ເຮືອບິນອາເຊີໄບຈານຕົກຢູ່ກາຊັກສະຖານ ມີຜູ້ເສຍຊີວິດຫລາຍສິບຄົນ

       ເຮືອບິນໂດຍສານຂອງອາເຊີໄບຈານ ແອລາຍ ຕົກຢູ່ກາຊັກສະຖານ ພົບຜູ້ລອດຊີວິດແລ້ວ 28 ຄົນ ຈາກຈໍານວນຜູ້ຢູ່ໃນເຮືອບິນ 67 ຄົນ.

       ກະຊວງຄົມມະນາຄົມຂອງກາຊັກສະຖານຖະແຫລງວ່າ: ຖ້ຽວບິນ JL-8243 ຂອງສາຍການບິນອາເຊີໄບຈານ ແອລາຍ ເຊິ່ງໃຊ້ເຮືອບິນໂດຍສານລຸ້ນເອັມບຣາເອີ ອີ190 ພ້ອມຜູ້ໂດຍສານ 62 ຄົນ ແລະ ຈຸບິນ 5 ຄົນ ຢູ່ລະຫວ່າງເດີນທາງຈາກນະຄອນຫລວງບາກູ ຂອງອາເຊີໄບຈານໄປເມືອງກໍຊານີ ທາງພາກໃຕ້ຂອງຣັດເຊຍ.

       ເຖິງຢ່າງໃດກໍຕາມ, ເຮືອບິນເກີດອຸປະຕິເຫດຕົກໃກ້ກັບເມືອງອັດເຕົາ ທາງຕາເວັນຕົກຂອງກາຊັກສະຖານ ສົ່ງຜົນເຮັດໃຫ້ເກີດໄຟໄໝ້, ເບື້ອງຕົ້ນເຈົ້າໜ້າທີ່ກູ້ໄພພົບຜູ້ລອດຊີວິດຢ່າງໜ້ອຍ 28 ຄົນ ແລະ ເລັ່ງນໍາສົ່ງຜູ້ປະສົບໄພສົ່ງໂຮງໝໍໃກ້ຄຽງແລ້ວ. ສ່ວນສາເຫດການຕົກຂອງເຮືອບິນລໍານີ້ຈະເຂົ້າສູ່ຂະບວນການສືບສວນ-ສອບສວນ ໂດຍໜ່ວຍງານທີ່ກ່ຽວຂ້ອງຕໍ່ໄປ.