21-23 ພະຈິກນີ້, ອາກາດຈະເຢັນລົງຕື່ມ

ກົມອຸຕຸນິຍົມ ແລະ ອຸທົກກະສາດ ໃຫ້ຮູ້ວ່າ: ນັບແຕ່ວັນທີ 21-23 ພະຈິກນີ້, ຄວາມກົດດັນສູງຂອງອາກາດເຢັນ ຍັງມີກຳລັງອ່ອນ ສືບຕໍ່ປົກຄຸມຢູ່ທົ່ວທຸກພາກຂອງ ລາວ, ສົມທົບກັບກະແສລົມຕາເວັນອອກສ່ຽງເໜືອ ພັດປົກຄຸມເປັນສ່ວນໃຫຍ່, ຊຶ່ງຈະ ເຮັດໃຫ້ອາກາດເຢັນຢູ່ແຂວງພາກເໜືອ, ດ້ານຕາເວັນອອກ, ແຂວງໄຊສົມບູນ, ເຂດ ພູພຽງບໍລະເວນ ແລະ ຈະມີຝົນຕົກກະຈາຍຢູ່ບາງທ້ອງຖິ່ນໃນແຕ່ລະພາກ, ພ້ອມມີລົມ ພັດແຮງເປັນບາງໂອກາດ.

ພາກເໜືອດ້ານຕາເວັນອອກ: ອາກາດເຢັນ, ພ້ອມມີໝອກບາງໃນຕອນເຊົ້າ ແລະ ມີລົມພັດແຮງເປັນບາງທ້ອງຖິ່ນແຂວງຊຽງຂວາງ; ພາກເໜືອດ້ານຕາເວັນຕົກ ແລະ ພາກກາງ: ອາກາດຍັງຈະເຢັນ ແລະ ມີໝອກບາງປົກຫຸ້ມໃນຕອນເຊົ້າ ແລະ ມີຝົນຕົກກະຈາຍ, ພ້ອມມີລົມພັດແຮງເປັນບາງໂອກາດຢູ່ ບາງທ້ອງຖິ່ນດ້ານຕາເວັນອອກຂອງພາກ; ສະເພາະແຂວງໄຊສົມບູນ: ອາກາດຍັງຈະ ເຢັນ, ພ້ອມມີໝອກໜາໃນຕອນເຊົ້າ; ພາກໃຕ້: ອາກາດຍັງຈະເຢັນ, ພ້ອມມີໝອກບາງ ໃນຕອນເຊົ້າ ແລະ ຈະມີຝົນຕົກກະຈາຍ, ພ້ອມມີລົມພັດແຮງເປັນບາງໂອກາດຢູ່ບາງ ທ້ອງຖິ່ນໃນຕອນບ່າຍຫາຄໍ່າ; ສະເພາະເຂດພູພຽງບໍລະເວນ: ອາກາດຍັງເຢັນຫາໜາວ, ພ້ອມມີໝອກໜາໃນຕອນເຊົ້າ ແລະ ຈະມີຝົນຕົກກະຈາຍເປັນບາງໂອກາດ; ນະຄອນຫລວງວຽງຈັນ: ອາກາດເຢັນ, ພ້ອມມີໝອກບາງໃນຕອນເຊົ້າ ແລະ ມີລົມພັດ ແຮງເປັນບາງໂອກາດ.