ສະຖິຕິຜູ້ເສຍຊີວິດຈາກເຫດການເຮືອບິນຕົກທົ່ວໂລກເພີ່ມສູງເຖິງ 334 ຄົນ ໃນປີ 2024
ຂໍ້ມູນຈາກສະມາຄົມການບິນຂອງເຢຍລະມັນ (BDL) ລະບຸວ່າ: ຈໍານວນຜູ້ເສຍຊີວິດຈາກອຸປະຕິເຫດທາງອາກາດທົ່ວໂລກເພີ່ມສູງ ໃນປີ 2024 ໂດຍມີຜູ້ເສຍຊີວິດຈາກອຸປະຕິເຫດທາງການບິນພົນລະເຮືອນ 334 ຄົນ ໃນຈໍານວນນີ້ເປັນຜູ້ໂດຍສານ, ຈຸບິນ ແລະ ປະຊາຊົນຢູ່ພື້ນດິນອີກ 7 ຄົນ ເຊິ່ງເພີ່ມຂຶ້ນຫລາຍກວ່າ 4 ເທົ່າ ເມື່ອທຽບໃສ່ຜູ້ເສຍຊີວິດ 80 ຄົນ ໃນປີ 2023.
ສະຖິຕິດັ່ງກ່າວນັບລວມອຸປະຕິເຫດກ່ຽວຂ້ອງເຮືອບິນໂດຍສານ ເຊິ່ງມີບ່ອນນັ່ງຢ່າງໜ້ອຍ 14 ບ່ອນນັ່ງ. ເຖິງຢ່າງໃດກໍຕາມ, ຍັງບໍ່ມີລາຍງານຂໍ້ມູນອຸປະຕິເຫດທີ່ກ່ຽວຂ້ອງນໍາເຮືອບິນຂະໜາດນ້ອຍໃນປັດຈຸບັນນີ້, ສ່ວນອຸປະຕິເຫດທີ່ກ່ຽວຂ້ອງນໍາເຮືອບິນທະຫານນັ້ນ ບໍ່ລວມຢູ່ໃນລາຍງານ.
ກ່ອນໜ້ານີ້, BDL ລາຍງານອຸປະຕິເຫດທາງອາກາດເຖິງລະດັບຕໍ່າສຸດເປັນປະຫວັດສາດ ໃນປີ 2017 ເຖິງວ່າຕົວເລກອຸປະຕິເຫດຈະເພີ່ມຂຶ້ນ, ແຕ່ຄວາມປອດໄພໃນການບິນຍັງຄົງກ້າວໜ້າໃນໄລຍະຫລາຍທົດສະວັດຜ່ານມາ ແລະ ທ່າອ່ຽງໃນໄລຍະຍາວສະທ້ອນເຖິງອັດຕາການເກີດອຸປະຕິເຫດທີ່ຫລຸດລົງຕໍ່ເນື່ອງ.
ທັງນີ້, ລາຍງານວິເຄາະຂອງ BDL ເຜີຍແຜ່ໃນປີຜ່ານມາ ລະບຸວ່າ: ການເດີນທາງດ້ວຍເຮືອບິນມີຄວາມປອດໄພເພີ່ມຂຶ້ນປະມານ 53 ເທົ່າ ເມື່ອທຽບໃສ່ໄລຍະປີ 1970.
ສໍາລັບເຫດການທາງອາກາດຄັ້ງຮ້າຍແຮງທີ່ສຸດຂອງປີ 2024 ເກີດຂຶ້ນໃນວັນທີ 29 ທັນວາ ເມື່ອເຮືອບິນໂບອິ້ງ 737-800 ທີ່ດໍາເນີນການໂດຍສາຍການບິນເຈຈູ ແອຣ ຂອງ ສ.ເກົາຫລີ ລົງຈອດໄຫລໄປໃນຣັນເວ ຂອງສະໜາມບິນນາໆຊາດມູອັນ ແຂວງຊ໊ອດລາໃຕ້ ທາງຕາເວັນຕົກສຽໃຕ້ຂອງ ສ.ເກົາຫລີ ສົ່ງຜົນເຮັດໃຫ້ມີຜູ້ໂດຍສານເສຍຊີວິດ 179 ຄົນ.
