ຫວຽດນາມອອກກົດໝາຍໃໝ່ຕ້ອງກວດສອບຕົວຕົນຜູ້ໃຊ້ໂຊຊຽວມີເດຍ,ຫ້າມເດັກນ້ອຍທີ່ມີອາຍຸຕໍ່າກວ່າ 18 ປີ ຫລິ້ນເກມອອນລາຍ
ສໍານັກຂ່າວຫວຽດນາມ VNExpress ລາຍງານວັນທີ 25 ທັນວາ 2024 ວ່າ: ຫວຽດນາມປະກາດໃຊ້ກົດລະບຽບໃໝ່ພາຍໃຕ້ ລັດຖະດໍາລັດ147 ໂດຍກໍານົດໃຫ້ ແພັດຟອມອອນລາຍໃຫຍ່ໆ ໂດຍສະເພາະ ເຟສບຸກ ແລະ ຕິກຕັອກ ຕ້ອງກວດສອບຕົວຕົນຂອງຜູ້ໃຊ້ ແລະ ສົ່ງມອບຂໍ້ມູນໃຫ້ທາງການ ເລີ່ມມີຜົນບັງຄັບໃຊ້ໃນວັນທີ 25 ທັນວາ 2024 ໂດຍລະບຸວ່າ ເວັບໄຊໂຊຊຽວມີເດຍທັງໝົດ ຈະຕ້ອງກຽມຂໍ້ມູນກ່ຽວກັບ “ຈໍານວນການເຂົ້າເບິ່ງທັງໝົດໃນຫວຽດນາມ ແລະ ຈໍານວນຜູ້ໃຊ້ປົກກະຕິຕໍ່ເດືອນ” ສົ່ງໃຫ້ທາງການ ພາຍໃນເວລາ 90 ມື້.
ລັດຖະດໍາລັດ147 ໄດ້ຮັບການເສີມສ້າງຈາກກົດໝາຍຄວາມໝັ້ນຄົງທາງໄຊເບີໃນປີ 2018 ເຊິ່ງມີການວິພາກວິຈານຢ່າງຮຸນແຮງຈາກ ສ.ອາເມລິກາ, ສະຫະພາບເອີລົບ ແລະ ກຸ່ມຜູ້ສະໜັບສະໜູນເສລີພາບທາງອິນເຕີເນັດທີ່ບອກວ່າ ເປັນການຮຽນແບບການເຊັນເຊີອິນເຕີເນັດທີ່ເຂັ້ມງວດຂອງຈີນ.
ນອກຈາກນີ້ລັດຖະດໍາລັດຍັງລະບຸວ່າ ບັນຊີທີ່ໄດ້ຮັບການຢືນຢັນຕົວຕົນແລ້ວເທົ່ານັ້ນ ທີ່ຈະສາມາດຖ່າຍທອດສົດໄດ້ ນອກຈາກນີ້ ກົດໝາຍໃໝ່ຍັງໄດ້ລວມເຖິງການກໍາຈັດການຫລິ້ນເກມສໍາລັບຜູ້ທີ່ມີອາຍຸຕໍ່າກວ່າ 18 ປີ ເພື່ອປ້ອງກັນການຕິດເກມ.
ຂໍ້ມູນຈາກບໍລິສັດວິໄຈ Newzoo ລະບຸວ່າ ປະມານເຄິ່ງໜຶ່ງຂອງປະຊາກອນຫວຽດນາມຫລິ້ນເກມເປັນປະຈໍາ ໃນຂະນະທີ່ຈໍານວນໜຶ່ງໃຊ້ໂຊຊຽວມີເດຍ ໂດຍກະຊວງຂໍ້ມູນຂ່າວສານ ແລະ ການສື່ສານຂອງຫວຽດນາມປະເມີນວ່າ ປະເທດຫວຽດນາມ ມີຜູ້ໃຊ້ເຟສບຸກປະມານ 65 ລ້ານຄົນ, ຢູທູບ 60 ລ້ານຄົນ ແລະ ຕິກຕັອກ 20 ລ້ານຄົນ.
