ກອງກວດກາປ່າໄມ້ ແຂວງຊຽງຂວາງ ຈັດພິທີທຳລາຍສັດປ່າຫລາຍປະເພດທີ່ຍຶດໄດ້ລວມ 35.1 ກິໂລ

ວັນທີ 30 ທັນວາ 2024 ກອງກວດກາປ່າໄມ້ ພະແນກກະສິກຳ ແລະ ປ່າໄມ້ແຂວງຊຽງຂວາງ ຈັດພິທີທຳລາຍສັດປ່າທີ່ຕາຍແລ້ວ, ຊິ້ນສ່ວນສັດປ່າ ແລະ ປ່ອຍສັດປ່າທີ່ຍັງມີຊີວິດຄືນສູ່ທຳມະຊາດ.

ກອງກວດກາປ່າໄມ້ ພະແນກກະສິກຳ ແລະ ປ່າໄມ້ແຂວງຊຽງຂວາງ ລາຍງານວ່າ: ໃນໄລຍະຜ່ານມາເຈົ້າໜ້າທີ່ທີ່ກ່ຽວຂ້ອງໄດ້ລົງກວດກາການຊື້-ຂາຍສັດປ່າທີ່ຫວງຫ້າມຢູ່ຕະຫລາດນ້ຳຫງຳ ເມືອງແປກ, ຕະຫລາດດ່ານສາກົນນ້ຳກັ່ນ ເມືອງໜອງແຮດ ສາມາດຢຶດໄດ້ສັດປ່າໄດ້ 115 ໂຕ, ມີນ້ຳໜັກ 35.1 ກິໂລ, ລວມມີໂຕເຕົ່າ, ເຫງັນ, ກະຮອກ, ໄກ່ປ່າ, ໄກ່ຂວາ, ນົກຂໍ່, ນົກເປົ້າ, ເຈຍ, ນົກຊີດ, ໂຕຫອນ, ໝູປ່າ, ໂພ່ນເໝັ້ນ, ໂພ່ນຫອນ, ຊີ້ນເໜັ້ນຕາກແຫ້ງ, ມີຊິ້ນສ່ວນໂຕຫອນ 4 ກິໂລ. ສຳລັບສັດປ່າທີ່ຕາຍແລ້ວແມ່ນນຳໄປຈູດທຳລາຍຖີ້ມ, ສ່ວນສັດປ່າທີ່ຍັງມີຊີວິດແມ່ນນຳໄປປ່ອຍຄືນຢູ່ທຳມະຊາດ.