ປີ 2024 ນັກທ່ອງທ່ຽວເຂົ້າທ່ຽວຊົມ ພະທາດຫລວງ, ຫໍພະແກ້ວ ແລະ ວັດສີສະເກດ 3 ແສນກວ່າຄົນ ສ້າງລາຍຮັບ ຫລາຍກວ່າ 9 ຕື້ກີບ

ວັນທີ 8 ມັງກອນ 2025 ທ່ານ ນາງ ຄໍາເປື່ອງ ວົງຈັນດີ ຮອງຜູ້ອໍານວຍການກອງວິຊາການຄຸ້ມຄອງມໍລະດົກພະທາດຫລວງ ແລະ ຫໍພິພິທະພັນ ສະຖານບູຮານ ນະຄອນຫລວງວຽງຈັນ ໃຫ້ສຳພາດຕໍ່ໜັງສືພິມ ວຽງຈັນໃໝ່ ວ່າ: ໃນປີທ່ອງທ່ຽວລາວ 2024 ຢູ່ສະຖານທ່ອງທ່ຽວພະທາດຫລວງ, ຫໍພະແກ້ວ ແລະ ວັດສີສະເກດ ມີນັກທ່ອງທ່ຽວເຂົ້າມາທ່ຽວຊົມສະຖານທີ່ທ່ອງທ່ຽວ 3 ແຫ່ງນີ້ທັງໝົດ 322,760 ເທື່ອຄົນ ໃນນັ້ນມີນັກທ່ອງທ່ຽວພາຍໃນ 33,014 ເທື່ອຄົນ ແລະ ນັກທ່ອງທ່ຽວຕ່າງປະເທດ 289,749 ເທື່ອຄົນ, ຫລາຍກວ່າໝູ່ແມ່ນນັກທ່ອງທ່ຽວເກົາຫລີ, ໄທ, ຈີນ, ບັນດາປະເທດໃນອາຊຽນ, ເອີຣົບ ແລະ ປະເທດອື່ນໆ.

ນັກທ່ອງທ່ຽວເຂົ້າຊົມພະທາດຫລວງ 171,245 ເທື່ອຄົນ, ຫໍພະແກ້ວ 81,035 ເທື່ອຄົນ ແລະ ວັດສີສະເກດ 70,245 ເທື່ອຄົນ ທ່ຽບໃສ່ປີ 2023 ເພີ່ມຂຶ້ນຫລາຍສົມຄວນ ສ້າງລາຍຮັບໄດ້ຫລາຍກວ່າ 9 ຕື້ກີບ ທຽບໃສ່ປີຜ່ານມາເພີ່ມຂຶ້ນ 2 ຕື້ກີບ. ນອກຈາກນີ້ແລ້ວຍັງມີແຂກຄະນະຜູ້ແທນຕ່າງປະເທດ 106 ຄະນະ ມີ 4,225 ທ່ານ ແລະ ນັກຮຽນ-ນັກສຶກ ສາ 3,068 ເທື່ອຄົນ (ສ່ວນແຂກ ນັກຮຽນ-ນັກສຶກສາ ແລະ ພະສົງແມ່ນບໍ່ໄດ້ເກັບປີ້ເຂົ້າຊົມ) ເຊິ່ງສະຖານທີ່ທ່ອງ ທ່ຽວທັງ 3 ແຫ່ງນີ້ທີ່ສ້າງຄວາມສົນໃຈໃຫ້ນັກທ່ອງທ່ຽວ ແລະ ແຂກແມ່ນດ້ານວັດຖຸບູຮານ ລວດລາຍສິລະປະ ແລະ ອື່ນໆ.

ການບໍລິການສະຖານທີ່ີທ່ອງທ່ຽວທັງ 3 ແຫ່ງນີ້ ໄດ້ເປີດໃຫ້ນັກທ່ອງທ່ຽວເຂົ້າທ່ຽວຊົມທຸກວັນ ວັນຈັນ-ວັນອາທິດ ເວລາ 8:00-17:00 ໂມງ ເຊິ່ງລາຄາປີ້ເຂົ້າຊົມຖ້າເປັນຄົນພາຍໃນ 5,000 ກີບ ແລະ ຄົນຕ່າງປະເທດ 30,000 ກີບຕໍ່ຄົນຕໍ່ຄັ້ງ.

ທ່ານ ນາງ ຄໍາເປື່ອງ ວົງຈັນດີ ຍັງກ່າວຕື່ມວ່າ: ເພື່ອດຶງດູດໃຫ້ນັກທ່ອງທ່ຽວເຂົ້າທ່ຽວຊົມສະຖານທີ່ທ່ອງທ່ຽວທັງ 3 ແຫ່ງນີ້ໃຫ້ນັບມື້ຫລາຍຂຶ້ນ ໃນປີຜ່ານມາເຖິງວ່າໄດ້ມີການປັບປຸງບາງຢ່າງແລ້ວກໍຕາມ ແຕ່ປີ 2025 ຈະສືບຕໍ່ປັບປຸງຕື່ມອີກ ເປັນຕົ້ນປັບປຸງສະຖານທີ່ທ່ອງທ່ຽວບ່ອນຂາຍປີ້ເຂົ້າຊົມ, ສວນດອກໄມ້, ຫ້ອງການ, ສວນຫຍ້າ ແລະ ອື່ນໆ ໃຫ້ມີຄວາມງົດງາມ ນອກນີ້ຍັງຈະເອົາໃຈໃສ່ໂຄສະນາຜ່ານສື່ຕ່າງໆບໍ່ວ່າຈະເປັນໜັງສືພິມ, ໂທລະພາບ, ວິທະຍຸ, ຊ່ອງທາງອອນລາຍ ແລະ ເວບໄຊຕື່ມອີກ ເພື່ອເຮັດໃຫ້ນັກທ່ອງທ່ຽວທົ່ວໂລກຮັບຮູ້ຂໍ້ມູນຂ່າວສານສະຖານທີ່ທ່ອງທ່ຽວ 3 ແຫ່ງນີ້ໃຫ້ນັບມື້ຫລາຍຂຶ້ນເລື້ອຍໆ ແລະ ພ້ອມກັນມາທ່ຽວຊົມ.

ທີ່ມາ: ໜັງສືພິມ ວຽງຈັນໃໝ່