ລຸກລາມໜັກ ! ອັງກິດພົບໄຂ້ຫວັດສັດປີກລະບາດຫລາຍແຫ່ງທົ່ວປະເທດ

       ຟາມນົກທົ່ວພາກຕາເວັນອອກຂອງອັງກິດເລີ່ມບັງຄັບໃຊ້ມາດຕະການປ້ອງກັນພະຍາດໄຂ້ຫວັດສັດປີກ ຫລັງມີການກວດພົບການຕິດເຊື້ອໄວຣັສຫລາຍກໍລະນີໃນການແຜ່ລະບາດຄັ້ງຫລ້າສຸດ.

       ກະຊວງສິ່ງແວດລ້ອມ, ອາຫານ ແລະ ກິດຈະການຊົນນະບົດຂອງອັງກິດ ລະບຸວ່າ: ທາງການພົບກໍລະນີການລະບາດຂອງພະຍາດໄຂ້ຫວັດສັດປີກເພີ່ມຂຶ້ນໃນເຂດນໍຟອກ ທາງຕາເວັນອອກຂອງອັງກິດ ແລະ ເຂດອີສໄຣດິງອອກຍອກເຊຍ ທາງຕາເວັນອອກສຽງເໜືອຂອງອັງກິດ ໃນອາທິດຜ່ານມາ.

       ຫລ້າສຸດ, ກະຊວງດັ່ງກ່າວຕັດສິນໃຈກໍາຈັດນົກລ່ວງໜ້າ ແລະ ບັງຄັບໃຊ້ເຂດປ້ອງກັນ 3 ກິໂລແມັດ ຢູ່ຟາມແຫ່ງໜຶ່ງໃນເຂດນໍຟອກ ຫລັງມີລາຍງານວ່າ: ອາດມີການແຜ່ລະບາດຂອງໄຂ້ຫວັດສັດປີກຊະນິດສ້າງພະຍາດຮຸນແຮງ (HPAI).

       ນອກຈາກນີ້, ເຂດປ້ອງກັນໄຂ້ຫວັດສັດປີກລະດັບທ້ອງຖິ່ນ ທີ່ມີເປົ້າໝາຍເພື່ອປ້ອງກັນການແຜ່ລະບາດເພີ່ມຕື່ມ ຖືກບັງຄັບໃຊ້ທົ່ວທາງຕາເວັນອອກຂອງອັງກິດ ລວມທັງເຂດລິນຄອນເຊຍ ແລະ ເຂດຊັບຟອກເຊັ່ນກັນ.

       ຄວາມສ່ຽງທີ່ປະເມີນໄວ້ສໍາລັບການຕິດເຊື້ອໄວຣັສໄຂ້ຫວັດສັດປີກໃນນົກປ່າເພີ່ມຂຶ້ນເປັນລະດັບສູງໃນອັງກິດ. ອີກທັງທາງການອັງກິດຍັງເພີ່ມຄວາມສ່ຽງໃນສັດປີກໃຫ້ຢູ່ລະຫວ່າງລະດັບປານກາງກັບລະດັບສູງ.

      ມາຮອດປັດຈຸບັນ, ອັງກິດກວດພົບການຕິດເຊື້ອໄວຣັສໄຂ້ຫວັດສັດປີກສາຍພັນ H5N1 ຈໍານວນ 11 ກໍລະນີ ແລະ ສາຍພັນ H5N5 ອີກ 1 ກໍລະນີ ໃນການລະບາດຄັ້ງຫລ້າສຸດ ໂດຍມີລາຍງານການແຜ່ລະບາດຄັ້ງທໍາອິດໃນເດືອນພຶດສະພາຜ່ານມາ ແລະ ຍັງບໍ່ມີການຢືນຢັນພົບການຕິດເຊື້ອໃດໆໃນສະກອດແລນ ແລະ ເວວ.