ລະວັງ ! ອາຫານປົນເປື້ອນ
ໄລຍະນີ້ເຫັນວ່າບັນຍາກາດການຊື້-ຂາຍສີນຄ້າອຸປະໂພກ-ບໍລິໂພກໃນທ້ອງຕະຫລາດຕ່າງໆມີຄວາມຄືກຄື້ນດີ, ເພາະເປັນໄລຍະທີ່ປະຊາຊົນລາວບັນດາເຜົ່າໄດ້ສຸມຈິດສຸມໃຈຫ້າງກາກະກຽມໃຫ້ແກ່ການສະເຫລີມສະຫລອງປີໃໝ່ ພສ 2560 ທີ່ໄດ້ໝູນວຽນມາເຖິງອີກວາລະໜຶ່ງ. ຊຶ່ງຂະນະນັ້ນອາຫານແມ່ນເປັນສິ່ງທີ່ສັງຄົມມີຄວາມຕ້ອງການຫລາຍກວ່າປົກກະຕິ ແລະ ເປັນໂອກາດໃຫ້ຜູ້ປະກອບການ, ຜູ້ປູກ, ຜູ້ລ້ຽງ ແລະ ຊາວຄ້າຂາຍຕ່າງພາກັນຮີບຮ້ອນເກັບກ່ຽວ ຜົນຜະລິດ ແລະ ສີນຄ້າຂອງຕົນເພື່ອສະໜອງໃຫ້ສັງຄົມໄດ້ພຽງພໍ ແລະ ຄຽງຄູ່ກັນນັ້ນກໍມີຊາວຄ້າຂາຍຈໍານວນໜຶ່ງນໍາຜົນຜະລິດຂອງຕົນທີ່ບໍ່ທັນຮອດກໍານົດເກັບກ່ຽວ ແລະ ອາດຍັງມີສານເຄມີຕົກຄ້າງເຈືອປົນມານໍາຜົນຜະລິດ ເຊັ່ນ: ສານເລັ່ງໃຫ້ໃຫຍ່ໄວ, ຢາປາບສັດຕູພຶດ, ປຸ່ຍເຄມີ ແລະ ອື່ນໆ ທີ່ເປັນອັນ
ຕະລາຍຮ້າຍແຮງຕໍ່ສຸຂະພາບຂອງຄົນເຮົາ. ຄືດັ່ງຮູ້ນໍາກັນແລ້ວວ່າ, ປັດຈຸບັນການນໍາໃຊ້ສານເຄມີເຂົ້າໃນການຜະລິດກະສິກໍາຢູ່ໃນປະເທດເຮົາຍັງມີແຜ່ຫລາຍ, ນັບທັງໃນຕົວເມືອງ ແລະ ທ້ອງຖິ່ນຕ່າງໆ, ເຮັດໃຫ້ເກີດຜົນສະທ້ອນອັນບໍ່ດີຕໍ່ສິ່ງແວດລ້ອມ ແລະ ສັງຄົມຕາມມາ ເປັນຕົ້ນ: ການປູກກ້ວຍ, ລ້ຽງປາກະຊັງ, ລ້ຽງໝູ ແລະ ປູກພືດພັກຕ່າງໆ. ນອກຈາກນີ້ຢູ່ຕາມທ້ອງຕະຫລາດຫລາຍແຫ່ງກໍຍັງມີຊາວຄ້າຂາຍຈໍານວນໜຶ່ງລັກລອບເອົາສານກັນບູດ (ຟໍມາລີນ) ນໍາໃຊ້ແຊ່ອາຫານປະເພດປາ, ເຄື່ອງໃນສັດ ແລະ ອາຫານທະເລຕ່າງໆເພື່ອໃຫ້ມີສີສັນສົດຢູ່ຕະຫລອດເວລາ, ໂດຍບໍ່ຄໍານຶງເຖິງຄວາມອັນຕະລາຍຕໍ່ສຸຂະພາບຂອງຜູ້ບໍລິໂພກທີ່ຈະຕາມມາ.
ຕໍ່ບັນຫາດັ່ງກ່າວ, ພາກສ່ວນກ່ຽວຂ້ອງຕ້ອງມີມາດຕະການເຂັ້ມງວດກວ່າເກົ່າເພື່ອກວດກາຜົນຜະລິດ ແລະ ສີນຄ້າທີ່ຈະນໍາເຂົ້າໄປຈໍາໜ່າຍໃນທ້ອງຕະຫລາດ ແລະ ສະກັດກັ້ນການລັກລອບນໍາເຂົ້າສີນຄ້າທີ່ຜິດລະບຽບ, ພ້ອມທັງມີວິທີແນະນໍາປະຊາຊົນກໍຄືຜູ້ບໍລິໂພກໃຫ້ຮູ້ຈັກເລືອກຊື້ສີນຄ້າທີ່ມີຄຸນນະພາບ, ສະອາດ ແລະ ປອດໄພອີກດ້ວຍ.
