ມາເລເຊຍຕັ້ງສໍານັກງານ AI ແຫ່ງຊາດ ຫວັງເປັນສູນກາງ AI ລະດັບພາກພື້ນ
ມາເລເຊຍເປີດຕົວສໍານັກງານປັນຍາປະດິດແຫ່ງຊາດ (NAIO) ເພື່ອເບິ່ງແຍງ ແລະ ກໍານົດນະໂຍບາຍຂອງພາກສ່ວນ AI ໃນປະເທດ ທີ່ກໍາລັງເຕີບໃຫຍ່ ໂດຍຕັ້ງເປົ້າຊຸກຍູ້ໃຫ້ມາເລເຊຍກາຍເປັນສູນກາງ AI ລະດັບພາກພື້ນ.
ຖະແຫລງການຈາກທ່ານ ໂກບິນ ຊິງ ເດໂອ ລັດຖະມົນຕີວ່າການກະຊວງດິຈີຕອນຂອງມາເລເຊຍ ລະບຸວ່າ: ສໍານັກງານດ້ານ AI ນີ້ເປັນແຜນລິເລີ່ມທາງກົນລະຍຸດພາຍໃຕ້ການເບິ່ງແຍງຂອງກະຊວງດິຈີຕອນ ເຊິ່ງຈັດຕັ້ງຂຶ້ນເພື່ອສ້າງມາເລເຊຍໃຫ້ເປັນຜູ້ນໍາດ້ານ AI ລະດັບພາກພື້ນ ແລະ ເປັນຜູ້ຂັບເຄື່ອນການປ່ຽນຜ່ານສູ່ດິຈີຕອນລະດັບໂລກ.
ທ່ານ ໂກບິນ ກ່າວວ່າ: ສໍານັກງານນີ້ຕັ້ງເປົ້າຈະແກ້ໄຂບັນຫາຄວາມທ້າທາຍລະດັບທ້ອງຖິ່ນ ແລະ ລະດັບໂລກ. ພ້ອມທັງສົ່ງເສີມການພັດທະນາທີ່ຍືນຍົງ ໂດຍຈະເນັ້ນສົ່ງເສີມນະວັດຕະກໍາ, ຍົກລະດັບການຮ່ວມມືຂ້າມພາກສ່ວນ ຕະຫລອດຈົນບູລະນະ AI ເຂົ້າກັບຂອບການເຮັດວຽກຂອງລັດຖະບານ, ອຸດສາຫະກໍາ ແລະ ສັງຄົມ.
ທ່ານ ໂກບິນ ຍັງລະບຸອີກວ່າ: ສໍານັກງານນີ້ຈະເປັນຜູ້ນໍາຄວາມພະຍາຍາມດ້ານການວິໄຈ, ການປະຍຸກໃຊ້ ແລະ ການນໍາໃຊ້ທາງການຄ້າກ່ຽວກັບ AI ເພື່ອສົ່ງເສີມເສດຖະກິດດິຈີຕອນ ແລະ ປັບປຸງບໍລິການສາທາລະນະ ໂດຍສໍານັກງານຈະເຮັດວຽກເພື່ອຮັບປະກັນວ່າທຸກພາກສ່ວນຂອງສັງຄົມຈະໄດ້ຮັບຜົນປະໂຫຍດຈາກ AI.
ມາເລເຊຍກາຍເປັນຈຸດໝາຍການລົງທຶນຊັ້ນນໍາລະດັບພາກພື້ນສໍາລັບອຸດສາຫະກໍາເຕັກໂນໂລຊີຊັ້ນສູງຈໍານວນຫລາຍໃນປີຜ່ານມາ ໂດຍດຶງດູດການລົງທຶນໃນດ້ານສູນຂໍ້ມູນ, ຄລາວ ແລະ ໂຄງການ AI.
ຂໍ້ມູນຈາກອົງການພັດທະນາການລົງທຶນແຫ່ງມາເລເຊຍກ່າວວ່າ: ມູນຄ່າການລົງທຶນໃນພາກສ່ວນຂໍ້ມູນ ແລະ ການສື່ສານຂອງປະເທດໄລຍະ 9 ເດືອນທໍາອິດ (ເດືອນມັງກອນ-ກັນຍາ) ຂອງປີ 2024 ມີປະມານ 7.11 ໝື່ນລ້ານຣິງກິດ.
