ໄຊຍະບູລີ ຫາລືລາຄາການເກັບຊື້ ແລະ ການສົ່ງອອກມັນຕົ້ນ ສະເພາະ 4 ເມືອງໃຕ້ມີເນື້ອທີ່ 53 ພັນກວ່າເຮັກຕາ
ວັນທີ 4 ມັງກອນ 2025 ຜ່ານມາ ແຂວງໄຊຍະບູລີ ປຶກສາຫາລື ກ່ຽວກັບການເກັບຊື້ ແລະ ສົ່ງອອກ ຜົນຜະລິດກະສິກໍາ (ມັນຕົ້ນ) ຢູ່ 4 ເມືອງໃຕ້ຂອງແຂວງ ໂດຍມີທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ພະແນກການ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ສີຄານ ແກ່ນມະນີ ຮອງເຈົ້າເມືອງໆແກ່ນທ້າວ ໄດ້ລາຍງານກ່ຽວກັບການເກັບຊື້-ສົ່ງອອກມັນຕົ້ນວ່າ: ໃນປີ 2024 ປະຊາຊົນຢູ່ 4 ເມືອງໃຕ້ຂອງແຂວງໄຊຍະບູລີ ໄດ້ລົງທຶນປູກມັນຕົ້ນ ໃນເນື້ອທີ່ 53,470 ເຮັກຕາ, ຄາດຄະເນຜົນຜະລິດ 1.56 ລ້ານໂຕນ. ສໍາລັບການເກັບຊື້ຂອງຜູ້ປະກອບການ:
- ເມືອງທົ່ງມີໄຊ ລາຄາມັນດິບ 900ກີບ/ກລ, ລາຄາມັນແຫ້ງ ຂາຍໃຫ້ໄທ 3,022 ກີບ/ກິໂລ.
- ເມືອງປາກລາຍ ລາຄາມັນດິບໜ້າໂຮງງານ 1,130 ກີບ/ກິໂລ, ລາຄາມັນແຫ້ງ 2,800-3,000 ກີບ/ກິໂລ.
- ເມືອງແກ່ນທ້າວ ລາຄາມັນດິບ 1,170 ກີບ/ກິໂລ, ລາຄາມັນແຫ້ງ 3,120 ກີບ/ກິໂລ.
- ເມືອງບໍ່ແຕນ ລາຄາມັນດິບ 945ກີບ/ກິໂລ, ລາຄາມັນແຫ້ງ ສົ່ງຂາຍ 2,646 ກີບ/ກິໂລ.
ໄລຍະທ້າຍປີ 2024 ການເກັບຊື້ພາຍໃນ ແມ່ນມີລັກສະນະຢຸດສະງັກ, ປັດຈຸບັນ ການເກັບຊື້ມັນຕົ້ນດິບພາຍໃນ ມີທ່ວງທ່າເຄື່ອນໄຫວຫລາຍຂຶ້ນ. ນອກຈາກຜູ້ປະກອບການລາຍຍ່ອຍ, ຜູ້ປູກທີ່ຢູ່ໃກ້ໂຮງງານ ກໍໄດ້ສົົ່ງຂາຍໃຫ້ໂຮງງານແປ້ງມັນຕົ້ນ ເມືອງປາກລາຍ ແລະ ເມືອງໄຊຍະບູລີ. ນັບແຕ່ມີການເປີດເກັບຊື້, ຝານ ແລະ ສົ່ງອອກ ທ້າຍປີ 2024 ຮອດປັດຈຸບັນ ສະເພາະ ເມືອງແກ່ນທ້າວ ໄດ້ສົ່ງມັນແຫ້ງອອກໄທ 27,270ໂຕນ, ມັນທີ່ຝານຕາກແຫ້ງ ຄ້າງປີຜ່ານມາຮອດປັດຈຸບັນ 510,000 ໂຕນ.
ການຊຸກຍູ້ສົ່ງເສີມການເກັບຊື້ ແລະ ສົ່ງອອກມັນຕົ້ນທາງເມືອງ ແລະ ນັກທຸລະກິດ-ຜູ້ປະກອບການ(ກຸ່ມສົ່ງເສີມການຜະລິດກະສິກຳ ເພື່ອສົ່ງອອກຂອງເມືອງ) ໄດ້ມີການປະຊຸມຮ່ວມກັນ ເພື່ອປຶກສາຫາລື ກ່ຽວກັບການຊອກຫາຕະຫລາດ ທັງພາຍໃນ ແລະ ຕ່າງປະເທດ ເພື່ອຈຳໜ່າຍຜົນຜະລິດກະສິກຳ (ປະເພດມັນຕົ້ນ) ແລະ ປຶກສາຫາລືກ່ຽວກັບການກຳນົດລາຄາມັນຕົ້ນດິບ-ມັນຕາກແຫ້ງ ຕາມລາຄາທ້ອງຕະຫລາດໃນແຕ່ລະໄລຍະ.
