ນະຄອນຫລວງວຽງຈັນ ຍັງມີຄອບຄົວທຸກຍາກເຫລືອພຽງ 899 ຄອບຄົວ ຈາກທັງໝົດ 156,392 ຄອບຄົວ

ທ່ານ ແສງອາລຸນ ສຸລິຍະວົງ ຫົວໜ້າພະແນກກະສິກໍາ ແລະ ປ່າໄມ້ ນະຄອນຫລວງວຽງຈັນ ລາຍງານຕໍ່ກອງປະຊູມສະໄໝສາມັນເທື່ອທີ 8 ຂອງສະພາປະຊາຊົນນະຄອນຫລວງວຽງຈັນ ຊຸດທີ II ໃນວັນທີ 18 ທັນວາ 2024 ຜ່ານມານີ້ວ່າ: ນະຄອນຫລວງວຽງຈັນ ປະກອບມີ 9 ເມືອງ, 481 ບ້ານ, 13,137ໜ່ວຍ, ມີທັງໝົດ 156,392 ຄອບຄົວ, ພົນລະເມືອງທັງໝົດ 752,387 ຄົນ, ຍິງ 387,755 ຄົນ, ໃນນີ້ມີຄອບຄົວພົ້ນທຸກ 155,493 ຄອບຄົວ, ເທົ່າກັບ 99,43%, ຄອບຄົວທຸກຍາກຍັງເຫລືອ 899 ຄອບຄົວ, ເທົ່າກັບ 0.57%, ມີຄອບ ຄົວພັດທະນາ 142,698 ຄອບຄົວ, ເທົ່າກັບ 91.24 %, ຄອບ ຄົວບໍ່ພັດທະນາ 10,268 ຄອບຄົວ, ເທົ່າກັບ 6.57%, ບ້ານພັດທະນາ 379 ບ້ານ, ເທົ່າກັບ 78.79% , ຍັງບໍ່ທັນບັນລຸ 102 ບ້ານ, ເທົ່າກັບ 21.21%.

ໃນຈໍານວນ 481 ບ້ານທີ່ມີທັງໝົດໃນນະຄອນຫລວງວຽງ ຈັນ ແມ່ນພົ້ນທຸກແລ້ວ 100%, ສ່ວນບ້ານາພັດທະນາສ້າງໄດ້ 379 ບ້ານ, ເທົ່າກັບ 78.79%. ນອກຈາກນີ້ ຍັງສາມາດສ້າງບ້ານໃຫຍ່ເປັນຕົວເມືອງ ນ້ອຍໃນຊົນນະບົດ ບັນລູ 16 ມາດຕະຖານ ຈໍານວນ 2 ບ້ານຢູ່ ເມືອງສັງທອງ ຄື: ບ້ານໃຫຍ່ນາຈະເລີນ ແລະ ບ້ານຊໍ້, ເມືອງພົ້ນທຸກໄດ້ຮັບໃບຢັ້ງຈາກລັດຖະບານ ຈຳນວນ 9 ເມືອງ, ເມືອງເຂັ້ມແຂງຮອບດ້ານ ບັນລຸ 7 ເມືອງ,ໄດ້ຮັບໃຍຢັ້ງຈາກລັດຖະບານ ຈຳນວນ 5 ເມືອງ, ຍັງຢູ່ໃນຂັ້ນຕອນນຳສະເໜີ 2 ເມືອງ ແລະ ຍັງບໍ່ບັນລຸ 2 ເມືອງ ຄື: ເມືອງໄຊທານີ ແລະ ເມືອງປາກງື່ມ.