ ໂດຍສະເພາະແມ່ນຫາກກິນໄດ້ທຸກມື້ໃນປະລິມານເຄິ່ງຝາມື. ນັກວິໄຈຍັງພົບຕື່ມວ່າ : ການກິນໝາກຖົ່ວອາວມັອນ, ຖົ່ວເຮເຊວນັດ, ແກ່ນໝາກມ່ວງຫິມະພານ, ໝາກຖົ່ວວອນນັດ ລ້ວນແຕ່ໃຫ້ຜົນດີຕໍ່ສຸຂະພາບທັງໝົດ.

ຄົນທີ່ກິນຖົ່ວໃນປະລິມານທີ່ເໝາະສົມ ຍັງຈະຊ່ວຍຍືດອາຍຸ ແລະ ສຸຂະພາບຮ່າງກາຍໄປໄດ້ຫລາຍກ່ວາຄົນທີ່ບໍ່ກິນຖົ່ວເລີຍ  ເຊິ່ງການກິນຖົ່ວປະມານ 28 ກຣາມ 5 ຄາບຕໍ່ອາທິດ ຍັງຊ່ວຍຫລຸດຄວາມສ່ຽງຈາກການເສຍຊີວິດ ຫລື ເປັນພະຍາດຫົວໃຈໄດ້29% ແລະ ນອກຈາກນັ້ນ ຍັງຫລຸດຄວາມສ່ຽງຈາກການເສຍຊີວິດ ແລະ ເຈັບປ່ວຍຈາກພະຍາດມະເຮັງໄດ້ 11%.

ການສຶກສາກ່ອນໜ້ານີ້ລະບຸວ່າ ການກິນຖົ່ວຊ່ວຍຫລຸດຄວາມສ່ຽງຈາກພະຍາດເບົາຫວານ, ມະເຮັງລຳໄສ້ໃຫຍ່, ໜິ້ວຖົງບີ ແລະ ລຳໄສ້ໃຫຍ່ອັກເສບນຳ. ຖົ່ວຊະນິດຕ່າງໆມີສານອາຫານທີ່ສຳຄັນ ເຊັ່ນ : ໂປຣຕິນຄຸນນະພາບສູງ, ວິຕາມິນຫລາຍຊະນິດ, ແຮ່ທາດ ເຊິ່ງລ້ວນແຕ່ຊ່ວຍຕໍ່ຕ້ານການເກີດພະຍາດມະເຮັງ ແລະ ການເຮັດວຽກຜິດປົກກະຕິຂອງແຊນ. ນອກຈາກນັ້ນຍັງອາດປ້ອງກັນພະຍາດຫົວໃຈໄດ້ນຳອີກ ເຊິ່ງການສຶກສາດັ່ງກ່າວນີ້ຖືກຕີພິມໃນວາລະສານການແພດ  New England Journal of Medicine.