ນັກທ່ອງທ່ຽວຄົນອັງກິດເສຍຊີວິດຢູ່ລີສອດຊຽງໃໝ່ ຫລັງຈາກຊື້ເຫັດຂີ້ຄວາຍມາກິນ

ສໍານັກຂ່າວຕ່າງປະເທດລາຍງານວັນທີ 24 ທັນວາ 2024 ວ່າ: ເກີດເຫດນັກທ່ອງທ່ຽວຄົນອັງກິດ ອາຍຸ 25 ປີ ເສຍຊີວິດ ຫລັງຈາກຊື້ເຫັດວິເສດຈາກປະຕູທ່າແພມາກິນທີ່ຫ້ອງພັກໃນລີສອດແຫ່ງໜຶ່ງທີ່ຈັງຫວັດ ຊຽງໃໝ່ ປະເທດໄທ ເມື່ອວັນທີ 20 ທັນວາ 2024.

ຕາມສື່ທ້ອງຖິ່ນລາຍງານວ່າ: ຜູ້ເສຍຊີວິດເປັນຄົນອັງກິດ ອາຍຸ 25 ປີ ໄດ້ເດີນທາງມາພັກຜ່ອນໃນຊຽງໃໝ່ພ້ອມແຟນສາວ ຫລັງກັບມາຈາກການຖ່າຍຮູບທີ່ປະຕູທ່າແພ ທີ່ເປັນຈຸດແລນມາກມີຊື່ສຽງ, ໄດ້ຍ່າງເລາະຊື້ິເຫັດວິເສດທີ່ເປັນຢາເສບຕິດເຊິ່ງໄດ້ຮັບຄວາມນິຍົມຫລາຍທາງເບື້ອງປະເທດເອີຣົບ ເຊິ່ງມີການລັກລອບຂາຍຢູ່ບໍລິເວນຈຸດແລນມາກດັ່ງກ່າວ. ຫລັງຈາກມາຮອດຫ້ອງພັກ ຊາຍນັກທ່ອງທ່ຽວຄົນນັ້ນກໍໄດ້ກິນເຫັດເຂົ້າໄປ ຫລັງຈາກນັ້ນ 40 ນາທີ ຕໍ່ມາກໍມີນໍ້າລາຍອອກປາກ ແລ້ວຊັອກເສຍຊີວິດຄາຫ້ອງພັກ.

ຈາກການຫາສາເຫດຂອງເຈົ້າໜ້າທີ່ຕໍາຫລວດພົບວ່າ ຜູ້ກ່ຽວກິນເຫັດຂີ້ຄວາຍເຂົ້າໄປໃນປະລິມານຫລາຍ ຈຶ່ງໄດ້ສອບສວນແຟນສາວ ແລະ ໄດ້ຮູ້ວ່າພວກເຂົາຊື້ເຫັດມາຈາກຮ້ານແຖວປະຕູທ່າແພ.

ຫລ້າສຸດວັນທີ 23 ທັນວາ 2024 ຕໍາຫລວດສືບສວນ ພ້ອມກັບຕໍາຫລວດທ່ອງທ່ຽວ ໄດ້ສົ່ງສາຍລັບເຂົ້າໄປຫລອກຊື້ເຫັດຂີ້ຄວາຍຢູ່ຮ້ານດັ່ງກ່າວ ຈໍານວນ 1 ຖົງ, ກ່ອນຈະເຂົ້າຈັບກຸມເຈົ້າຂອງຮ້ານ ແລະ ກວດຄົ້ນພາຍໃນຮ້ານ ເຊິ່ງພົບເຫັນເຫັດຂີ້ຄວາຍຫລາຍກິໂລກຣາມ.

ຂໍ້ມູນຈາກ

https://www.mirror.co.uk/news/uk-news/breaking-brit-tourist-dies-thailand-34371023