ເປີດຕະຫລາດນັດແຮງງານ 2024 ມີຄວາມຕ້ອງການແຮງງານ ຫລາຍກວ່າ 7,000 ຄົນ
ວັນທີ 13 ພະຈິກ 2024 ນີ້ ກະຊວງ ແຮງງານ ແລະ ສະຫວັດດີການສັງຄົມ ຈັດຕະຫລາດນັດແຮງງານ ແລະ ສະເຫລີມສະຫລອງ ວັນເຄື່ອນຍ້າຍແຮງງານສາກົນ (18 ທັນວາ) ປະຈຳປີ 2024 ທີ່ສູນການຄ້າລາວ-ໄອເຕັກ ເຊິ່ງຈະດຳເນີນໄປເຖິງວັນທີ 15 ທັນວາ 2024 ໂດຍມີ 78 ຫົວໜ່ວຍແຮງງານ, ວິສາຫະກິດບໍລິການຈັດຫາງານ ແລະ ຄູ່ຮ່ວມງານທັງພາກລັດ ແລະ ເອກະຊົນເຂົ້າຮ່ວມ.
ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ລາຍງານວ່າ: ຕະຫລາດນັດແຮງງານ ແມ່ນກິດຈະກຳທີ່ມີຄວາມຈໍາເປັນ ແລະ ຕ້ອງໄດ້ຈັດຂຶ້ນຢ່າງເປັນປົກກະຕິ ເພື່ອສ້າງໂອກາດ ແລະ ເງື່ອນໄຂ ໃຫ້ຜູ້ຕ້ອງການແຮງງານ ແລະ ຜູ້ຕ້ອງການຢາກເຂົ້າສູ່ຕໍາແໜ່ງງານໃນປັດຈຸບັນ ແລະ ອະນາຄົດ ໂດຍມີຫົວໜ່ວຍແຮງງານ, ວິສາຫະກິດບໍລິການຈັດຫາງານ ແລະ ຄູ່ຮ່ວມງານທັງພາກລັດ ແລະ ເອກະຊົນ ເຂົ້າຮ່ວມ 78 ຫົວໜ່ວຍ ມີຕໍາແໜ່ງງານວ່າງ 293 ຕໍາແໜ່ງງານ ແລະ ມີຄວາມຕ້ອງການແຮງງານ ຫລາຍກວ່າ 7,240 ຄົນ, ແຍກເປັນຂະແໜງການບໍລິການ 5,145 ຄົນ, ອຸດສາຫະກໍາ 2,062 ຄົນ ແລະ ກະສິກໍາ 40 ຄົນ.
ຕະຫລາດນັດແຮງງານ ເພື່ອເຮັດໃຫ້ຫົວໜ່ວຍຈ້າງງານ ແລະ ແຮງງານ ໄດ້ມາພົບກັນແບບເຊິ່ງໜ້າ ເພື່ອແລກປ່ຽນຂໍ້ມູນຂ່າວສານ, ປຶກສາຫາລື, ສຳພາດ ແລະ ກ້າວເຂົ້າສູ່ການບັນຈຸເຂົ້າຕຳແໜ່ງງານໃນຂັ້ນຕໍ່ໄປ ທັງເປັນການສົ່ງເສີມການມີວຽກເຮັດງານທຳ, ຕະຫລາດນັດແຮງງານຄັ້ງນີ້, ຈະເປັນໜຶ່ງກິດຈະກຳ ທີ່ຊ່ວຍແກ້ໄຂບັນຫາການຂາດແຄນແຮງງານຂອງພາກທຸລະກິດ ທັງເປັນການປະກອບສ່ວນເຂົ້າໃນການຊຸກຍູ້ການດຳເນີນທຸລະກິດ, ການຜະລິດ ແລະ ບໍລິການໃຫ້ຄ່ອງຕົວເພື່ອຄວາມໝັ້ນຄົງຂອງຖານການຜະລິດ ແລະ ສ້າງຄວາມ ເຊື່ອໝັ້ນແກ່ນັກລົງທຶນທັງພາຍໃນ ແລະ ຕ່າງປະເທດ ໃນການມາລົງທຶນຢູ່ ສປປ ລາວ ນັບມື້ຫລາຍຂຶ້ນ.
