ລັດຖະທຳມະນູນສະບັບປັບປຸງ ຄາດວ່າຈະຖືກນຳສະເໜີ ຮັບຮອງໃນທ້າຍເດືອນ ມີນາ ຫລື ຕົ້ນເດືອນ ເມສາ 2025
ທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດ ໄດ້ລາຍງານຄວາມຄືບໜ້າ ໃນການປັບປຸງລັດຖະທຳມະນູນ ປີ 2015 ຕໍ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ IX ວັນທີ 29 ພະຈິກ 2024 ວ່າ: ຕໍ່ການປັບປຸງລັດຖະທຳມະນູນ ສະບັບປີ 2015 ແນໃສ່ການປັບປຸງລະບົບອຳນາດແຫ່ງລັດ ໃຫ້ມີປະສິດທິພາບສູງ, ສ້າງບາດລ້ຽວໃໝ່ໃຫ້ແກ່ການປົກປັກຮັກສາ ແລະ ສ້າງສາປະເທດຊາດ, ການເຊື່ອມໂຍງເສດຖະກິດພາກພື້ນ ແລະ ສາກົນ ແນໃສ່ສ້າງພື້ນຖານທາງດ້ານກົດໝາຍ ກໍຄື ນິຕິກໍາທີ່ຈະວາງອອກໃນຕໍ່ໜ້າ ໃຫ້ຮັບປະກັນແນວທາງການເມືອງຂອງພັກ, ການຄຸ້ມຄອງ-ບໍລິຫານລັດໃນໄລຍະໃໝ່; ການປັບປຸງລັດຖະທຳມະນູນຄັ້ງນີ້ ຕົ້ນຕໍແມ່ນສຸມໃສ່ປັບປຸງບາງໝວດ, ບາງມາດຕາ ເພື່ອຮັບປະກັນ ຫລື ຮອງຮັບແນວທາງການເມືອງຂອງພັກ ແລະ ແນວທາງການຈັດຕັ້ງ, ການຄຸ້ມຄອງ-ບໍລິຫານລັດໃນໄລຍະໃໝ່ ກໍຄື ແນວທາງປ່ຽນແປງໃໝ່ໃນຊຸມປີຕໍ່ໜ້າ ໂດຍສະເພາະໃນສະໄໝທີ XII ຂອງພັກ ຫາກບໍ່ແມ່ນການປັບປຸງທັງໝົດເນື້ອໃນ ຂອງລັດຖະທຳມະນູນ. ໝາຍວ່າ ອັນໃດທີ່ເຂົ້າໃຈເປັນເອກະພາບ, ປະຕິບັດມີປະສິດທິຜົນ, ບໍ່ມີຄວາມສັບສົນ ຫລື ເປັນບັນຫາຫຍຸ້ງຍາກໃນການຈັດຕັ້ງປະຕິບັດ ກໍບໍ່ຈຳເປັນຕ້ອງປັບປຸງຕື່ມອີກ; ການປັບປຸງລັດຖະທໍາມະນູນ ຕ້ອງມີເນື້ອໃນສອດຄ່ອງກັບ ບັນດາເນື້ອໃນຂອງໂຄງການການເມືອງຂອງພັກ ສະບັບທີ 3, ຮ່າງລາຍງານການເມືອງ ທີ່ຈະສະເໜີຕໍ່ກອງປະຊຸມໃຫຍ່ສະໄໝທີ XII ຂອງພັກ, ມະຕິ 05/ຄບສພ, ມະຕິ 04/ກມສພ ແລະ ຄຳສັ່ງຂອງຄະນະເລຂາ ທິການສູນກາງພັກ ເລກທີ 173/ຄລສພ ໂດຍສະເພາະ ບັນຫາບົດບາດພັກເປັນແກນນຳ, ບັນຫາຈຸດໝາຍສັງຄົມນິຍົມ, ບັນຫາເສດຖະກິດເອກະລາດເປັນເຈົ້າຕົນເອງ, ບັນຫາການແບ່ງຂັ້ນຄຸ້ມຄອງ, ການກຳນົດຊື່ເອີ້ນຕ່າງໆ ຕ້ອງປັບປຸງໄປລວງດຽວກັນ.
ລັດຖະທຳມະນູນ ສະບັບປີ 2015 ປະກອບມີ 14 ໝວດ ແລະ 119 ມາດຕາ, ສຳລັບຮ່າງລັດຖະທຳມະນູນ ສະບັບປັບປຸງໃໝ່ນີ້ ປະກອບມີ 14 ໝວດ ແລະ 122 ມາດຕາ. ໃນນີ້, ໄດ້ປັບປຸງ 48 ມາດຕາ (ປັບວິທີຂຽນ, ຕັດ ຫລື ເພີ່ມບາງເນື້ອໃນໃໝ່ໃຫ້ຮັດກຸມ, ຄົບຖ້ວນ, ສົມບູນ ແລະ ສອດຄ່ອງ), ເພີ່ມໃໝ່ 5 ມາດຕາ ແລະ ຮັກສາໄວ້ 69 ມາດຕາ.
ສຳລັບທິດທາງວຽກງານໃນຕໍ່ໜ້າ ຈະສືບຕໍ່ປັບປຸງຮ່າງລັດຖະທຳມະນູນ ຕາມຄຳເຫັນຂອງກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ແລ້ວນຳເອົາຮ່າງລັດຖະທຳມະນູນ ລົງທາບທາມຄຳເຫັນທາງກວ້າງ ແລະ ທາງເລິກ; ສືບຕໍ່ປັບປຸງ, ຮຽບຮຽງ ເນື້ອໃນຂອງຮ່າງລັດຖະທຳມະນູນ ໃຫ້ເປັນສະບັບສົມບູນ ເພື່ອນຳສະເໜີຂໍທິດຊີ້ນຳຂອງ ຄະນະປະຈຳສະພາແຫ່ງຊາດ ແລະ ກົມການເມືອງສູນກາງພັກ; ນໍາສະເໜີຕໍ່ກອງປະຊຸມສະໄໝວິສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ພິຈາລະນາຮັບຮອງເອົາ ແລະ ປະກາດໃຊ້ (ສະເໜີໃຫ້ມີກອງປະຊຸມສະໄໝວິສາມັນເທື່ອທີ 2 ໃນທ້າຍເດືອນ ມີນາ ຫລື ຕົ້ນເດືອນ ເມສາ 2025 ພິຈາລະນາ ຮັບຮອງລັດຖະທຳມະນູນ ແລະ ບາງກົດໝາຍທີ່ມີຄວາມຈຳເປັນ ແລະ ຮີບດ່ວນ).
ທີ່ມາ: ປະເທດລາວ
