ໄລຍະ 5 ເດືອນ (ສິງຫາ-ທັນວາ 2024) ປະຕິບັດການ “ນົກນາງນວນ” ມີຄະດີແກ້ງຄໍເຊັນເຕີ 160 ເລື່ອງ ຈັບຜູ້ຕ້ອງຫາໄດ້ 70 ພັນກວ່າຄົນ
ຂ່າວ CMG ຂອງຈີນປະຈຳລາວລາຍງານວ່າ: ວັນທີ 21 ມັງກອນ 2025 ນີ້ສູນຮ່ວມມືປະຕິບັດກົດໝາຍແມ່ນ້ຳລ້ານຊ້າງ-ແມ່ນ້ຳຂອງ ໄດ້ຈັດກອງປະຊຸມສະຫຼຸບຜົນການປະຕິບັດການຮ່ວມ ພາຍໃຕ້ລະຫັດ “ນົກນາງນວນ” (SEAGULL) ຢູ່ນະຄອນຄຸນໝິງແຂວງຢຸນນານຂອງຈີນ.
ສູນດັ່ງກ່າວໄດ້ແຈ້ງສະພາບການປະຕິບັດການ “ນົກນາງ ນວນ” ພ້ອມດ້ວຍຜົນງານຕົ້ນຕໍທີ່ໄດ້ຮັບ, ແລະ ໄດ້ຍ້ອງຍໍຝ່າຍທີ່ກ່ຽວຂ້ອງທີ່ໄດ້ຮັບຜົນງານອັນພົ້ນເດັ່ນໃນການປະຕິບັດການຮ່ວມຄັ້ງນີ້, ພ້ອມທັງໄດ້ແນະນຳແຜນດຳເນີນງານໄລຍະທີ 2 ຂອງການປະຕິບັດການ “ນົກນາງນວນ” ທີ່ສູນດັ່ງກ່າວຈະຈັດຕັ້ງປະຕິບັດໃນປີ 2025.
ໄລຍະເດືອນສິງຫາ ຫາ ເດືອນທັນວາ ປີ 2024, ສູນຮ່ວມມືປະຕິບັດກົດໝາຍແມ່ນ້ຳລ້ານຊ້າງ-ແມ່ນ້ຳຂອງໄດ້ດຳເນີນການປະຕິບັດກົດໝາຍຮ່ວມ “ນົກນາງນວນ” ໄລຍະທີ 1, ໃນໄລຍະດັ່ງກ່າວ, ຝ່າຍຕ່າງໆໄດ້ມ້າງຄະດີປະເພດຕ່າງໆຫຼາຍກວ່າ 160 ເລື່ອງທີ່ມີຄະດີສໍ້ໂກງຊັບທາງໂທລະຄົມເປັນຕົ້ນຕໍ, ໄດ້ຈັບກຸ່ມຜູ້ຕ້ອງຫາຫຼາຍກວ່າ 70,000 ຄົນ, ແລະຊ່ວຍເຫຼືອຜູ້ປະສົບເຄາະຮ້າຍ 160 ກວ່າຄົນ.
ສູນປະຕິບັດກົດໝາຍແມ່ນ້ຳລ້ານຊ້າງ-ແມ່ນ້ຳຂອງຈະເປີດການປະຕິບັດການຮ່ວມ “ນົກນາງນວນ” ໄລຍະທີ 2 ໃນເວລາທີ່ເໝາະສົມ, ເພື່ອສືບຕໍ່ສຸມໃສ່ປາບປາມການສໍ້ໂກງຊັບທາງໂທລະຄົມ ແລະ ອາຊະຍາກຳອື່ນໆ, ເພື່ອປົກປັກຮັກສາຄວາມປອດໄພດ້ານຊີວິດ ແລະ ຊັບສິນຂອງປະຊາຊົນປະເທດຕ່າງໆໃນພາກພື້ນກໍຄືຄວາມໝັ້ນຄົງ ແລະ ສະຖຽນລະພາບຂອງພາກພື້ນ.
ທີ່ມາ: CMG
