ກໍາປູເຈຍຫລຸດຄ່າທໍານຽມ ອີ-ວີຊາ ຫວັງດຶງດູດນັກທ່ອງທ່ຽວເພີ່ມຂຶ້ນ

      ລັດຖະບານກໍາປູເຈຍຫລຸດຄ່າທໍານຽມການກວດຈໍ້າກາເອເລັກໂຕຣນິກ ຫລື ອີ-ວີຊາ ສໍາລັບນັກທ່ອງທ່ຽວ, ນັກທຸລະກິດ ແລະ ບຸກຄົນທົ່ວໄປ ມີຜົນນັບແຕ່ວັນທີ 1 ມັງກອນ 2025 ເພື່ອເພີ່ມການດຶງດູດນັກທ່ອງທ່ຽວ ແລະ ນັກລົງທຶນ.

      ຄ່າທໍານຽມ ອີ-ວີຊາ ປະເພດນັກທ່ອງທ່ຽວ (e-visa T) ຈະຫລຸດລົງຈາກ 36 ໂດລາ ມາຢູ່ 30 ໂດລາ, ສ່ວນຄ່າທໍານຽມອີ-ວີຊາປະເພດທົ່ວໄປ (e-visa E) ຈະຫລຸດລົງຈາກ 42 ໂດລາ ມາຢູ່ 35 ໂດລາ.

      ສ່ວນສະມາຄົມການທ່ອງທ່ຽວອາຊີ-ປາຊີຟິກປະຈໍາກໍາປູເຈຍ ວິເຄາະວ່າ: ການຫລຸດລາຄາຄ່າທໍານຽມອາດບໍ່ຊ່ວຍກະຕຸ້ນອຸດສາຫະກໍາການທ່ອງທ່ຽວຫລາຍເທົ່າທີ່ຄວນ ແລະ ຮຽກຮ້ອງລັດຖະບານພິຈາລະນາການມອບສິ່ງຈູງໃຈດ້ານວີຊາແກ່ນັກທ່ອງທ່ຽວຈາກບາງປະເທດ ເຊິ່ງມີສະຖິຕິການຢ້ຽມຢາມກໍາປູເຈຍຫລາຍທີ່ສຸດ.

       ທັງນີ້, ຈໍານວນນັກທ່ອງທ່ຽວຕ່າງປະເທດທີ່ໄປທ່ຽວກໍາປູເຈຍ ລະຫວ່າງເດືອນມັງກອນ-ພະຈິກຜ່ານມາ ມີສະຖິຕິລວມປະມານ 6 ລ້ານຄົນ ເພີ່ມຂຶ້ນ 22% ເມື່ອທຽບໃສ່ແບບປີຕໍ່ປີ ແລະ 5 ປະເທດທີ່ມີນັກທ່ອງທ່ຽວເດີນທາງທ່ອງທ່ຽວກໍາປູເຈຍຫລາຍທີ່ສຸດ ໄດ້ແກ່ ໄທ, ຫວຽດນາມ, ຈີນ, ລາວ ແລະ ອາເມລິກາ.

       ປັດຈຸບັນ, ການທ່ອງທ່ຽວເປັນໜຶ່ງໃນອຸດສາຫະກໍາທີ່ເປັນເສົາຫລັກຄໍ້າຈູນເສດຖະກິດກໍາປູເຈຍ ນອກຈາກການສົ່ງອອກເຄື່ອງຕັດຫຍິບ, ເກີບ, ສິນຄ້າເພື່ອການເດີນທາງ, ກະສິກໍາ ແລະ ການກໍ່ສ້າງ-ອະລັງຫາລິມະສັບ.