ປະຊາຊົນເປັນຫວ່ງຕໍ່ການກໍ່ສ້າງເສັ້ນທາງຕານມີໄຊ-ໜອງບຶກມີຄວາມຊັກຊ້າ

ເມື່ອບໍ່ດົນມານີ້, ໜັງສືພິມລາວພັດທະນາໄດ້ຮັບຈົດໝາຍຈາກປະຊາຊົນຢູ່ບ້ານຕານມີໄຊ, ເມືອງໄຊທານີ, ນະຄອນຫລວງວຽງຈັນ, ໂດຍມີເນື້ອໃນສະເຖິງແດງຄວາມເປັນຫວ່ງເປັນໄຍຕໍ່ການກໍ່ສ້າງເສັ້ນທາງແຕ່ສີ່ແຍກໄຟແດງຕານມີໄຊ-ສາມແຍກໜອງບຶກ, ພາຍຫລັງເຫັນວ່າມີລັກສະ ນະຊັກຊ້າ ແລະ ອາດຈະເຮັດໃຫ້ການກໍ່ສ້າງ ແລະ ສະພາບການສັນຈອນໃນເສັ້ນທາງດັ່ງ

ກ່າວກໍອາດພົບຄວາມຫຍຸ້ງຍາກລໍາບາກຂຶ້ນຕື່ມເມື່ອກ້າວສູ່ໜ້າຝົນ. ເນື່ອງຈາກວ່າທາງເສັ້ນດັ່ງກ່າວຍັງບໍ່ທັນໄດ້ບຸກເບີກຖົມດິນເທື່ອ, ມີແຕ່ວາງທໍ່ລະບາຍນໍ້າເບື້ອງດຽວໄດ້ໄລຍະໃດໜຶ່ງເທົ່ານັ້ນ ແລະ ການກໍ່ສ້າງແມ່ນດໍາເນີນເລີ່ມມາໄດ້ຫລາຍເດືອນແລ້ວ, ແຕ່ຍັງບໍ່ທັນເຫັນມີຄວາມຄືບໜ້າຫລາຍປານໃດ, ຈຶ່ງສະເໜີໃຫ້ເຈົ້າຂອງໂຄງການ ກໍຄືພະແນກໂຍທາທິການ ແລະ ຂົນສົ່ງນະຄອນຫຼວງວຽງຈັນເອົາໃຈໃສ່ຊອກຫາທາງອອກເພື່ອຫລຸດຜ່ອນຜົນກະທົບດ້ານສິ່ງແວດລ້ອມຍ້ອນການກໍ່ສ້າງຊັກຊ້າ, ເນື່ອງຈາກເສັ້ນທາງສາຍນີ້ມີລົດທ່ຽວເປັນຈໍານວນຫລາຍໃນແຕ່ລະວັນ.

ແນວໃດກໍຕາມ, ທ່ານຫົວໜ້າພະແນກໂຍທາທິການ ແລະ ຂົນສົ່ງນະຄອນຫລວງວຽງຈັນທ່ານ ເດດສົງຄາມ ທໍາມະວົງ ເຄີຍໄດ້ໃຫ້ສໍາພາດນັກຂ່າວເມື່ອບໍ່ດົນມານີ້ວ່າ: ເສັ້ນທາງດັ່ງກ່າວມີຄວາມຍາວ 9 ກວ່າກິໂລແມັດ, ພື້ນທາງໜາ 20 ຊັງຕີແມັດ, ມີຄວາມກວ້າງ 28 ແມັດ, ມີ 6 ຊ່ອງຈາລາຈອນ, ມີຄູກາງທາງກວ້າງ 2,7 ແມັດ, ມີທາງຄົນຍ່າງສອງຟາກກວ້າງ 1,50 ແມັດ, ມີລະບົບລະບາຍນ້ຳສອງຟາກ ແລະ ຕິດຕັ້ງລະບົບໄຟເຍືອງທາງຄົບຊຸດ, ໂດຍມີມູນຄ່າກໍ່ສ້າງ 368 ຕື້ກວ່າກີບ. ປັດຈຸບັນໂຄງການມີຄວາມຄືບໜ້າປະມານ 10% ແລະ ພວມຢູ່ໃນໄລຍະກຽມດິນ, ການຍົກຍ້າຍສິ່ງກີດຂວາງ, ເຊິ່ງຄາດວ່າຈະໃຫ້ສຳເລັດໃນທ້າຍປີ 2018 ທີ່ຈະມາເຖິງນີ້.