ນາຍົກຊີ້ການລົງທຶນຂອງລັດຕ້ອງໃຫ້ມີປະສິດທິຜົນກວ່າເກົ່າ
ໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ VIII ທີ່ສໍາເລັດລົງເມື່ອບໍ່ດົນມານີ້, ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ຍົກໃຫ້ເຫັນທິດທາງ ແລະ ມາດຕະການເພື່ອຊຸກຍູ້ເສດຖະກິດໃຫ້ຂະຫຍາຍຕົວຕໍ່ເນື່ອງ ແລະ ແຂງແຮງ ກໍຄືຮັບປະກັນການດຶງດູດ ແລະ ສົ່ງເສີມການລົງທຶນພາຍໃນ ແລະ ຕ່າງປະເທດໃຫ້ຫລາຍຂຶ້ນວ່າ: ລັດຖະບານເຫັນຄວາມຈຳເປັນທາງພາວະວິໄສໃນການສ້າງເງື່ອນໄຂໃຫ້ເສດຖະກິດຂອງປະເທດມີສະຖຽນລະພາບ ແລະ ຂະຫຍາຍຕົວຢ່າງຕໍ່ເນື່ອງ ຫລີກເວັ້ນການສະດຸດ, ຢ້ຳເທົ້າ ຫລື ຖອຍຫລັງ, ແຕ່ບາງຄັ້ງ, ບາງໄລຍະ, ບາງກໍລະນີ ລັດຖະບານກໍພົບບັນຫາ ແລະ ຕ້ອງແກ້ບັນຫາ, ແຕ່ຖ້າຈະແກ້ໄດ້ກໍຕ້ອງທຸ່ນທ່ຽງເບິ່ງບັນຫາ, ຕ້ອງຮູ້ຈັກໃຊ້ວິທີວິທະຍາສາດ ເພື່ອຊອກໃຫ້ເຫັນແກ່ນແທ້ຂອງບັນຫາ, ມີວິທີທາງຄົ້ນຄິດຢ່າງມີວິທະຍາສາດ, ກົດເກນພາວະວິໄສ, ຊອກໃຫ້ເຫັນສັດຈະທຳໃນຄວາມເປັນຈິງ, ບໍ່ແມ່ນແລ່ນຕາມອາລົມຈິດນິຍົມ, ບໍ່ແລ່ນນຳໂຕເລກງົດງາມຮູບນອກທີ່ບໍ່ແມ່ນແກ່ນແທ້ຂອງການເຕີບໃຫຍ່ ແລະ ນຳຜົນປະໂຫຍດແທ້ຈິງມາສູ່ພື້ນຖານເສດຖະກິດແຫ່ງຊາດ. ສະນັ້ນ, ເພື່ອຮັບປະກັນໃຫ້ເສດຖະກິດຂະຫຍາຍຕົວຕໍ່ເນື່ອງ, ລັດຖະບານຈະສຸມໃສ່ການລົງທຶນຂອງລັດທີ່ມີຈຳກັດໃຫ້ມີປະສິດທິຜົນ ແລະ ປະຢັດ, ເອົາໃຈໃສ່ການພັດທະນາໂຄງລ່າງພື້ນຖານທີ່ຈຳເປັນ, ສ້າງເງື່ອນໄຂໃຫ້ແກ່ການຈໍລະຈອນສະດວກຂຶ້ນ, ລະບົບໂລຈີສະຕິກ, ປັບປຸງຕາໜ່າງໄຟຟ້າ, ຊົນລະປະທານຈຳນວນໜຶ່ງ, ສ້າງເງື່ອນໄຂໃຫ້ມີການຜະລິດ, ການຈຳໜ່າຍທີ່ສະດວກຂຶ້ນ, ປັບປຸງສະຖາບັນການສຶກສາ, ການຄົ້ນຄວ້າວິທະຍາສາດ, ລະບົບຂໍ້ມູນຂ່າວສານ, ສາທາລະນະສຸກ, ພັດທະນາສີມືແຮງງານ, ປະຕິບັດນະໂຍບາຍສະຫວັດດີການສັງຄົມ ແລະ ອື່ນໆ. ພ້ອມດຽວກັນນັ້ນ, ລັດຖະບານໄດ້ຖືສຳຄັນການດຶງດູດການລົງທຶນຂອງພາກທຸລະກິດທັງພາຍໃນ ແລະ ຕ່າງປະເທດ ເພື່ອຄ້ຳຈູນເສດຖະກິດແຫ່ງຊາດໃຫ້ສືບຕໍ່ມີກຳລັງແຮງຕໍ່ໄປຕາມແນວທາງປ່ຽນແປງໃໝ່ຂອງພັກເຮົາ. ລັດຖະບານເຫັນບັນດາຂໍ້ຄົງຄ້າງ, ຈຸດບົກຜ່ອງຂອງກົນໄກ, ກົງຈັກ, ບຸກຄົນທີ່ຮັບຜິດຊອບແລ້ວ ແລະ ຜ່ານມາໄດ້ມີຄວາມຕັ້ງໃຈ, ມີຄວາມຕັດສິນໃຈເຂົ້າສູ່ການປັບປຸງປ່ຽນແປງໃຫ້ດີຂຶ້ນເລີ່ມຈາກການປັບປຸງກົດໝາຍວ່າດ້ວຍການສົ່ງເສີມການລົງທຶນ, ຄຸ້ມຄອງການລົງທຶນໃຫ້ມີຄວາມຮັດກຸມຂຶ້ນ, ເປີດກວ້າງອອກຕື່ມ, ສ້າງຕັ້ງກົນໄກໃໝ່ຂຶ້ນ, ມີຄະນະກຳມະການຄຸ້ມຄອງການລົງທຶນຂັ້ນສູນກາງ (ຄລທສ), ຄະນະກຳມະການຄຸ້ມຄອງການລົງທຶນຂັ້ນແຂວງ (ຄລທຂ), ຫັນເອົາກົມສົ່ງເສີມການລົງທຶນຂອງກະຊວງແຜນການ ແລະ ການລົງທຶນເປັນກອງເລຂາປະຈຳ ຄລທສ, ແຂວງກໍຈະປະຕິບັດຄືກັນກັບ ຄລທສ, ໂດຍມອບໃຫ້ຮອງນາຍົກເປັນປະທານ, ປະກອບດ້ວຍພາກສ່ວນກ່ຽວຂ້ອງປະຊຸມກັນເປັນປະຈຳເພື່ອຕົກລົງ, ຮັບຮອງ, ອະນຸມັດການລົງທຶນໃຫ້ໄວຂຶ້ນ, ແກ້ບັນດາຂອດອຸດຕັນທີ່ເປັນຢູ່ໃນປັດຈຸບັນໃຫ້ໝົດໄປຢ່າງຂາດຕົວ.
