ແຂ່ງຂັນຄາຣາເຕໂດຊີງແຊ້ມທົ່ວປະເທດ ຈະເປີດສາກຂຶ້ນເດືອນທັນວານີ້

ສະຫະພັນຄາຣາເຕໂດແຫ່ງຊາດລາວ ຮ່ວມກັບສະຫະພັນຄາຣາເຕໂດ ນະຄອນຫລວງວຽງຈັນ ກຽມເປີດສາກການແຂ່ງຂັນຊີງແຊ້ມທົ່ວປະເທດຂຶ້ນໃນກາງເດືອນທັນວານີ້ ມີ 28 ລາຍການໃນ 2 ປະເພດ ເພື່ອຝຶກຊ້ອມ ແລະ ຄັດເລືອກເອົານັກກິລາເຂົ້າຮ່ວມການແຂ່ງຂັນກິລາແຫ່ງຊາດລາວ ທີ່ແຂວງຊຽງຂວາງເປັນເຈົ້າພາບປີ 2018.

ທ່ານນາງ ຈັນສຸດາ ເພັດສີຣີແສງ ຄະນະກໍາມະການຈັດການແຂ່ງຂັນຄາຣາເຕໂດ ໃຫ້ສໍາພາດວ່າ: ການແຂ່ງຂັນຄາຣາເຕໂດຊີງແຊ້ມທົ່ວປະເທດ ຈະຈັດຂຶ້ນລະຫວ່າງວັນທີ 16-17 ທັນວານີ້ ທີ່ສະໜາມກິລາບູໂດ ຂ້າງສະໜາມກິລາເຈົ້າອານຸວົງ ນະຄອນຫລວງວຽງຈັນ ໂດຍຈະແຂ່ງຂັນ 28 ລາຍການໃນ 2 ປະເພດຄື: ການຕໍ່ສູ້ກຸມິເຕ້ ແລະ ຟ້ອນກາຕ້າ ເຊິ່ງມາຮອດປັດຈຸບັນມີສະໂມສອນທີ່ລົງທະບຽນເຂົ້າແຂ່ງຂັນແລ້ວ 6 ສະໂມສອນປະກອບມີ: ສະໂມສອນສີໂຄດຕະບອງ, ເຈຄາເອລາວ, ໂຊໂຕກັງລາວ, ຊິຕາລິວ, ກອງທັບ ແລະ ສະໂມສອນຊາວໜຸ່ມລາວ. ການແຂ່ງຂັນຄັ້ງນີ້ນອກຈາກຈະເປັນການແຂ່ງຂັນຊີງແຊ້ມທົ່ວປະເທດ​ແລ້ວ ຍັງເປັນການຈັດຕັ້ງປະຕິບັດການເຄື່ອນໄຫວຂອງສະຫະພັນປະຈໍາປີ 2017 ໃຫ້ມີຂະບວນຟົດຟື້ນ, ຄຶກຄື້ນ ແລະ ມ່ວນຊື່ນໃນສະຫະພັນຄາຣາເຕໂດແຫ່ງຊາດລາວ ເພາະໄລຍະຜ່ານມາພວກເຮົາຈັດການແຂ່ງຂັນພຽງແຕ່ຂັ້ນນະຄອນຫລວງວຽງຈັນເທົ່ານັ້ນ. ດັ່ງນັ້ນ, ທາງຄະນະສະຫະພັນຂອງພວກເຮົາຈຶ່ງໄດ້ສົມທົບກັບສະຫະພັນຂອງນະຄອນຫລວງວຽງຈັນຈັດການແຂ່ງຂັນຄັ້ງນີ້ຂຶ້ນ ທັງນີ້ເພື່ອຝຶກຊ້ອມນັກກິລາຮຸ້ນສືບທອດ ແລະ ຄັດເລືອກເອົານັກກິລາບັນຈຸເຂົ້າທີມຊາດລາວກຽມເຂົ້າຮ່ວມການແຂ່ງຂັນຕ່າງໆໃນພາກພື້ນ ແລະ ສາກົນ.

ສໍາລັບການແຂ່ງຂັນແຕ່ລະລາຍການແມ່ນຈະແຂ່ງຂັນເພື່ອສະສົມຄະແນນເຂົ້າຮອບຊີງອັນດັບທີ 1 ຂອງແຕ່ປະເພດ ສ່ວນລາງວັນອັນດັບທີ 1 ຈະຮັບຫລຽນຄໍາ, ອັນດັບທີ 2 ຈະຮັບຫລຽນເງິນ, ອັນດັບທີ 3 ຈະໄດ້ຮັບຫລຽນທອງ ເຊິ່ງແຕ່ລະລາຍການແມ່ນຈະຮັບຄືກັນໝົດ.