(ຄລິບ) ນັອກໄວທີ່ສຸດໃນປະຫວັດສາດມວຍໂລກ WBO ມັດດຽວ 11 ວິນາທີ ຫລັບກາງເວທີ
ໂຊລານີ ເຕເຕ້ ນັກຊົກແຊ້ມໂລກ ຮຸ້ນແບນຕ້ຳເວທ ອົງການມວຍໂລກ (WBO) ຊາວອາຟຣິກາໃຕ້ ກາຍເປັນນັກມວຍສະຖາບັນຫລັກຂອງໂລກ ທີ່ຈັດການນັອກຄູ່ແຂ່ງໄດ້ໄວທີ່ສຸດໃນປະຫວັດສາດ.
ຫລັງຈາກປ່ອຍມັດຮຸກຂວາເຂົ້າເຕັມຄາງຂອງ ຊິບອນນິໂຊ່ ກອນຢ່າ ເພື່ອນຮ່ວມຊາດ ຈົນຫລັບກາງເວທີ ຕັ້ງແຕ່ຍົກທຳອິດ ໃນການຊົກທີ່ ເອສເອສອີ ອາຣີນ່າ ປະເທດອຽກລັງເໜືອ ໃນວັນທີ 18 ພະຈິກ.
ໂດຍສະຖິຕິທັນທີທີ່ລະຄັງຍົກທຳອິດດັງຂຶ້ນ ຈົນເຖິງການນັອກນັ້ນ ລະບຸວ່າໃຊ້ເວລາທັງໝົດ 11 ວິນາທີ ຂອງຍົກທຳອິດ, ແຕ່ຖ້າຈະນັບຕົວຈິງ ມັດທີ່ເຮັດໃຫ້ ໂຊລານີ ເຕເຕ້ ກາຍເປັນປະຫວັດສາດໜ້າໃໝ່ ອາດຈະຢູ່ທີ່ 6 ວິນາທີເທົ່ານັ້ນ.
ທັງນີ້, ການຊົກນັດນີ້ ເຮັດໃຫ້ ໂຊລານີ ເຕເຕ້ ອາຍຸ 29 ປີ ຍັງຮັກສາແຊ້ມໂລກ WBO ອົງການມວຍໂລກ ໄວ້ໄດ້ຕໍ່ໄປ ດ້ວຍສະຖິຕິ ຊະນະ 26 ນັດ ຈາກການຊົກ 29 ນັດ ແລະ ເປັນການນັອກຄູ່ແຂ່ງເຖິງ 21 ນັດ ແລະ ເສຍພຽງ 3 ນັດ.
