ທົ່ວນະຄອນຫລວງວຽງຈັນ ມີຮ້ານຄ້ານຳໃຊ້ລະບົບ OnePay ເກືອບ 200 ແຫ່ງ
ພາຍຫລັງທະນາຄານການຄ້າຕ່າງປະເທດລາວ ໄດ້ເປີດໂຕ BCEL OnePay, ໂດຍການນຳໃຊ້ມາດຕະຖານ ສະແກນ ຄິວອາໂຄດ (QR Code) ໃນການຊຳລະເງີນຜ່ານບັນຊີເງິນຝາກ, ໂດຍບໍ່ຈຳເປັນຕ້ອງພົກພາເງິນສົດໄປນຳອີກຕໍ່ໄປ, ໄດ້ເຮັດໃຫ້ມີກະແສຕອບຮັບຢ່າງຫລວງຫລາຍໃນນະຄອນຫລວງວຽງຈັນ, ມາຮອດປັດຈຸບັນ ມີຮ້ານຄ້າຂະໜາດນ້ອຍ ແລະ ກາງ ນຳໃຊ້ລະບົບດັ່ງກ່າວເກືອບ 200 ແຫ່ງ.
ວັນທີ 30 ພະຈິກນີ້, ທ່ານ ພູຂົງ ຈັນທະຈັກ ອຳນວຍການທະນາຄານ ການຄ້າຕ່າງປະເທດລາວ ໃດ້ຖະແຫລຕໍ່ສື່ມວນຊົນວ່າ: ການສ້າງສັງຄົມທີ່ບໍ່ນຳໃຊ້ເງິນສົດ Cashless Society, ເປັນການເປີດຊ່ອງທາງການຊຳລະເງິນໃນຮູບແບບໃໝ່, ເຊິ່ງຫລາຍປະເທດໃນທົ່ວໂລກນຳໃຊ້ກັນມາດົນແລ້ວ, ລະບົບ ຄິວອາໂຄດ (QR Code) ນີ້ ຈະມີສ່ວນຊ່ວຍໃຫ້ຊາວຄ້າຂາຍຂະໜາດນ້ອຍ-ກາງ ລວມໄປເຖິງຂະໜາດໃຫຍ່ ສາມາດຂະຫຍາຍຖານລູກຄ້າໃຫ້ຫລາຍຂຶ້ນ, ເພາະລູກຄ້າຈະບໍ່ຕ້ອງພົກພາເງິນສົດ, ພຽງແຕ່ຈ່າຍເງິນຜ່ານທາງບັນຊີ ຫຼື ບັດເຄຣດິດໄດ້ທັນທີ ເຮັດໃຫ້ປະຢັດຄ່າໃຊ້ຈ່າຍ, ສະດວກ, ປອດໄພ ແລະ ວ່ອງໄວດີຂຶ້ນ.
ຜູ້ອຳນວຍການທະນາຄານດ່ັງກ່າວ ໃຫ້ຮູ້ວ່າ: ສຳລັບຊາວຄ້າຂາຍທີ່ຕ້ອງການສະໝັກລະບົບດັ່ງກ່າວ ເປັນຕົ້ນ ຮ້ານຄ້າລາຍຍ່ອຍ ກໍພຽງແຕ່ ປະກອບແບບຟອມສະໝັກຮັບຊຳລະດ້ວຍຄິວອາໂຄດ (ເຊັນລົງນາມດ້ວຍເຈົ້າຂອງທຸລະກິດ), ສຳເນົາບັດປະຈຳຕົວ, ສຳມະໂນຄົວ ຫລື Passport, ບັນຊີສະກຸນເງິນກີບ ທີ່ເປີດກັບທະນາຄານການຄ້າຕ່າງປະເທດ ແລະ ລະບົບການແຈ້ງເຕືອນ (BCEL One ຫລື SMS Banking), ສ່ວນຮ້ານຄ້າທີ່ເປັນນິຕິບຸກຄົນ, ຫ້າງຮ້ານ ແລະ ຫົວໜ່ວຍທຸລະກິດ ກໍເຮັດຄ້າຍກັນ ແຕ່ຕ້ອງເພີ່ມສຳເນົາທະບຽນທຸລະກິດ, ສຳເນົາທະບຽນອາກອນປີປັດຈຸບັນ ແລະ ຫລັງຈາກນັ້ນ ຈະມີພະນັກງານຂອງທະນາຄານ ລົງໄປຕິດຕັ້ງ ແລະ ແນະນຳການນຳໃຊ້ໃຫ້, ເຊິ່ງໃນໄລຍະເບື້ອງຕົ້ນ ແມ່ນຍັງບໍ່ທັນມີການເກັບຄ່າທຳນຽມໃດໆ, ແຕ່ອະນາຄົດຖ້າຫາກມີຈະພະຍາຍາມເກັບໃຫ້ໜ້ອຍທີ່ສຸດ.
ສ່ວນວິທີການຈ່າາຍເງິນຜ່ານລະບົບ QR Code ລູກຄ້າທຸກຄົນຕ້ອງເປີດແອັບ ໂມບາຍແບັງຄິງຂອງທະນາຄານ ແລ້ວໃສ່ລະຫັດຜ່ານຂອງຕົນ, ເລືອກປະເພດການ ຊຳລະເງິນ BCEL OnePay, ສະແກນ QR Code ຂອງຮ້ານຄ້າທີ່ຕ້ອງການຊຳລະ ຄ່າສິນຄ້າ ຫຼື ບໍລິການ, ຫລັງຈາກນັ້ນ ພິມຈຳນວນເງິນທີ່ຕ້ອງການຈ່າຍ ແລະ ກົດຢືນ ຢັນການຈ່າຍ. ຈາກນັ້ນຝັ່ງຜູ້ຮັບຈະໄດ້ຮັບການແຈ້ງເຕືອນເງິນເຂົ້າໃນໂທລະສັບຂອງ ຜູ້ຂາຍ ຖືວ່າສຳເລັດ.
