ຝຣັ່ງຈະຮັບຜູ້ອົບພະຍົບຊາວອາຟຣິກາ ທີ່ໄດ້ຮັບການຊ່ວຍເຫລືອຈາກ ລີບີໂດຍ ສປຊ
ເຈົ້າໜ້າທີ່ຂອງທາງການຝຣັ່ງເປີດເຜີຍໃນວັນທີ 20 ພະຈິກວ່າ: ຝຣັ່ງຈະເປັນປະເທດທຳອິດທີ່ຮັບຜູ້ອົບພະຍົບຊາວອາຟຣິກາທີ່ໜ່ວຍງານຜູ້ລີ້ໄພຂອງສະຫະປະຊາຊາດນຳຕົວອອກຈາກລີບີໄປນິເຊ.
ສຳນັກງານຂ້າຫລວງໃຫຍ່ຜູ້ລີ້ໄພແຫ່ງສະຫະປະຊາຊາດ ຫລື UNHCR ນຳເອົາຜູ້ອົບພະຍົບດັ່ງກ່າວ ເຊິ່ງເປັນຊາວເອຣິເຕຣຍ, ເອທິໂອປີ ແລະ ຊູດັງໄປນິເຊໃນວັນທີ 11 ພະຈິກ ແລະ ກະຊວງປ້ອງກັນປະເທດຝຣັ່ງລະບຸວ່າ: ຜູ້ອົບພະຍົບທັງ 25 ຄົນ ເຊິ່ງໃນຈຳນວນນີ້ເປັນຍິງ 15 ຄົນ ແລະ ເດັກ 4 ຄົນຈະເດີນທາງເຖິງຝຣັ່ງປະມານເດືອນກໍລະກົດປີໜ້າ. ລີບີກາຍເປັນຈຸດຜ່ານສຳຄັນສຳລັບຜູ້ອົບພະຍົບທີ່ກຳລັງພະຍາຍາມເດີນທາງໄປເອີຣົບ, ແຕ່ຫລາຍຄົນພັດກາຍເປັນເຫຍື່ອຂອງແກ້ງຄ້າມະນຸດ.
ເຈົ້າໜ້າທີ່ລະດັບສູງຂອງອົງການຄຸ້ມຄອງຜູ້ລີ້ໄພ ແລະ ຄົນໄຮ້ລັດແຫ່ງຝຣັ່ງ ລະບຸວ່າ: ຜູ້ອົບພະຍົບເຫລົ່ານີ້ຈະໄດ້ຮັບສະຖານະຜູ້ລີ້ໄພໃນທັນທີທີ່ເດີນທາງເຖິງຝຣັ່ງ. ພ້ອມກັນນີ້ ຍັງໄດ້ຮຽກຮ້ອງໃຫ້ປະເທດອື່ນໃນເອີຣົບ, ອາເມລິກາ ແລະ ການາດາ ດຳເນີນການເຊັ່ນດຽວກັນ. ນອກຈາກນີ້ ຍັງມີລາຍງານວ່າ: ຜູ້ອົບພະຍົບອີກ 47 ຄົນທີ່ຢູ່ນິເຊແລ້ວ, ຝຣັ່ງກໍຈະຮັບໄວ້ເຊັ່ນກັນ.
