ຍອດເກີນດູນການຄ້າຍີ່ປຸ່ນ ເດືອນຕຸລາຫລຸດລົງເກືອບເຄິ່ງ
ກະຊວງການເງິນຍີ່ປຸ່ນແຈ້ງວ່າ: ຍອດເກີນດູນການຄ້າເດືອນຕຸລາປີນີ້ຫລຸດລົງເຖິງ 40,7% ຈາກເດືອນດຽວກັນປີກ່ອນ ເນື່ອງຈາກຍອດສົ່ງອອກທີ່ເພີ່ມຂຶ້ນຖືກປິດບັງຈາກຍອດນຳເຂົ້ານ້ຳມັນ ແລະ ຜະລິດຕະພັນປິໂຕຣລຽມທີ່ລາຄາປັບສູງຂຶ້ນ.
ເດືອນຕຸລາປີນີ້ ຍີ່ປຸ່ນໄດ້ດຸນການຄ້າ 285.400 ລ້ານເຢນ ຫລຸດລົງຈາກ 481.200 ລ້ານເຢນ ໃນເດືອນດຽວກັນປີກ່ອນ ແລະ ຕໍ່າກວ່າຕະຫລາດຄາດໝາຍວ່າຈະໄດ້ດຸນການຄ້າ 330.000 ລ້ານເຢນ, ແຕ່ຍັງໄດ້ດຸນການຄ້າເປັນເດືອນທີ 5 ຕິດຕໍ່ກັນ, ຍອດການສົ່ງອອກເພີ່ມຂຶ້ນເປັນເດືອນທີ 11 ຕິດຕໍ່ກັນ ເພາະສົ່ງອອກລົດຍົນ ແລະ ຊິ້ນສ່ວນເອເລັກໂຕຣນິກເພີ່ມຂຶ້ນ. ຂະນະທີ່ຍອດການນຳເຂົ້າເພີ່ມຂຶ້ນເປັນເດືອນທີ 10 ຕິດຕໍ່ກັນ ເພາະລາຄານ້ຳມັນດິບ, ຜະລິດຕະພັນປິໂຕຣລຽມ ແລະ ຖ່ານຫີນປັບເພີ່ມຂຶ້ນ. ອີກທັງຍັງເປັນຜົນຈາກການທີ່ເງິນເຢນອ່ອນຄ່າລົງ 9,8% ທຽບໃສ່ໂດລາສະຫະລັດ.
ສ່ວນການຄ້າກັບອາເມລິກາ, ຍີ່ປຸ່ນໄດ້ດຸນເພີ່ມຂຶ້ນ 11,3% ເພີ່ມຂຶ້ນເປັນເດືອນທີ 4 ຕິດຕໍ່ກັນ ເພາະສົ່ງອອກເຄື່ອງປັ່ນໄຟ, ເຄື່ອງຈັກໃນການກໍ່ສ້າງ ແລະ ຊິ້ນສ່ວນຄອມພິວເຕີເພີ່ມຂຶ້ນ, ແຕ່ຂາດດຸນໃຫ້ແກ່ສະຫະພາບເອີຣົບ (EU) ເປັນຄັ້ງທຳອິດໃນຮອບ 2 ເດືອນ ແລະ ຂາດດຸນໃຫ້ແກ່ຈີນຫລຸດລົງ.
