ດີເຄ ເອັຟຊີ ລົງສະໜາມຄັ້ງທໍາອິດຖະຫລົ່ມບຸນເກີດສຶກສາ 14 -8 ໃນຟຸດຊໍລີກ 2017

ການແຂ່ງຂັນຟຸດຊໍ ລີກ ປະຈໍາປີ 2017 ໄດ້ເປີດສາກຂຶ້ນໃນວັນທີ 18 ພະຈິກນີ້ທີ່ສະໜາມກິລາຟຸດຊໍ ສະຫະພັນບານເຕະແຫ່ງຊາດລາວ (ສຕລ) ເຊິ່ງການລົງສະໜາມມື້ທໍາອິດມີ 5 ຄູ່ ຜົນປາກົດວ່າສະໂມສອນດີເຄ ເອັຟຊີ ຖະຫລົ່ມບຸນເກີດສຶກສາ ເອັຟຊີ 14-8.
ການແຂ່ງຂັນ ຟຸດຊໍ ລີກ ປະຈຳປີ 2017 LAO FUTSAL LEAGUE 2017 ຈະດໍາເນີນແຕ່ວັນທີ 18 ພະຈິກ ຈົນເຖິງວັນ ທີ 30 ທັນວາ 2017, ໂດຍມີ 10 ສະໂມສອນເຂົ້າຮ່ວມຄື: ສະໂມສອນ ດີເຄ ເອັຟຊີ, ບຸນເກີດ ສຶກສາເອັຟຊີ, ສູນກິລາສະເຕດ້ຽມ ເອັຟຊີ, ເອັສ ທີ ທີ ເອັຟຊີ, ກຣີນ ໄລເດີ ເອັຟຊີ, ສົມສະໜຸກຟາມ ເອັຟຊີ, ເອັຟຊີ ລັກກີ້, ວິທະຍາໄລ ລາວທ໋ອບ, ມະຫາວິທະຍາໄລ ວິທະຍາສາດສຸຂະພາບ (ມວສ) ແລະ ນະຄອນຫຼວງຢູໄນເຕັດ.
ສໍາລັບການແຂ່ງຂັນມື້ທໍາອິດທັງ 5 ຄູ່ຜົນປາກົດວ່າ: ສະໂມ ສອນ ດີເຄ ເອັຟຊີ ຖະຫລົ່ມ ບຸນເກີດສຶກສາ ໄປ 14-8 ເຊິ່ງເປັນຄູ່ທີ່ມີປະຕູເກີດຂຶ້ນຫລາຍທີ່ສຸດ, ສູນກິລາສະເຕດ້ຽມ ເອັຟຊີ ຊະນະ ເອັສທີທີ ເອັຟຊີ 8-2; ກຣິນ ໄລເດີ ເອັຟຊີ ເສຍໃຫ້ສົມສະໜຸກຟາມ ເອັຟຊີ 2-13; ເອັຟຊີ ລັກກີ້ ຊະນະ ວິທະຍາໄລ ລາວທ໋ອບ 6-3 ແລະ ນະຄອນຫຼວງ ຢູໄນເຕັດ ຊະນະ ມວສ 8-5
ຂະນະທີ່ຮູບແບບການແຂ່ງຂັນຄັ້ງນີ້ ແຕ່ລະທີມຈະພົບກັນໝົດ, ແຂ່ງຂັນຮອບດຽວເພື່ອຫາທີມທີ່ດີທີ່ສຸດຈັດອັນດັບຕາມລໍາດັບ.