ອິນໂດເນເຊຍສັ່ງອົບພະຍົບ 1 ແສນຄົນ ອ້ອມພູເຂົາໄຟອາກຸງ
ລັດຖະບານອິນໂດເນເຊຍສັ່ງອົບພະຍົບປະຊາຊົນ 100.000 ຄົນ ໃນລັດສະໝີ 10 ກິໂລແມັດ ອ້ອມພູເຂົາໄຟອາກຸງ ຢູ່ເກາະບາຫລີ ເຊິ່ງໃກ້ລະເບີດຢ່າງຮຸນແຮງຄັ້ງທຳອິດໃນຮອບ 54 ປີ. ຂະນະທີ່ການປິດສະໜາມບິນຂອງເກາະບາຫລີຊົ່ວຄາວກະທົບຖ້ຽວບິນຫລາຍກວ່າ 440 ຖ້ຽວ ແລະ ຜູ້ໂດຍສານເກືອບ 60.000 ຄົນ.
Tens of thousands of visitors to Bali, Indonesia, are stranded after the island's Mount Agung erupted. https://t.co/ajwlC0FxrB pic.twitter.com/kv4CwZLHoe
— ABC News (@ABC) November 28, 2017
ສຳນັກຂ່າວຕ່າງປະເທດລາຍງານຈາກນະຄອນຫລວງຈາກາຕາ ປະເທດອິນໂດເນເຊຍ ໃນວັນທີ 27 ພະຈິກວ່າ: ທ່ານ ຊູໂຕໂປ ເປີໂວ ນິໂກຣໂຮ ໂຄສົກສຳນັກງານບໍລິຫານຈັດການໄພພິບັດແຫ່ງຊາດຂອງອິນໂດເນເຊຍ (BNPB) ຖະແຫລງວ່າ: ຄຳສັ່ງຂະຫຍາຍລັດສະໝີພື້ນທີ່ອັນຕະລາຍບໍລິເວນພູເຂົາໄຟອາກຸງຈາກ 7,5 ກິໂລແມັດ ເປັນ 10 ກິໂລແມັດ ຕາມການຍົກລະດັບເຕືອນໄພຈາກ 3 ເປັນ 4 ຫລື ສີແດງ ເຊິ່ງເປັນຂັ້ນສູງສຸດນັ້ນ ຄວບຄຸມບ້ານ 22 ແຫ່ງຈາກຈຸດສູນກາງຂອງພູເຂົາໄຟ ແລະ ໝາຍຄວາມວ່າຕ້ອງມີການອົບພະຍົບປະຊາຊົນ 90.000 ເຖິງ 100.000 ຄົນອອກຈາກພື້ນທີ່ ໂດຍເຈົ້າໜ້າທີ່ໄດ້ອົບພະຍົບປະຊາຊົນອອກມາແລ້ວ 40.000 ຄົນ ແຕ່ທີ່ເຫລືອຍັງສະໝັກໃຈບໍ່ຂໍອົບພະຍົບ ເພື່ອຖ້າຕີລາຄາສະຖານະການອີກໄລຍະໜຶ່ງ ແລະ ມີອີກຈຳນວນບໍ່ໜ້ອຍບໍ່ຕ້ອງການປະຖິ້ມເຮືອນ ແລະ ພື້ນທີ່ກະສິກຳ ເຊິ່ງລວມທັງສັດລ້ຽງ.
ເຖິງຢ່າງໃດກໍຕາມ, ໂຄສົກຂອງ BNPB ກ່າວວ່າ: ເຈົ້າໜ້າທີ່ອາດຕ້ອງໃຊ້ “ມາດຕະການຂັ້ນເດັດຂາດ” ໃນການອົບພະຍົບປະຊາຊົນທັງໝົດ, ຖ້າສະຖານະການຮຸນແຮງເຖິງຂີດສຸດ. ສ່ວນກະຊວງຄົມມະນາຄົມຈັດກຽມລົດເມໂດຍສານປະມານ 100 ຄັນຢູ່ສະໜາມບິນສາກົນງູຣະໄຣ ເພື່ອອົບພະຍົບປະຊາຊົນອອກຈາກສະໜາມບິນ ເຊິ່ງສ່ວນຫລາຍເປັນນັກທ່ອງທ່ຽວຕ່າງປະເທດ ໂດຍລັດຖະບານຈາກາຕາສັ່ງປິດສະໜາມບິນຕົ້ນຕໍຂອງເກາະບາຫລີ “ຢ່າງໜ້ອຍ 24 ຊົ່ວໂມງ” ຫລັງພົບຂີ້ເຖົ່າຈາກພູເຂົາໄຟເລີ່ມປົກຄຸມຣັນເວ.
