ລາວ ແລະ ຫວຽດນາມ ເພີ່ມທະວີການຮ່ວມມືດ້ານວິທະຍຸກະຈາຍສຽງ
ໃນວັນທີ 20 ພະຈິກນີ້, ວິທະຍຸກະຈາຍສຽງແຫ່ງຊາດລາວ ແລະ ຫວຽດນາມ, ໄດ້ພົບປະສອງຝ່າຍທີ່ນະຄອນຫລວງວຽງຈັນ, ເຊິ່ງຝ່າຍລາວນຳໂດຍທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ຫວຽດນາມນຳໂດຍທ່ານ ຫງວຽນ ເຖກີ ຜູ້ອໍານວຍການໃຫຍ່ວິທະຍຸຫວຽດນາມ, ເພື່ອພ້ອມກັນສະຫລຸບຕີລາຄາຄືນໝາກຜົນຂອງການຮ່ວມມືໃນໄລຍະຜ່ານມາ, ເຊິ່ງໄດ້ມີຜົນສໍາເລັດຫລາຍດ້ານ, ໂດຍສະເພາະແມ່ນການແລກປ່ຽນນັກຂ່າວເພື່ອເກັບກຳຂ່າວເຫດການສຳຄັນ ຕ່າງໆທີ່ເກີດຂຶ້ນຢູ່ທັງສອງປະເທດ, ພ້ອມທັງແລກປ່ຽນທາງດ້ານວິຊາການ ແລະ ເຕັກນິກໄດ້ມີຜົນສໍາເລັດເປັນຢ່າງດີ. ສອງຝ່າຍໄດ້ເປັນເອກະພາບກັບ ທິດທາງ ແລະ ແຜນການຮ່ວມມືໃນຊຸມປີຕໍ່ໜ້າ.
ນັບແຕ່ປີ 2000 ເປັນຕົ້ນມາ, ວິທະຍຸກະຈາຍສຽງແຫ່ງຊາດລາວ ແລະ ຫວຽດນາມ ຕົກລົງເພີ່ມທະວີການພົວພັນຮ່ວມມືຊ່ວຍເຫລືອຊຶ່ງກັນ ແລະ ກັນຫລາຍຂຶ້ນ ຄື: ວິທະຍຸຫວຽດນາມໄດ້ໃຫ້ການຊ່ວຍເຫລືອຝຶກອົບຮົມດ້ານວິຊາການ, ໃຫ້ຄຳປຶກສາ ແລະ ແກ້ໄຂບັນຫາທີ່ຂັດຂ້ອງດ້ານເຕັກນິກໃຫ້ແກ່ວິທະຍຸກະຈາຍສຽງແຫ່ງຊາດລາວ ແລະ ໂຄງການກໍ່ສ້າງສະຖານີເຄືອຂ່າຍສົ່ງຕໍ່ຢູ່ແຂວງຫລວງພະບາງ ແລະ ສະຫວັນນະເຂດ.
ໃນກອງປະຊຸມສອງຝ່າຍຍັງເຫັນເປັນເອກະພາບກັນວ່າ: ໃນໄລຍະປັດຈຸບັນ, ການພົວພັນຮ່ວມມືລະຫວ່າງສອງຝ່າຍຍິ່ງມີຄວາມຈໍາເປັນ ເພື່ອການໂຄສະນາກະຕຸກຊຸກຍູ້ການພັດທະນາເສດຖະກິດ-ສັງຄົມຂອງຊາດໃຫ້ເຕີບໃຫຍ່ເຂັ້ມແຂງ ແລະ ປະກອບສ່ວນເຂົ້າໃນການເພີ່ມພູນຄູນສ້າງມູນເຊື້ອສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດໃຫ້ນັບມື້ຈະເລີນຫງອກງາມ ແລະ ແຕກດອກອອກຜົນຍິ່ງໆຂຶ້ນ.
