ສະຫວັນນະເຂດມອບເງິນເກີນແຜນ 2.25 ຕື້ກວ່າກີບ ອຸດໜູນນະໂຍບາຍແກ່ຜູ້ມີຜົນງານ ແລະ ຄຸນຄວາມດີ
ວັນທີ 3 ມັງກອນ 2025 ແຂວງສະຫວັນນະເຂດ ມອບເງິນນະໂຍບາຍຕໍ່ຜູ້ມີຜົນງານ ແລະຄຸນງາມຄວາມດີໃນພາລະກິດການປະຕິວັດຊາດປະຊາທິປະໄຕ ໂດຍການເຂົ້າຮ່ວມຂອງທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ.
ທ່ານ ນາງ ພາວັນ ບົວຫຼວງລາດ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ ລາຍງານວ່າ: ນະໂຍບາຍດັ່ງກ່າວມາແລ້ວນັບແຕ່ປີ 2000 ເຖິງ 2024 ມີທັງໝົດ 1,589 ທ່ານ ເປັນເງິນ 38.16 ຕື້ກວ່າກີບ, ສະເພາະປີ 2024 ມີ 122 ຄົນ, ເປັນເງິນ 2.25 ຕື້ກວ່າກີບ. ໃນນີ້ກະຊວງແຮງງານ ແລະສະຫວັດດີການສັງຄົມມອບ 50 ຄົນ, ເປັນເງິນ 938.91 ລ້ານກວ່າກີບ (ປະຕິບັດໃນ 3 ນະໂຍບາຍຄື: ອຸດໜູນເສຍສະຫລະຊີວິດ ຈຳນວນ 23 ຄົນ, ອຸດໜູນເທື່ອດຽວຍັງມີຊີວິດ 26 ຄົນ ແລະ ເງິນປ່ຽນແທນໂກຕາລົດ 1 ຄົນ) ເຫຼືອນັ້ນແມ່ນແຂວງຂອງພວກເຮົາ ແລະ ໂດຍທ່ານເຈົ້າແຂວງສະຫວັນນະເຂດ ໄດ້ຖືສຳຄັນໃນວຽກງານດັ່ງກ່າວ ໄດ້ມີການບິແບ່ງເງິນເກີນແຜນຂອງແຂວງປີ 2023 ເພື່ອຊ່ວຍແກ້ໄຂຕື່ມຈຳນວນ 72 ຄົນ, ຍິງ 7 ຄົນ, ເປັນເງິນ 1.31 ຕື້ກວ່າກີບ (ປະຕິບັດໃນ 2 ນະໂຍບາຍຄື: ອຸດໜູນເສຍສະຫລະຊີວິດ 30 ຄົນ, ຍິງ 1 ຄົນ ແລະ ອຸດໜູນເທື່ອດຽວຍັງມີຊີວິດ 42 ຄົນ, ຍິງ 6 ຄົນ), ເຊິ່ງເປັນແຂວງດຽວໃນທົ່ວປະເທດໃນປີ 2024 ທີ່ເຈົ້າແຂວງໄດ້ແບ່ງເງິນຂອງແຂວງໃສ່ວຽກງານດັ່ງກ່າວຫຼາຍກວ່າໝູ່ ນອກນີ້, ການນຳຂອງແຂວງ ຍັງໄດ້ເອົາໃຈໃສ່ປະຕິບັດນະໂຍບາຍ ອື່ນໆນຳອີກ.
