ລາວເຜີຍແຜ່ດໍາລັດວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ

ໃນວັນທີ 29 ພະຈິກນີ້, ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກ ກະຊວງກະສິກໍາ ແລະ ປ່າໄມ້ (ກປ) ໄດ້ຈັດກອງປະຊຸມເຜີຍແຜ່, ເຊື່ອມຊຶມ ແລະ ແນະນໍາການຈັດຕັ້ງປະຕິບັດ ດໍາລັດວ່າດ້ວຍ ມາດຕະຖານພົ້ນທຸກ ແລະ ມາຕະຖານພັດທະນາ, ຂຶ້ນທີ່ຫໍປະຊຸມແຫ່ງຊາດ ໂດຍການເປັນປະທານຂອງທ່ານ ລຽນ ທິແກ້ວ ລັດຖະມົນຕີກະຊວງກະສິກໍາ ແລະ ປ່າໄມ້, ພ້ອມດ້ວຍເຈົ້າແຂວງຕ່າງໆເຂົ້າຮ່ວມຢ່າງພ້ອມພຽງ.

ດໍາລັດສະບັບນີ້ ເພື່ອເປັນພື້ນຖານໃຫ້ແກ່ການກໍານົດເປົ້າໝາຍແກ້ໄຂຄວາມທຸກຍາກ, ແນໃສ່ສ້າງຄອບຄົວ, ບ້ານພັດທະນາ, ບ້ານໃຫຍ່ເປັນຕົວເມືອງໃນຊົນນະບົດ ແລະ ເມືອງເຂັ້ມແຂງຮອບດ້ານ, ຕາມມະຕິກອງປະຊຸມໃຫຍ່ຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງຊາດ ໃນແຕ່ລະໄລຍະໃຫ້ປະກົດຜົນເປັນຈິງ, ມາດຕະຖານພົ້ນທຸກ ແມ່ນການກໍານົດເງື່ອນໄຂພື້ນຖານທາງດ້ານເສດຖະກິດ-ສັງຄົມ ເພື່ອວັດແທກຄອບຄົວ, ບ້ານ, ເມືອງພົ້ນທຸກ ໃຫ້ສອດຄ່ອງກັບສະພາບຄວາມເປັນຈິງຂອງປະເທດໃນແຕ່ລະໄລຍະເຊັ່ນ: ການກໍານົດມາດຕະ ຖານຄອບຄົວພົ້ນທຸກ ແມ່ນຄອບຄົວທີ່ມີເງື່ອນໄຂດັ່ງນີ້: ມີທີ່ຢູ່ອາໄສແໜ້ນໜາ-ປອດໄພ, ມີຊັບສິນ ແລະ ເຄື່ອງໃຊ້ຕ່າງໆ ທີ່ຈໍາເປັນສໍາລັບການດໍາລົງຊີວິດ ແລະ ທໍາມາຫາກິນ, ມີແຮງງານ ແລະ ມີອາຊີບ ຫຼືແຫຼ່ງລາຍຮັບໝັ້ນຄົງ, ສະມາຊິກຄອບຄົວ ໃນເກນອາຍຸໄດ້ຮັບການສຶກສາໃນລະດັບມັດທະຍົມຕົ້ນ, ຊົມໃຊ້ນໍ້າສະອາດ ແລະ ພະລັງງານໝັ້ນຄົງ ແລະ ເຂົ້າເຖິງການບໍລິການສາທາລະນະຂັ້ນພື້ຖານ. ມາດຕະຖານພັດທະນາ ແມ່ນກໍານົດບັນດາເງື່ອນໄຂທີ່ມີລັກສະນະຮອບດ້ານ ເພື່ອວັດແທກຜົນສໍາເລັດຂອງການສ້າງຄອບຄົວ, ບ້ານພັດທະນາ, ການກໍານົດມາດຕະ ຖານຄອບຄົວພັດທະນາ ແມ່ນຄອບຄົວທີ່ມີເງື່ອນໄຂຄົບຖ້ວນດັ່ງນີ້: ມີຄວາມສາມັກຄີ ແລະ ມີຄວາມຕື່ນຕົວ ເປັນເຈົ້າໃນການສ້າງສາພັດທະນາ, ຕື່ນຕົວເປັນເຈົ້າການເຂົ້າຮ່ວ ແລະ ປະກອບສ່ວນວຽກງານປ້ອງກັນຊາດ-ປ້ອງກັນຄວາມສະຫງົບ, ບັນລຸເງື່ອນໄຂດ້ານການສຶກສາວັດທະນະທໍາ-ສັງຄົມ ແລະ ເປັນເຈົ້າການຄຸ້ມຄອງ, ປົກປັກຮັກສາ ແລະ ນໍາໃຊ້ຊັບພະຍາກອນທໍາມະຊາດ ແລະ ສິ່ງແວດລ້ອມຢ່າງມີປະສິດທິຜົນ ແລະ ຍົນຍົງ, ພົ້ນທຸກ ແລະ ມີແຫຼ່ງລາຍຮັບໝັ້ນຄົງ.

ໃນໂອກາດດັ່ງກ່າວ ທ່ານ ຈູມມະລີ ໄຊຍະສອນ ອະດີດປະທານປະເທດ ໄດ້ໃຫ້ກຽດໂອ້ລົມຕໍ່ກອງປະຊຸມ ໂດຍເນັ້ນໃຫ້ພະນັກງານຫຼັກແຫຼ່ງ ແລະ ບັນດາພາກສ່ວນກ່ຽວຂ້ອງເອົາໃຈໃສ່ສ້າງພື້ນຖານການເມືອງໜັກແໜ້ນສືບຕໍ່ປະຕິບັດຍຸດທະສາດ 3 ສ້າງ ເພາະນີ້ເປັນໜ້າທີ່ພື້ນຖານທີ່ຈໍາເປັນຕ້ອງສືບຕໍ່ເຮັດ ເປັນຕົ້ນແມ່ນ: ສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເຂັ້ມແຂງ ແລະ ສ້າງບ້ານເປັນບ້ານພັດທະນາ ແລະ ອື່ນໆ.