ແຂວງຊຽງຂວາງພ້ອມເປັນເຈົ້າພາບ ຈັດງານມະຫະກຳກິລາແຫ່ງຊາດ ຄັ້ງທີ XI
ກອງປະຊຸມຄະນະຮັບຜິດຊອບລະດັບຊາດ ຄັ້ງທີ III ເພື່ອກະກຽມງານມະຫະກຳກິລາແຫ່ງຊາດ ຄັ້ງທີ XI ທີ່ແຂວງຊຽງຂວາງເປັນເຈົ້າພາບ ໄດ້ຈັດຂຶ້ນໃນວັນທີ 29 ພະຈິກນີ້ ຢູ່ຫ້ອງວ່າການປົກຄອງແຂວງຊຽງຂວາງ ໂດຍເປັນປະທານຂອງທ່ານ ສົມກົດ ມັງໜໍ່ເມກ ເຈົ້າແຂວງດັ່ງກ່າວ, ມີທ່ານນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ ເຂົ້າຮ່ວມນຳດ້ວຍ.
ກອງປະຊຸມໄດ້ຮັບຟັງການລາຍງານຄວາມຄືບໜ້າການກະກຽມງານມະຫະກຳກິລາແຫ່ງຊາດ ຄັ້ງທີ XI ຄືການສັງລວມງົບປະມານ ແລະ ຄວາມພ້ອມໃນດ້ານຕ່າງໆ ນັບທັງວຽກງານໂຄສະນາ-ຂ່າວສານ, ປ້ອງກັນຊາດ, ປ້ອງກັນຄວາມສະຫງົບ, ສະຖານທີ່ພັກ ແລະ ກິດຈະກຳປິ່ນອ້ອມອື່ນໆ.
ທ່ານລັດຖະມົນຕີກະຊວງສຶກສາທິການ ແລະ ກິລາ ໄດ້ເນັ້ນໃຫ້ຄະນະຮັບຜິດຊອບເອົາໃຈໃສ່ເຮັດໃຫ້ງານມີຄວາມສະຫງົບປອດໄພ, ມີຄວາມເປັນລະບຽບຮຽບຮ້ອຍ, ມີບັນຍາກາດເບີກບານມ່ວນຊື່ນ, ມີຄວາມສາມັກຄີ ແລະ ຄວາມເປັນມິດໃນທົ່ວປະເທດ. ສິ່ງສຳຄັນຕ້ອງເປັນເຈົ້າພາບທີ່ດີ ສ້າງຊື່ສຽງພາບພົດອັນດີ ແລະ ເປັນຜົນງານທາງດ້ານວັດທະນະທຳ-ສັງຄົມຂອງແຂວງ ເພື່ອຂໍ່ານັບຮັບຕ້ອນວັນສຳຄັນຂອງຊາດໃນປີ 2018 ທັງເປັນການສ້າງຄວາມເຂັ້ມແຂງໃຫ້ແກ່ແຂວງຊຽງຂວາງໃນດ້ານຄວາມສາມາດ ແລະ ປະສົບການໃນການຈັດງານມະຫະກຳກິລາ ແລະ ງານສຳຄັນອື່ນໆ.
ທ່ານລັດຖະມົນຕີກະຊວງສຶກສາທິການ ແລະ ກິລາ ຢ້ຳຕື່ມວ່າ: ການເປັນເຈົ້າພາບທີ່ດີຕ້ອງສ້າງພື້ນຖານໂຄງລ່າງທີ່ໝັ້ນຄົງ, ບໍ່ໃຫ້ມີບັນຫາອັນບໍ່ດີ, ໃຊ້ງົບປະມານໃຫ້ມີປະສິດທິພາບສູງໃຫ້ໄດ້ຮັບຄວາມຍ້ອງຍໍຊົມເຊີຍຈາກປະຊາຊົນບັນດາເຜົ່າຊາວຊຽງຂວາງ ກໍຄືປະຊາຊົນລາວໃນທົ່ວປະເທດ ເພາະການຈັດງານຄັ້ງນີ້ເປັນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມ 5 ປີ, ເປັນການສ້າງຊັບພະຍາກອນມະນຸດ, ຍົກສູງຊີວິດການເປັນຢູ່ຂອງປະຊາຊົນ, ສ້າງຄວາມເຂັ້ມແຂງດ້ານວຽກງານ ປກຊ-ປກສ, ໂຄສະນາມູນເຊື້ອປະຕິວັດແຂວງວິລະຊົນ ພ້ອມກັບເປັນປີທ່ອງທ່ຽວລາວ. ສະນັ້ນ, ບັນດາຄະນະຮັບຜິດຊອບກຳມະການ, ອະນຸກຳມະການຕ່າງໆຕ້ອງໄດ້ເພີ່ມຄວາມຮັບຜິດຊອບໃຫ້ສູງຂຶ້ນກວ່າເກົ່າ, ເນັ້ນການກໍ່ສ້າງມີຄຸນນະພາບ ແລະ ປົກປັກຮັກສາໃຫ້ຊົມໃຊ້ໄດ້ຍາວນານ ໂດຍຕິດພັນກັບມູນເຊື້ອອັນດີງາມຂອງປະຊາຊົນແຂວງຊຽງຂວາງ.
