ອາເມລິກາຂຶ້ນບັນຊີດຳເຄືອຂ່າຍ ຟອກເງິນເຊື່ອມໂຍງອີຣານ
ລັດຖະບານວໍຊິງຕັນອອກມາດຕະການຂວ້ຳບາດບໍລິສັດ ແລະ ບຸກຄົນທີ່ຖືເປັນ “ເຄືອຂ່າຍ” ການຜະລິດທະນະບັດປອມສະກຸນເງິນຣຽວເຢເມນ ໃຫ້ກັບກອງກຳລັງພິທັກປະຕິວັດອີຣານ.
Treasury designates large-scale IRGC-Qods Force counterfeiting ring. Iranian network prints counterfeit Yemeni Bank Notes for IRGC-Qods Force: https://t.co/dpED23ZctV
— Treasury Department (@USTreasury) November 20, 2017
ສຳນັກຂ່າວຕ່າງປະເທດລາຍງານຈາກນະຄອນຫລວງວໍຊິງຕັນ ປະເທດສະຫະລັດອາເມລິກາ ໃນວັນທີ 21 ພະຈິກວ່າ: ກະຊວງການເງິນອາເມລິກາອອກຖະແຫລງການໃນວັນທີ 20 ພະຈິກ ຂຶ້ນບັນຊີດຳນິຕິບຸກຄົນສັນຊາດອີຣານ 4 ແຫ່ງ ແລະ ບຸກຄົນທຳມະດາອີກ 2 ຄົນ ໜຶ່ງໃນນັ້ນເປັນຊາວອີຣານ ໃນຖານະເປັນ “ເຄືອຂ່າຍຟອກເງິນ” ໂດຍການພິມທະນະບັດປອມສະກຸນເງິນຣຽວເຢເມນໃຫ້ໜ່ວຍຮົບພິເສດ “ຄຸດສ໌” ເຊິ່ງເປັນກອງກຳລັງຕ່າງປະເທດພາຍໃຕ້ສັງກັດກອງກຳລັງພິທັກປະຕິວັດອີຣານ (IRGC) ໂດຍລາຍງານຂອງລັດຖະບານວໍຊິງຕັນລະບຸອີກວ່າ: ການເຮັດທະນະບັດປອມສະກຸນເງິນຣຽວເຢເມນໃນຄັ້ງນີ້ມີມູນຄ່າຄວາມເສຍຫາຍ “ຫລາຍຮ້ອຍລ້ານໂດລາສະຫະລັດ”.
ທັງນີ້, ກອງກຳລັງຄຸດສ໌ຂອງ IRGC ມີຊື່ຢູ່ໃນບັນຊີການຂວ້ຳບາດຂອງອາເມລິກາມາແຕ່ປີ 2007, ຂະນະທີ່ຢ້ອນກັບໄປໃນເດືອນຕຸລາຜ່ານມາ, ລັດຖະບານວໍຊິງຕັນຂອງປະທານາທິບໍດີ ໂດນັນ ທຣຳ ອອກມາດຕະການຂວ້ຳບາດໂດຍກົງຕໍ່ IRGC ເຊິ່ງເປັນກອງກຳລັງທີ່ຂຶ້ນກົງຕໍ່ທ່ານ ຢາຕໍເລາະ ອາລີ ກາເມນີ ໃນຂໍ້ກ່າວຫາສະໜັບສະໜູນກຸ່ມເຮັດໂບລາ, ກຸ່ມຮາມັດ ແລະ ກຸ່ມຕາລີບັນ.
ໃນເວລາດຽວກັນ, ທ່ານ ຮຳຊັນ ນາສຣາລເລາະ ຫົວໜ້າກຸ່ມເຮັດໂບລາ ກ່າວຜ່ານສະຖານີໂທລະພາບຢູ່ລີບັງ ປະຕິເສດຂໍ້ກ່າວຫາຂອງສັນນິບາດອາຣັບວ່າ: ບໍ່ໄດ້ມອບການສະໜັບສະໜູນດ້ານອາວຸດໃຫ້ແກ່ຮູຕີຢູ່ເຢເມນຕາມການກ່າວຫາຂອງອີກຝ່າຍ. ພ້ອມທັງຢືນຢັນວ່າ: ບໍ່ເຄີຍເຄື່ອນໄຫວແບບດຽວກັນນີ້ຢູ່ກູເວດ, ບາເຣນ, ຊີຣີ ແລະ ອີຣັກ “ຫາກບໍ່ໄດ້ຮັບການຮ້ອງຂໍ“ ຈາກລັດຖະບານຂອງປະເທດນັ້ນ.
