ແຂວງຫົວພັນ ອະໄພຍະໂທດດ້ວຍການຫຼຸດຜ່ອນໂທດ ແລະ ປ່ອຍຕົວນັກໂທດ 23 ຄົນ

ປກສ ແຂວງຫົວພັນ ລາຍງານວ່າ: ວັນທີ 18 ທັນວາ 2024 ຜ່ານມານີ້ ອົງການໄອຍະການປະຊາຊົນ ແຂວງຫົວພັນໄດ້ປະກາດອະໄພຍະໂທດນັກໂທດທີ່ຄົບຕາມເງື່ອນໄຂສະເໜີຂໍອະໄພຍະໂທດດ້ວຍການຫຼຸດຜ່ອນໂທດ ແລະ ປ່ອຍຕົວ ປະຈໍາປີ 2024 ມີ 23 ຄົນ ຍິງ 1 ຄົນ, ໃນນີ້, ປ່ອຍຕົວ 1 ຄົນ, ອະໄພຍະໂທດດ້ວຍການຫຼຸດຜ່ອນໂທດ 22 ຄົນ ເນື່ອງໃນໂອກາດວັນຊາດທີ 2 ທັນວາ ຄົບຮອບ 49 ປີ.

ພິທີດັ່ງກ່າວໄດ້ຈັດຂຶ້ນເມື່ອມໍ່ໆມານີ້ ທີ່ສູນວັງລົມ ເມືອງຊໍາເໜືອ ແຂວງຫົວພັນ, ໂດຍການເຂົ້າຮ່ວມພິທີຂອງ ທ່ານ ດາວເພັດ ພົມສຸວັນ ຫົວໜ້າອົງການໄອຍະການປະຊາຊົນ ແຂວງຫົວພັນ.

ອະໄພຍະໂທດນັກໂທດແມ່ນ ປະຕິບັດຕາມລັດຖະດໍາລັດຂອງປະທານປະເທດ ສະບັບເລກທີ 248 ລົງວັນທີ 26 ພະຈິກ 2024 ວ່າດ້ວຍການອະໄພຍະໂທດແກ່ນັກໂທດທີ່ມີຄວາມກ້າວໜ້າໃນຂອບເຂດທົ່ວປະເທດ.