5 ເຫດຜົນສຳຄັນທີ່ ເມສຊີ ຕໍ່ສັນຍາຍາວກັບ ບາເຊໂລນາ
ເຈາະເລິກເບື້ອງຫລັງສະໂມສອນບານເຕະ ບາເຊໂລນາ ຈັບ ລີໂອເນລ ເມສຊີ ຕໍ່ສັນຍາຍາວເຖິງປີ 2021 ເຊື່ອເປັນເພາະ 5 ເຫດຜົນທີ່ສຳຄັນຕໍ່ທັງນັກເຕະ ແລະ ສະໂມສອນ.
ບາເຊໂລນາ ສະໂມສອນຍັກໃຫຍ່ແຫ່ງການແຂ່ງຂັນ ລາ ລີກາ ສະເປນ ປະກາດຢືນຢັນໃນວັນທີ 25 ພະຈິກວ່າ: ລີໂອເນລ ເມສຊີ ກອງໜ້າທີມຊາດອາເຈນຕິນາ ຕົກລົງຕໍ່ສັນຍາຫລິ້ນໃນຖິ່ນ ຄຳ ນູ ອອກໄປຈົນຮອດສິ້ນສຸດລະດູການ 2020-21 ເປັນທີ່ຮຽບຮ້ອຍແລ້ວ.
ພ້ອມກັນນັ້ນ ບາເຊໂລນາ ຍັງລະບຸວ່າ: ເມສຊີ ມີຄ່າຈີກສັນຍາສູງເຖິງ 700 ລ້ານເອີໂຣ ແລະ ນີ້ຄື 5 ເຫດຜົນສຳຄັນທີ່ເຮັດໃຫ້ ບາເຊໂລນາ ຕັດສິນໃຈຈັບດາວເຕະອາເຈນຕິນາ ຕໍ່ສັນຍາຍາວໄປຮອດປີ 2021 ຄື:
- ບໍ່ມີນັກເຕະຄົນໃດມາແທນ ເມສຊີ ໄດ້ອີກແລ້ວ
ເມສຊີ ໄດ້ຮັບການຍົກຍ້ອງວ່າເປັນໜຶ່ງໃນນັກເຕະທີ່ດີທີ່ສຸດໃນປະຫວັດສາດຂອງວົງການບານເຕະໂລກ ແລະ ແຂ່ງເປັນເບີ 1 ກັບ ຄຣິສເຕຍໂນ ໂຣນັລໂດ້ ໃນຍຸກນີ້.
ເມສຊີ ຊ່ວຍໃຫ້ ບາເຊໂລນາ ໄດ້ແຊ້ມຫລາຍກວ່າ 30 ລາຍການ ລວມທັງ ລາ ລີກາ 8 ສະໄໝ ແລະ ຢູຟາ ແຊ້ມປ້ຽນ ລີກ 4 ສະໄໝ.
ນອກຈາກນັ້ນ ເມສຊີ ຍັງເປັນດາວຊັລໂວຕະຫລອດການຂອງສະໂມສອນ ແລະ ໄດ້ ບັນລັງ ດໍ ມາແລ້ວ 5 ສະໄໝ ລວມທັງຫາກໍໄດ້ເກີບຄຳ ຫລື ດາວຊັລໂວລີກເອີຣົບເປັນສະໄໝທີ 4.
ເຖິງວ່າ ເມສຊີ ມີອາຍຸເຂົ້າຫລັກ 30 ປີແລ້ວ ແຕ່ຝີຕີນຂອງລາວຍັງຍອດຢ້ຽມ ແລະ ຍາກທີ່ຈະຫາໃຜມາທົດແທນໄດ້ໃນອະນາຄົດອັນໃກ້ນີ້.
- ເປັນແຮງກະຕຸ້ນທີ່ດີໃຫ້ເພື່ອນຮ່ວມທີມ
ເມື່ອມີ ເມສຊີ ຢູ່ໃນທີມ ບາເຊໂລນາ ກໍຍັງມີໂອກາດໄດ້ແຊ້ມສະເໝີ ແລະ ເພື່ອນໆໃນທີມກໍຮູ້ດີ. ດັ່ງນັ້ນ ການຕໍ່ສັນຍາຄັ້ງນີ້ ຖືເປັນການສ້າງຂວັນກຳລັງໃຈທີ່ດີຫລາຍໃນຖິ່ນ ຄຳ ນູ.
ເຊື່ອວ່າ ນັກເຕະໃນທີມ ບາເຊໂລນາ ອີກຫລາຍຄົນ ພ້ອມຕໍ່ສັນຍາຫລິ້ນໃຫ້ສະໂມສອນອອກໄປອີກ ຫລັງເຫັນ ເມສຊີ ຍັງຢູ່ກັບທີມໄປຮອດປີ 2021.
- ດຶງດູດໃຫ້ດາວດັງເຊັນສັນຍາມາຮ່ວມທີມ
ເຊື່ອວ່ານັກເຕະເກືອບທຸກຄົນໃນໂລກຍາກມາຫລິ້ນຄຽງຂ້າງກັບ ເມສຊີ. ດັ່ງນັ້ນ ການຕໍ່ສັນຍາຄັ້ງນີ້ ຈະເຮັດໃຫ້ເປັນເລື່ອງງ່າຍຕໍ່ສະໂມສອນໃນການດຶງນັກເຕະຝີຕີນດີມາເສີມທີມໃນອະນາຄົດ.
ບາເຊໂລນາ ຕ້ອງການດຶງ ມາຣ໌ໂກ ແວຣ໌ຣັດຕິ ກອງກາງ ປາຣີ ແຊັງ ແຊັກແມັງ ນັບແຕ່ຈົບລະດູການຜ່ານມາ ແລະ ດາວເຕະອີຕາລີ ກໍຢາກມາຫລິ້ນກັບ ເມສຊີ ຄືກັນ ເຮັດໃຫ້ອະນາຄົດອາດບໍ່ແມ່ນເລື່ອງຍາກທີ່ຈະຊື້ມາຫລິ້ນຮ່ວມກັນ.
- ອາດເກີດເຫດວຸ້ນວາຍເລັກໜ້ອຍ ຖ້າ ບາເຊໂລນາ ຂາຍ ເມສຊີ
ເຊື່ອວ່າ ແຟນບານ ບາເຊໂລນາ ອາດເດືອດເປັນໄຟ ຖ້າສະໂມສອນຕັດສິນໃຈຂາຍນັກເຕະສຸດທີ່ຮັກຂອງພວກເຂົາອອກໄປ ແລະ ໃຜທີ່ຢາກເຂົ້າມາເປັນປະທານສະໂມສອນອາດບໍ່ກ້າເຮັດແບບນັ້ນແນ່ນອນ.
ແຟນບານ ບາເຊໂລນາ ອາດບໍ່ເດືອດຮ້ອນຫລາຍຕອນທີ່ສະໂມສອນຂາຍ ເນຍ໌ມາຣ໌ ກອງໜ້າທີມຊາດບຣາຊິນ ໄປໃຫ້ກັບ ເປແອສເຊ ແຕ່ອາດບໍ່ເປັນແບບນັ້ນຖ້າເກີດກັບ ເມສຊີ.
ຮາເວີຍຣ໌ ມາສເຄຣາໂນ ເຄີຍເວົ້າວ່າ: ບໍ່ມີນັກເຕະ ຫລື ຜູ້ຈັດການທີມຄົນໃດທີ່ໃຫຍ່ໄປກວ່າສະໂມສອນ ຍົກເວັ້ນ ເມສຊີ ຄົນດຽວເທົ່ານັ້ນ ແລະ ນັ້ນເປັນເລື່ອງທີ່ທຸກຄົນຕ້ອງຍອມຮັບຄວາມຈິງ.
- ສ້າງໂອກາດໃຫ້ ເມສຊີ ແຂ່ງເລື່ອງຄວາມຍິ່ງໃຫຍ່ກັບ ໂຣນັລໂດ້ ຕໍ່ໄປ
ຄຣິສເຕຍໂນ ໂຣນັລໂດ້ ເປັນເບີໜຶ່ງທີ່ຈະໄດ້ ບັນລັງ ດໍ ໃນປີນີ້ ແລະ ຖ້າເຮັດສຳເລັດ ດາວເຕະ ເຣອັລ ມາດຣິດ ກໍຈະເຮັດສະຖິຕິໄດ້ 5 ສະໄໝຂຶ້ນມາເທົ່າກັບ ເມສຊີ.
ເຖິງວ່າທັງສອງຈະອາຍຸຜ່ານ 30 ປີກັນໄປແລ້ວ ແຕ່ຝີຕີນຍັງດີຢ້ຽມຄືເກົ່າ ແລະ ຍັງສາມາດແຂ່ງກັນຍິ່ງໃຫຍ່ໄປໄດ້ອີກຫລາຍປີ.
ການຕໍ່ສັນຍາຄັ້ງນີ້ ເຮັດໃຫ້ ເມສຊີ ຈະໄດ້ມີສະມາທິເຕັມທີ່ກັບການຫລິ້ນໃນສະໜາມ ແລະ ຊ່ວຍໃຫ້ ບາເຊໂລນາ ເດີນໜ້າຄວ້າແຊ້ມຕໍ່ໄປ.
